ສະມາຄົມເຟີນິເຈີລາວ ໄຂງານວາງສະແດງ-ຈໍາໜ່າຍຜະລິດຕະພັນເຟີນິເຈີໄມ້ລາວ ຄັ້ງທີ 3 ປະຈໍາປີ 2017

ສະມາຄົມເຟີນິເຈີລາວ ໄຂງານວາງສະແດງ-ຈໍາໜ່າຍຜະລິດຕະພັນເຟີນິເຈີໄມ້ລາວ ຄັ້ງທີ 3 ປະຈໍາປີ 2017

Posted by

     ສະມາຄົມເຟີນິເຈີລາວ ຮ່ວມກັບ ກົມສົ່ງເສີມ ແລະພັດທະນາສິນຄ້າ ກະຊວງອຸດສາຫະກໍາ ແລະການຄ້າ ພ້ອມດ້ວຍ ສະພາການຄ້າ ແລະອຸດສາຫະກໍາແຫ່ງຊາດລາວ ໄດ້ຈັດງານວາງສະແດງ-ຂາຍຜະລິດຕະພັນເຟີນິເຈີຈາກໄມ້ລາວ ຄັ້ງທີ 3 ປະຈໍາປີ 2017 ເປັນເວລາ 9 ວັນ ເຊິ່ງເລີ່ມແຕ່ວັນທີ 07-15 ມັງກອນ 2017 ທີ່ສູນການຄ້າລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນ.

     ພິທີໄຂງານວາງສະແດງ-ຂາຍຜະລິດຕະພັນເຟີນິເຈີຈາກໄມ້ລາວ ຄັ້ງທີ 3 ໄດ້ຈັດຂຶ້ນໃນຕອນບ່າຍວັນທີ 09 ມັງກອນ 2017 ໂດຍການໃຫ້ກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກໍາ ແລະການຄ້າ ທ່ານ ຄໍາໄພ ສົມຊະນະ ປະທານສະມາຄົມເຟີນິເຈີລາວ ມີບັນດາທູຕານຸທູດ ອົງການຈັດຕັ້ງສາກົນ ປະຈໍາ ສປປ.ລາວ ບັນດາຜູ້ປະກອບການຫົວໜ່ວຍທຸລະກິດໄມ້ ບໍລິສັດ ຫ້າງຮ້ານທັງພາຍໃນ ແລະ ຕ່າງປະເທດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

     ທ່ານ ກອງມາລາ ພົມມາໄລ ຮອງປະທານສະມາຄົມເຟີນິເຈີລາວ ໃຫ້ຮູ້ວ່າ ງານວາງສະແດງຜະລິດຕະພັນເຟີນິເຈີຈາກໄມ້ລາວຄັ້ງນີ້ແມ່ນແນໃສ່ເປັນການອະນຸຮັກປ່າໄມ້ ການນໍາໃຊ້ໄມ້ໃຫ້ເກີດປະໂຫຽດສູງສຸດ ແລະ ມິີໄວ້ໃຊ້ຢ່າງຍືນຍົງ ໂດຍການປຸງແຕ່ງໃຫ້ເປັນຜະລິດຕະພັນສໍາເລັດຮູບຈາກໄມ້ ຫວາຍ ແລະ ໄມ້ປ່ອງໃຫ້ມີຫຼາກຫຼາຍຜະລິດຕະພັນຕາມຄວາມຕ້ອງການຂອງສັງຄົມໃນປັດຈຸບັນ ດ້ວຍການນໍາໃຊ້ເຕັກໂນໂລຊີທີ່ທັນສະໄໝ ທັງເປັນການສ້າງມູນຄ່າເພີ່ມໃຫ້ກັບຜະລິດຕະພັນເຟີນິເຈີໄມ້ລາວໃຫ້ກາຍເປັນສິນຄ້າຄຸນະພາບ ແລະ ມີລາຄາສູງ ພ້ອມນີ້ຍັງເປັນການສ້າງວຽກເຮັດງານທໍາໃຫ້ກັບປະຊາຊົນບັນດາເຜົ່າ ຕ້ານໄພວ່າງງານ ແລະ ຊ່ອຍໃຫ້ຫຼຸດພົ້ນອອກຈາກຄວາມທຸກຍາກ.

     ສໍາລັບງານວາງສະແດງ-ຂາຍຜະລິດຕະພັນເຟີນິເຈີໃນຄັ້ງນີ້ ມີບັນດາຫົວໜ່ວຍທຸລະກິດເຟີນິເຈີໄມ້ລາວເຂົ້າຮ່ວມວາງສະແດງ-ຂາຍທັງໝົດ 175 ຫ້ອງ ມາຈາກຕ່າງແຂວງ 31 ຫ້ອງ ໃນນັ້ນມາຈາກນະຄອນຫຼວງວຽງຈັນ 144 ຫ້ອງ ແລະ ຈາກ 10 ແຂວງທົ່ວປະເທດ ຄາດວ່າມີມູນຄ່າການຊື້-ຂາຍສິນຄ້າປະມານ 32 ຕື້ກີບ.

ຂ່າວ/ພາບ: ເທບພະວົງ

Leave a Reply

Your email address will not be published. Required fields are marked *

*