ສປປ.ລາວ – ສສ.ຫວຽດນາມ ຮ່ວມວາງສີລາລືກ ໂຄງການກໍ່ສ້າງທ່າທຽບເຮືອທີ 3 ຂອງທ່າເຮືອຫວຸ້ງອ່າງ

ສປປ.ລາວ – ສສ.ຫວຽດນາມ ຮ່ວມວາງສີລາລືກ ໂຄງການກໍ່ສ້າງທ່າທຽບເຮືອທີ 3 ຂອງທ່າເຮືອຫວຸ້ງອ່າງ

Posted by

ພິທີວາງສີລາລືກ ໂຄງການກໍ່ສ້າງທ່າທຽບເຮືອ ທີ 3 ຂອງທ່າເຮືອຫວຸ້ງອ່າງ ລາວ-ຫວຽດນາມ ໄດ້ຈັດຂື້ນ ວັນທີ 22 ກັນຍາ 2015 ທີເມືອງຄີອານ ແຂວງຮ່າຕິ່ງ ສສ.ຫວຽດນາມ ໂດຍການເຂົ້າຮ່ວມຂອງທ່ານນາງ ວິໄລຄໍາ ໂພສາລາດ ລັດຖະມົນຕີຊ່ອຍວ່າການ ກະຊວງໂຍທາທິການ ແລະ ຂົນສົ່ງ ແຫ່ງ ສປປ.ລາວ ທ່ານ ວໍກີມກຶກ ເລຂາພັກແຂວງ ປະທານສະພາປະຊາຊົນແຂວງຮ່າຕິ່ງ ແລະ ທ່ານເຈົ້າແຂວງໆຮ່າຕິ່ງ ແຫ່ງ ສສ.ຫວຽດນາມ ແລະ ບໍລິສັດຫຸ້ນສ່ວນທ່າເຮືອຫວຸ້ງອ່າງລາວ-ຫວຽດ ແລະ ໜ່ວຍງານທີ່ກ່ຽວຂ້ອງ ພ້ອມດ້ວຍຄະນະທັງສອງຝ່າຍເຂົ້າຮ່ວມ.

…….ໃນພິທີວາງສິລາລືກ ໂຄງການກໍ່ສ້າງທ່າທຽບເຮືອທີ 3 ຄັ້ງນີ້ ແມ່ນບົນຈິດໃຈແຫ່ງຄວາມສາມັກຄີ ມິດຕະພາບແບບພິເສດ ແລະ ການຮ່ວມມືຢ່າງຮອບດ້ານ ລະຫວ່າງ ສອງພັກ ສອງລັດຖະບານ ແລະ ປະຊາຊົນສອງຊາດ ລາວ-ຫວຽດນາມ ເວົ້າສະເພາະລະຫວ່າງຂະແໜງຄົມມະນາຄົມຂົນສົ່ງຂອງສອງປະເທດ ໂດຍປະຕິບັດຕາມຂໍ້ຕົກລົງລະຫວ່າງ ລັດຖະບານ ແຫ່ງ ສປປ.ລາວ ແລະ ລັດຖະບານ ແຫ່ງ ສສ.ຫວຽດນາມ ກ່ຽວກັບ ການຄຸ້ມຄອງ ແລະ ນໍາໃຊ້ທ່າເຮືອຫວຸ້ງອ່າງ ທີ່ໄດ້ລົງນາມນໍາກັນທີ່ນະຄອນໂຮຈີມິນ ໃນວັນທີ 20 ກໍລະກົດ 2001 ທີ່ໄດ້ມີຄວາມພະຍາຍາມຢ່າງສູງ ພ້ອມກັນຈັດຕັ້ງປະຕິບັດເນື້ອໃນຈິດໃຈຂອງຂໍ້ຕົກລົງດັ່ງກ່າວໃຫ້ປາກົດຜົນເປັນຈິງ ໂດຍໄດ້ລົງນາມ ສັນຍາຮ່ວມທຸລະກິດ ວ່າດ້ວຍການສ້າງຕັ້ງບໍລິສັດຫຸ້ນສ່ວນທ່າເຮືອຫວຸ້ງອ່າງ ຫວຽດ-ລາວ ໃນວັນທີ 16 ເມສາ 2010 ແລະ ຜ່ານການເຄື່ອນໄຫວດຳເນີນທຸລະກິດ ນັບແຕ່ມື້ສ້າງຕັ້ງເປັນຕົ້ນມາ ຕາມໂຕເລກສະຖິຕິເຫັນວ່າ ມີການຂະຫຽາຍໂຕຢ່າງຕໍ່ເນື່ອງ ນັບມື້ນັບເກີດດອກອອກຜົນເປັນຢ່າງດີ ສິນຄ້າຜ່ານແດນຂອງລາວ ຜ່ານທ່າເຮືອຫວຸ້ງອ່າງແຫ່ງນີ້ ນັບມື້ນັບເພີ່ມຂຶ້ນ ເຊິ່ງເປັນການປະກອບສ່ວນເຂົ້າໃນການປະຕິບັດແນວທາງນະໂຍບາຍຂອງລັດຖະບານລາວທີ່ຫັນປະເທດລາວ ຈາກປະເທດທີ່ບໍ່ມີຊາຍແດນຕິດກັບທະເລໃຫ້ກາຍເປັນທາງຜ່ານ ທ່າເຮືອຫວຸ້ງອ່າງແຫ່ງນີ້ ນັບວ່າ ເປັນຈຸດນຶ່ງ ເຊິ່ງເປັນທາງອອກສູ່ທະເລ ທີ່ມີຄວາມສຳຄັນຂອງລາວ ແລະ ສາມາດເຊື່ອມໂຍງກັບທ່າເຮືອຂອງບັນດາປະເທດອາຊຽນ.

…….ດັ່ງທີ່ຮັບຮູ້ນໍາກັນແລ້ວວ່າ 2 ທ່າທຽບເຮືອທີ່ໃຫ້ການບໍລິການຢູ່ໃນປັດຈຸບັນ ບໍ່ສາມາດຕອບສະໜອງໄດ້ຢ່າງພຽງພໍກັບ ຄວາມຮຽກຮ້ອງຕ້ອງການ ທີ່ນັບມື້ນັບເພີ່ມຂຶ້ນຢ່າງກ້າວກະໂດດຂອງສິນຄ້ານໍາເຂົ້າ-ສົ່ງອອກ ສິນຄ້າຜ່ານແດນຂອງລາວ ດັ່ງນັ້ນ ການລົງທຶນ ເຂົ້າໃນການກໍ່ສ້າງທ່າທຽບເຮືອທີ 3 ແມ່ນມີຄວາມສໍາຄັນ ແລະ ມີຄວາມຈໍາເປັນ ເພື່ອອຳນວຍຄວາມສະດວກໃນການບໍລິການໃຫ້ແກ່ສິນຄ້າ ຜ່ານແດນຂອງ ລາວ ຜ່ານທ່າເຮືອໄດ້ຢ່າງສະດວກ ແລະ ວ່ອງໄວ ຊ່ອຍແກ້ໄຂການແອອັດຂອງສິນຄ້າທີ່ມາຜ່ານທ່າເຮືອຫວຸ້ງອ່າງ ເຊິ່ງໃນໄລຍະຜ່ານມາ ລັດຖະບານລາວໄດ້ມີຄວາມພະຍາຍາມປັບປຸງ ແລະ ສ້າງເສັ້ນທາງລົດ ເພື່ອເຊື່ອມຕໍ່ກັບທ່າເຮືອຂອງຫວຽດນາມ ຮວມທັງສຶກສາຄວາມເປັນໄປໄດ້ໃນການສ້າງເສັ້ນທາງລົດໄຟຈາກລາວ ມາເຖິງທ່າເຮືອ ຫວຽດນາມອີກດ້ວຍ.

ຂ່າວ/ພາບ: ບຸນລິດ

Leave a Reply

Your email address will not be published. Required fields are marked *

*