ສະພາປະຊາຊົນແຂວງເຊກອງ ດຳເນີນກອງປະຊຸມສະໄໝສາມັນ ເທື່ອທີ 2

ສະພາປະຊາຊົນແຂວງເຊກອງ ດຳເນີນກອງປະຊຸມສະໄໝສາມັນ ເທື່ອທີ 2

Posted by

     ສະມາຊິກສະພາປະຊາຊົນແຂວງເຊກອງ ຊຸດທີ I ໄດ້ດຳເນີນກອງປະຊຸມສະໄໝສາມັນ ເທື່ອທີ 2 ເພື່ອພິຈາລະນາ ແລະ ຮັບຮອງເອົາບັນຫາສຳຄັນຕ່າງໆຂອງແຂວງ ໂດຍສະເພາະແມ່ນການກຳນົດທິດທາງ ຄາດໝາຍ ແລະ ໜ້າທີ່ວຽກງານຈຸດສຸມໃນການພັດທະນາເສດຖະກິດ-ສັງຄົມຂອງແຂວງໃນປີ 2017 ເຊິ່ງໄດ້ໄຂຂຶ້ນໃນວັນທີ 10 ມັງກອນ 2017 ແລະ ຈະໄດ້ດຳເນີນໄປເຖິງວັນທີ 13 ມັງກອນ 2017 ຢູ່ສະໂມສອນສະພາປະຊາຊົນແຂວງ ໂດຍພາຍໃຕ້ການເປັນປະທານຂອງທ່ານ ພອນເພັດ ຄິວລະວົງ ປະທານສະພາປະຊາຊົນແຂວງ ເຂົ້າຮ່ວມມີທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ ສະມາຊິກສະພາແຫ່ງຊາດ ມີສະມາຊິກສະພາປະຊາຊົນແຂວງ ແລະ ພາກສ່ວນກ່ຽວຂ້ອງ.

     ໃນໂອກາດກ່າວໄຂກອງປະຊຸມ ທ່ານ ພອນເພັດ ຄິວລະວົງ ມີຄຳເຫັນວ່າ ກອງປະຊຸມຄັ້ງນີ້ ແມ່ນຈະໄດ້ສຸມໃສ່ພິຈາລະນາ ແລະ ຮັບຮອງເອົາບັນຫາສຳຄັນຂອງແຂວງເປັນຕົ້ນແມ່ນພິຈາລະນາ ແລະ ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງໃນສົກປີ 2015-2016 ພ້ອມດ້ວຍທິດທາງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂັ້ນແຂວງ ປະຈຳປີ 2017 ພິຈາລະນາ ແລະຮັບຮອງເອົາບົດລາຍງານກ່ຽວກັບການກວດສອບ ບົດສະຫຼຸບຂາດໂຕການຈັດຕັ້ງປະຕິບັດແຜນງົບປະມານແຫ່ງລັດຂັ້ນແຂວງ ປະຈຳສົກປີ 2014-2015 ຂອງອົງການກວດສອບປະຈຳພາກ ພິຈາລະນາ ແລະຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວ 5 ປີ (2011-2015) ແລະ ແຜນການ 5 ປີ (2016-2020) ການຈັດຕັ້ງປະຕິບັດແຜນການເຄື່ອນໄຫວວຽກງານສົກປີ 2015-2016 ແລະ ທິດທາງແຜນການປີ 2017 ຂອງອົງການໄອຍະການປະຊາຊົນ ແລະ ສານປະຊາຊົນແຂວງ ພິຈາລະນາ ແລະຮັບຮອງເອົາບັນຫາສຳຄັນອື່ນໆທີ່ສຳຄັນຈຳນວນນຶ່ງຂອງແຂວງ.

     ໃນກອງປະຊຸມ ທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ ຍັງໄດ້ຂຶ້ນລາຍງານຜົນສຳເລັດການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນສົກປີ 2015-2016 ແລະ ທິດທາງແຜນການປະຈຳປີ 2017 ເຊິ່ງທ່ານໄດ້ຍົກໃຫ້ເຫັນຜົນງານດ້ານດີ ດ້ານອ່ອນ ຂໍ້ຄົງຄ້າງ ແລະ ສິ່ງທ້າທາຍຈຳນວນນຶ່ງ ເພື່ອໃຫ້ບັນດາສະມາຊິກສະພາປະຊາຊົນແຂວງໄດ້ປະກອບຄຳຄິດຄຳເຫັນ ແລະ ຊອກຫາວິທີການແກ້ໄຂໃນຕໍ່ໜ້າ.

ຂ່າວ/ພາບ: ສັນຍາ ແກ້ວໄຊຍະວົງ

Leave a Reply

Your email address will not be published. Required fields are marked *

*