ສຟລ ປະສົບຜົນສຳເລັດອັນດີງາມໃນການເປັນເຈົ້າພາບຄັ້ງທໍາອິດ ຈັດກອງປະຊຸມ AFIC ຄັ້ງທີ 35

ສຟລ ປະສົບຜົນສຳເລັດອັນດີງາມໃນການເປັນເຈົ້າພາບຄັ້ງທໍາອິດ ຈັດກອງປະຊຸມ AFIC ຄັ້ງທີ 35

Posted by

      ສະມາຄົົມເຟີນີເຈີລາວ ຫຼື ສຟລ ປະສົບຜົນສຳເລັດດີງາມໃນການເປັນເຈົ້າພາບ ຈັດກອງປະຊຸມສະພາອຸດສາຫະກຳເຟີນີເຈີອາຊຽນ ຫຼື AFIC ຄັ້ງທີ 35 ວາລະດັ່ງກ່າວມີຂຶ້ນໃນວັນທີ 10 ພະຈິກ 2017 ຜ່ານມາ ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກຳ ແລະປ່າໄມ້ ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກຳແຫ່ງຊາດລາວ ທ່ານ ກໍ ກໍວິນ ປະທານສະພາອຸດສາຫະກຳເຟີນີເຈີອາຊຽນ ທ່ານ ຄຳໄພ ສົມຊະນະ ປະທານສະມາຄົມເຟີນີເຈີລາວ ມີບັນດາສະມາຊິກ ສຟລ ແລະ ສະມາຊິກ AFIC ຮວມທັງໂຕແທນຈາກຂະແໜງການທີ່ກ່ຽວຂ້ອງເຂົ້າຮ່ວມກອງປະຊຸມຄັ້ງນີ້.

      ປະທານສະມາຄົມເຟີນີເຈີລາວ ກ່າວວ່າ ສະພາອຸດສາຫະກຳເຟີນີເຈີອາຊຽນ ຫຼື  AFIC  ສ້າງຕັ້ງຂຶ້ນໃນປີ 1978 ນັບເປັນໄລຍະເວລາໄດ້ 39 ປີແລ້ວ ທີ່ທາງສະມາຄົມໄດ້ມີຊື່ສຽງພໍສົມຄວນໃນພາກພື້ນ ແລະສາກົນ ທັງນີ້ ແມ່ນປະກອບມີສະມາຊິກທັງໝົດ 8 ສະມາຄົມຈາກບັນດາປະເທດອາຊຽນດ້ວຍກັນ ໃນນັ້ນ ຮວມທັງສະມາຄົມເຟີນີເຈີລາວ ຫຼື LFA ທີ່ໄດ້ຕາງໜ້າໃຫ້ ສປປ ລາວ ໃນຖານະອົງການຈັດຕັ້ງຂອງບັນດາຜູ້ຜະລິດ ແລະ ຈຳໜ່າຍເຟີນີເຈີໃນລາວ ເຊິ່ງໄດ້ເຂົ້າເປັນສະມາຊິກຂອງສະພາອຸດສາຫະກຳເຟີນີເຈີອາຊຽນ ນັບແຕ່ປີ 2014 ເປັນຕົ້ນມາ ສຳລັບການໄດ້ຮັບກຽດເປັນເຈົ້າພາບຈັດກອງປະຊຸມຄັ້ງນີ້ ກໍນັບເປັນຄັ້ງທຳອິດ ຫຼື ຄັ້ງປະຫວັດສາດຂອງສະມາຄົມເຟີນີເຈີລາວເຮົາ.

      ເນື້ອໃນການປະຊຸມແມ່ນເນັ້ນປຶກສາຫາລືກ່ຽວກັບວິໄສທັດການຮ່ວມມື ເພື່ອຂະຫຍາຍຕະຫຼາດ ແລະ ແລກປ່ຽນປະສົບການ ຮວມເຖິງນຳສະເໜີຮູບແບບການຜະລິດທີ່ຕິດພັນກັບການອະນຸຮັກສິ່ງແວດລ້ອມ ແລະ ການປູກປ່າທົດແທນ ຫຼື ການປູກໄມ້ເພື່ອເປັນວັດຖຸດິບ ທີ່ມີຄວາມສຳຄັນຕໍ່ທຸລະກິດເຟີນີເຈີລາວ ແລະ ບັນດາສະມາຄົມເຟີນີເຈີທີ່ມາຈາກ 8 ປະເທດອາຊຽນ.

ຂ່າວ: ໄຊມຸງຄຸນ

Leave a Reply

Your email address will not be published. Required fields are marked *

*