ສວນນ້ຳພຸ ໄດ້ປັບປ່ຽນພູມີທັດ ສ້າງຄວາມໂດດເດັ່ນເພື່ອຕ້ອນຮັບປີທ່ອງທ່ຽວລາວ 2018

ສວນນ້ຳພຸ ໄດ້ປັບປ່ຽນພູມີທັດ ສ້າງຄວາມໂດດເດັ່ນເພື່ອຕ້ອນຮັບປີທ່ອງທ່ຽວລາວ 2018

Posted by

      ຖືເປັນການປ່ຽນໂສມຄັ້ງໃຫຍ່ ແນໃສ່ຕ້ອນຮັບ ແລະ ສ້າງຄວາມປະທັບໃຈແກ່ນັກທ່ອງທ່ຽວທັງພາຍໃນ ແລະ ຕ່າງປະເທດ ເນື່ອງໃນໂອກາດປີທ່ອງທ່ຽວລາວ 2018 ເຊິ່ງຜູ້ບໍລິຫານໄດ້ມີການປັບປ່ຽນຊື່ຮ້ານມິກ ເປັນສວນນ້ຳພຸ ເພື່ອສອດຄ່ອງກັບຈຸດທີ່ຕັ້ງໃຈກາງນະຄອນຫຼວງວຽງຈັນ ອັນເປັນສະຖານທີ່ສຳຄັນທາງປະຫວັດສາດ ແລະ ມີບົດບາດຕໍ່ວິຖີຊີວິດຊາວເມືອງ ພ້ອມເລື່ອງເລົ່າໃນແຕ່ລະຍຸກສະໄໝ ທັງນີ້ ສວນນ້ຳພຸຈິ່ງໄດ້ຮວມເອົາສັນຍະລັກໂດດເດັ່ນຂອງໃຈກາງເມືອງເອກຂອງປະເທດມາໄວ້ໃນສະຖານທີ່ແຫ່ງນີ້.

      ທ່ານ ນາງ ດາລຸນີ ພູມມະສັກ ຜູ້ອຳນວຍການສວນນ້ຳພຸ ໄດ້ໃຫ້ສຳພາດຕໍ່ສື່ໃນໂອກາດແນະນຳສວນນ້ຳພຸເມື່ອວັນທີ 07 ທັນວາ 2017 ວ່າ “ໄດ້ມີການປັບປຸງໂດຍການຕົບແຕ່ງພາຍໃນໃຫ້ມີຫຼາກຫຼາຍສີສັນ ພ້ອມນັ້ນ ກໍມີການແບ່ງເຂດ (ຈັດໂຊນ) ບໍລິການໃຫ້ຫຼາກຫຼາຍຂຶ້ນ ເຊິ່ງມີທັງເຂດບັນເທີງຂອງໄວໜຸ່ມ ແລະ ເຂດວີໄອພີ ພ້ອມນີ້ ກໍມີໂຊນອາຫານນາໆຊາດ ອາຫານຍີ່ປຸ່ນ ມີຊັ້ນດາດຟ້າທີ່ສາມາດເບິ່ງມູມກວ້າງຂອງໃຈກາງນະຄອນຫຼວງໄດ້ຢ່າງມີຊີວິດຊີວາ ມີໂຊນ Bar ແລະ Cocktail ນອກນັ້ນ ຍັງມີມູມສວນອາຫານທີ່ສາມາດນັ່ງຊົມສີສັນຂອງນ້ຳພຸຍາມຄ່ຳຄືນໄດ້ຢ່າງໃກ້ຊິດ.

      ສວນນ້ຳພຸແຫ່ງນີ້ ຖືເປັນແລນມາກ (Land Mark) ທີ່ໂດດເດັ່ນດ້ວຍຫໍໂມງໃຫຍ່ ເຊິ່ງອ້ອມຮອບດ້ວຍອາຄານແບບຝຣັ່ງ ພ້ອມນັ້ນ ກໍມີການນຳສະເໜີຮູບພາບບັນຍາກາດຂອງສວນນ້ຳພຸ ໃນແຕ່ລະຍຸກສະໄໝເທິງກຳແພງເບື້ອງຊ້າຍ ສ່ວນດ້ານໃນກໍຈະເຫັນສີສັນ ແລະ ການເຄື່ອນໄຫວຂອງສາຍນ້ຳທ່າມກາງສຽງດົນຕີທີ່ມວນຊົນສາມາດເຂົ້າໄປຖ່າຍພາບ ເຊລຟີ້ ໂດຍບໍ່ເສຍຄ່າ ທັງນີ້ ຜູ້ອຳນວຍການສວນນ້ຳພຸ ກໍໃຫ້ຮູ້ຕື່ມວ່າ ມີການນຳໃຊ້ງົບປະມານ 3 ຕື້ກີບ ເພື່ອເນລະມິດເພີ່ມຄວາມມີສະເໜໜ້າປະທັບໃຈໃຫ້ແກ່ສະຖານທີ່ແຫ່ງນີ້ ແນໃສ່ຕອບສະໜອງໄດ້ການບໍລິການທີ່ດີ ມີມາດຕະຖານສາກົນ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ.

ຂ່າວ: ສຸກໃຈ

Leave a Reply

Your email address will not be published. Required fields are marked *

*