ສະຖານີຂົນສົ່ງຢືນຢັນວ່າ ໃນໄລຍະເທສະການປີໃໝ່ລາວປີນີ້ ຈະຍັງຮັກສາຄ່າໂດຍສານໃຫ້ເທົ່າເດີມ

ສະຖານີຂົນສົ່ງຢືນຢັນວ່າ ໃນໄລຍະເທສະການປີໃໝ່ລາວປີນີ້ ຈະຍັງຮັກສາຄ່າໂດຍສານໃຫ້ເທົ່າເດີມ

Posted by

      ສະຖານີຂົນສົ່ງໂດຍສານສາຍເໜືອ ແລະ ສາຍໃຕ້ ໄດ້ຢືນຢັນຜ່ານສື່ວ່າ ລາຄາປີ້ໂດຍສານຍັງຄົງຮັກສາມາດຕະຖານເດີມ ເຖິງແມ່ນວ່າຈະເປັນໄລຍະເທສະການໃດກໍຕາມ ແຕ່ກໍຮຽກຮ້ອງໃຫ້ຜູ້ທີ່ມີຈຸດປະສົງຈະເດີນທາງຂຶ້ນເໜືອ ຫຼືລົງໃຕ້ ຈົ່ງມາຈັບຈອງຊື້ປີ້ ແລະ ຂຶ້ນລົດຢູ່ສະຖານີຂົນສົ່ງໂດຍສານ ເພື່ອໃຫ້ມີຄວາມສະດວກ ໂປ່ງໃສ ແລະ ເປັນທໍາ. 

      ທ່ານ ວັນເພັນ ສີສຸກ ຜູ້ອຳນວຍການສະຖານີຂົນສົ່ງໂດຍສານສາຍໃຕ້ ສາຍຕ່າງປະເທດ (ຢູ່ເສັ້ນທາງ 450 ປີ) ໄດ້ໃຫ້ສຳພາດຜ່ານສື່ເມື່ອວັນທີ 07 ເມສາ 2017 ວ່າ ຕາມທຳມະດາມີລົດໂດຍສານທີ່ໃຫ້ບໍລິການໄປພາກກາງ ແລະ ພາກໃຕ້ ຫຼາຍກວ່າ 50 ຄັນຕໍ່ວັນ ສ່ວນໃນໄລຍະເທສະການປີໃໝ່ລາວນີ້ກໍມີການກຽມຄວາມພ້ອມເພີ່ມລົດໂດຍສານຕື່ມອີກ 30 ກວ່າຄັນ (ລົດເສີມ) ເພື່ອຕອບສະໜອງການເດີນທາງຂອງມວນຊົນໃນເທສະການແຫ່ງຄວມສຸກນີ້ ແລະ ຢືນຢັນວ່າຍັງຄົງເກັບຄ່າປີ້ໂດຍສານຕາມປົກກະຕິ (ບໍ່ຂຶ້ນລາຄາ) ສ່ວນບັນຫາການນັ່ງຕັ່ງເສີມ ຫຼື ສະພາບລົດແອອັດ ແມ່ນຮັບປະກັນວ່າໃນສະຖານີຂົນສົ່ງສາຍໃຕ້ຈະມີການສັງເກດໂດຍຕຳຫຼວດເສດຖະກິດ ຕຳຫຼວດຈະລາຈອນ ແລະ ເຈົ້າໜ້າທີ່ພະແນກໂຍທາທິການ ແລະຂົນສົ່ງ ກວດກາກ່ອນອອກລົດ ເຊິ່ງຖ້າມີສະພາບດັ່ງກ່າວກໍໝາຍຄວາມວ່າ ຜູ້ໂດຍສານລັດຂຶ້ນລົດກາງທາງ ແລະ ເຈົ້າຂອງລົດປະຕິບັດຜິດກົດລະບຽບ.

      ເຊິ່ງສອດຄ່ອງກັບການໃຫ້ສຳພາດຂອງ ທ່ານ ນາງ ຈິດປະສົງ ຫຼວງເດດມີໄຊ ປະທານສະຖານີຂົນສົ່ງໂດຍສານສາຍເໜືອ (ບ້ານດົງນາທອງ ເມືອງສີໂຄດຕະບອງ ນະຄອນຫຼວງວຽງຈັນ) ທີ່ໄດ້ເປີດເຜີຍຕໍ່ສື່ເມື່ອກ່ອນໜ້ານັ້ນ (ວັນທີ 04 ເມສາ 2017) ວ່າ ລາຄາໂດຍສານຍັງຄົງເດີມ ແຕ່ກໍມີການເພີ່ມຈຳນວນລົດບໍລິການຂຶ້ນເທົ່າໂຕ ແລະ ປະຕິບັດຕາມທິດທາງຂອງພະແນກໂຍທາທິການ ແລະຂົນສົ່ງ ວາງອອກຢ່າງເຂັ້ມງວດ ແຕ່ກຳນົດເວລາການອອກລົດຈາກຄິວອາດປ່ຽນແປງໜ້ອຍນຶ່ງ ເນື່ອງຈາກວ່າສະພາບຜູ້ໂດຍສານມີຈຳນວນເພີ່ມຂຶ້ນ ຈິ່ງຢາກໃຫ້ຜູ້ທີ່ຈະເດີນທາງເພື່ອເວລາມາສະຖານີໄວຂຶ້ນ ສ່ວນການແອອັດນັ່ງຕັ່ງເສີມ ກໍອາດເປັນບັນຫາທີ່ຜູ້ໂດຍສານພາກັນລັດຂຶ້ນກາງທາງ ແລະ ເປັນຄວາມລະເລີຍຕໍ່ລະບຽບຂອງເຈົ້າຂອງລົດ.

ຂ່າວ/ຮູບ: ສ. ບົວພາ

Leave a Reply

Your email address will not be published. Required fields are marked *

*