ສະຖານະການໄຂ້ເລືອດອອກ ຍັງໜ້າເປັນຫ່ວງ

ສະຖານະການໄຂ້ເລືອດອອກ ຍັງໜ້າເປັນຫ່ວງ

Posted by

ປັດຈຸບັນ ສະພາບການລະບາດຂອງພະຍາດໄຂ້ເລືອດອອກ (ໄຂ້ຍຸງລາຍ)
ໃນ ສປປ.ລາວ ເຮົາຍັງໜ້າເປັນຫ່ວງ ເນື່ອງຈາກຈຳນວນຜູ້ຕິດເຊື້ອ
ໃນທົ່ວປະເທດໄດ້ເພີ່ມຂຶ້ນເກືອບ 30.000 ຄົນ ໃນນັ້ນ 77 ຄົນ
ໄດ້ເສຍຊີວິດຈາກການຕິດເຊື້ອພະຍາດດັ່ງກ່າວ ແລະ ສຳລັບຢູ່
ນະຄອນຫລວງວຽງຈັນ ກໍມີຈຳນວນຕົວເລກຜູ້ຕິດເຊື້ອພະຍາດ
ໄຂ້ເລືອດອອກເພີ່ມຂຶ້ນ ເກືອບ 5 ພັນຄົນ ໃນນັ້ນ 18 ຄົນ
ໄດ້ເສຍຊີວິດ ຕໍ່ໜ້າສະພາບການທີ່ພະຍາດໄຂ້ເລືອດອອກພວມ
ລະບາດທົ່ວປະເທດ ລັດຖະມົນຕີວ່າການກະຊວງສາທາລະນະສຸກ
ກໍໄດ້ຮຽກຮ້ອງເຖິງທຸກພາກສ່ວນໃນສັງຄົມ ຊ່ວຍສົມທົບທຶນ ແລະ
ພ້ອມກັນສ້າງຂະບວນການຕອບໂຕ້ດ້ວຍການປະຕິບັດມາດຕະການ
5 ປ ເຊິ່ງຈະຕ້ອງລົງມືເຮັດຕົວຈິງຕິດຕໍ່ກັນອີກຫລາຍເດືອນ ຈິ່ງຈະ
ສາມາດຄວບຄຸມໄດ້ ເນື່ອງຈາກສະພາບອາກາດ ໃນລະດູຝົນທີ່ມີ
ທ່ວງທ່າຈະແກ່ຍາວ ອັນເປັນໜຶ່ງໃນເງື່ອນໄຂທີ່ອຳນວຍໃຫ້ວົງຈອນ
ຊີວິດຂອງຍຸງລາຍ ຊຶ່ງເປັນພາຫະນຳເຊື້ອ ແຜ່ພັນໄດ້ໄວ.
ຕາມການເປີດເຜີຍຂໍ້ມູນຄັ້ງຫລ້າສຸດ ຂອງໜ່ວຍງານເຝົ້າລະວັງ
ກະຊວງສາທາລະນະສຸກໃຫ້ຮູ້ວ່າ: ນັບແຕ່ຕົ້ນເດືອນມັງກອນ ຫາ
ວັນທີ 29 ກໍລະກົດ 2013 ໃນທົ່ວປະເທດ ພົບກໍລະນີຄົນເປັນ
ພະຍາດໄຂ້ເລືອດອອກ 29.000 ກ່ວາຄົນ ໃນນັ້ນ ເສຍຊີວິດແລ້ວ
77 ຄົນ ນະຄອນຫລວງວຽງຈັນ ມີຜູ້ຕິດເຊື້ອໄຂ້ເລືອດອອກຫລາຍ
ກ່ວາແຂວງອື່ນໆ ຊຶ່ງມີເຖິງ 4.900 ກ່ວາຄົນ ໃນນັ້ນ ເສຍຊີວິດແລ້ວ
18 ຄົນ.

ພາບປະກອບ: ອາການໄຂ້ເລືອດອອກ

ຈາກທ່າອຽງຂອງຄົນຕິດເຊື້ອໄຂ້ເລືອດອອກ ມີຈຳນວນເພີ່ມຂຶ້ນໃນ
ທົ່ວປະເທດ ລັດຖະບານກໍໄດ້ອອກແຈ້ງການ ເຖິງບັນດາກະຊວງ
ອົງການທຽບເທົ່າ ນະຄອນຫລວງວຽງຈັນ ແລະ ບັນດາແຂວງຕ່າງໆ
ໃນຂອບເຂດທົ່ວປະເທດ ໃຫ້ເພີ່ມທະວີຄວາມເອົາໃຈໃສ່ຕ້ານການລະບາດ
ຂອງພະຍາດໄຂ້ເລືອດອອກ(ໄຂ້ຍຸງລາຍ)ໂດຍສະເພາະໃຫ້ເອົາໃຈໃສ່
ປະຕິບັດມາດຕະການ 5 ປ ຄື: (ປ 1) ປິດພາຊະນະທີ່ເກັບນໍ້າໃນເຮືອນ
ແລະ ນອກເຮືອນ ເພື່ອບໍ່ໃຫ້ຍຸງມາໄຂ່ໃສ່ (ປ 2) ປ່ຽນນໍ້າໃນພາຊະນະ
ເຊັ່ນ: ເຕົ້າດອກໄມ້ ນໍ້າຮອງຕີນຕູ້ ແລະ ອື່ນໆ (ປ 3) ປ່ອຍປາ
ຫາງນົກຍຸງເພື່ອກິນໜອນນໍ້າ (ປ 4) ປັບປຸງອະນາໄມສິ່ງແວດລ້ອມ
ອ້ອມເຮືອນ ບໍ່ໃຫ້ມີກະໂປະກະປ໋ອງ ຢາງຕີນລົດເກົ່າ ແລະ ພາຊະນະ
ເກັບຂັງນໍ້າຕ່າງໆ ແລະ (ປ 5) ປະຕິບັດໃຫ້ເປັນນິໄສປະຈຳ ທຸກໆ
ອາທິດ ຖ້າເປັນໄຂ້ໃຫ້ໄປພົບແພດດ່ວນ.
ທາງກະຊວງສາທາລະນະສຸກ ກໍໄດ້ລາຍງານໃຫ້ຮູ້ກ່ຽວກັບຄວາມຈຳເປັນ
ທີ່ຈະນຳໃຊ້ເງິນເຖິງ 10 ຕື້ກີບ ໃນນັ້ນ ຈະນຳໃຊ້ເຂົ້າໃນພາກປະຕິບັດ
ຕົວຈິງຂອງນັກສຶກສາທີ່ພວມລົງປະຈຳຢູ່ຕາມບ້ານເປົ້າໝາຍຕ່າງໆໃນ
6 ແຂວງ ເປັນໄລຍະ 3 ເດືອນ ຊຶ່ງຈະໃຊ້ເງິນທຶນປະມານ 8 ຕື້ກີບ
ແລະ ອີກຫລາຍກ່ວາ 1 ຕື້ກີບ ແມ່ນໃຊ້ເຂົ້າໃນການລົງເຮັດວຽກ
ທຳລາຍແຫລ່ງເພາະພັນຍຸງລາຍ ແລະ ພົ່ນຢາຂອງພະນັກງານ
ຂັ້ນເມືອງ ອີກ 240 ລ້ານກີບ ຈະໃຊ້ເຂົ້າໃນການເຄື່ອນໄຫວໂຄສະນາ
ຊຶ່ງມາຮອດປັດຈຸບັນ ໄດ້ມີພາກສ່ວນຕ່າງໆປະກອບສ່ວນເຂົ້າໃນວຽກງານ
ດັ່ງກ່າວ 4 ຕື້ກ່ວາກີບ.
ໂດຍອີງໃສ່ສະພາບອາກາດໃນຊ່ວງລະດູຝົນປີນີ້ ອາດຈະແກ່ຍາວໄປອີກ
ໄລຍະໜຶ່ງ ຍິ່ງເປັນເງື່ອນໄຂອຳນວຍໃຫ້ແກ່ການວາງໄຂ່ຍຸງລາຍ ຊຶ່ງເປັນ
ພາຫະນຳເຊື້ອພະຍາດໄຂ້ເລືອດອອກ ຕໍ່ໜ້າການປະເຊີນກັບອັນຕະລາຍ
ດັ່ງກ່າວນີ້ ຈິ່ງຮຽກຮ້ອງເຖິງ ປະຊາຊົນລາວບັນດາເຜົ່າໃນທົ່ວປະເທດ
ຈົ່ງພ້ອມກັນເພີ່ມຄວາມເອົາໃຈໃສ່ເຮັດອະນາໄມເຮືອນຊານ ທີ່ຢູ່ອາໄສ
ຕະຫລອດຮອດສຳນັກງານຫ້ອງການ ໂຮງຈັກ ໂຮງງານ ໂດຍສະເພາະ
ສະພາບແວດລ້ອມອ້ອມຂ້າງໂຮງຮຽນ ທີ່ເດັກນ້ອຍຫລາຍຄົນຢູ່ຮ່ວມກັນ
ຍິ່ງຄວນເອົາໃຈໃສ່ເປັນພິເສດ ແລະ ຈັດການຕັດວົງຈອນຊີວິດຍຸງລາຍ
ດ້ວຍການກຳຈັດແຫລ່ງເພາະພັນ ໂດຍປະຕິບັດຕາມມາດຕະການ 5 ປ
ເທົ່ານັ້ນ ຈິ່ງຈະສາມາດປ້ອງກັນ ແລະ ຄວບຄຸມການລະບາດຂອງພະຍາດ
ໄຂ້ເລືອດອອກໄດ້.

ໂດຍ: ສ.ບົວພາ

Leave a Reply

Your email address will not be published. Required fields are marked *

*