ສະເຫລີມສະຫລອງວັນ ຕ້ານການນຳໃຊ້ ແຮງງານເດັກສາກົນ

 

ຕອນເຊົ້າວັນທີ 12 ມີຖຸນາ 2013 ຢູ່ທີ່ສະໂມສອນມະຫາວິທະຍາໄລແຫ່ງຊາດ
ນະຄອນຫລວງວຽງຈັນ, ກະຊວງແຮງງານ ແລະ ສະຫວັດດີການ-ສັງຄົມ
ຮ່ວມກັບອົງການແຮງງານສາກົນປະຈຳລາວ ໄດ້ຈັດພິທີໂຮມຊຸມນຸມ
ສະເຫລີມສະຫລອງວັນຕ້ານການນຳໃຊ້ແຮງງານເດັກສາກົນ ຄົບຮອບ
14 ປີຂຶ້ນ ໂດຍການເຂົ້າຮ່ວມຂອງທ່ານນາງ ໃບຄຳ ຂັດທິຍະ
ລັດຖະມົນຕີຊ່ວຍວ່າການກະຊວງແຮງງານ ແລະ ສະຫວັດດີການ-ສັງຄົມ
ທ່ານນາງ ເຂັມພອນ ເຜົ່າຄຳແກ້ວ ຜູ້ປະສານງານຫ້ອງການ ອົງການ
ແຮງງານສາກົນ ປະຈຳ ສປປ.ລາວ ມີຜູ້ຕາງໜ້າອົງການຈັດຕັ້ງສາກົນ
ປະຈຳລາວ ອົງການຜູ້ໃຊ້ແຮງງານ ອົງການຜູ້ອອກແຮງງານ ແລະ
ອົງການຈັດຕັ້ງມະຫາຊົນ ຕະຫລອດຮອດຊາວໜຸ່ມເຍົາວະຊົນ ແລະ
ແຂກຖືກເຊີນເຂົ້າຮ່ວມ.

ພິທີສະເຫລີມສະຫລອງວັນຕ້ານການນຳໃຊ້ແຮງງານເດັກສາກົນ ຄົບຮອບ 14 ປີ
ທີ່ສະໂມສອນມະຫາວິທະຍາໄລແຫ່ງຊາດ

ທ່ານນາງ ໃບຄຳ ຂັດທິຍະ ໄດ້ກ່າວວ່າ: ການຈັດພິທີສະເຫລີມສະຫລອງ
ໃນຄັ້ງນີ້ ແມ່ນເພື່ອປຸກຈິດສຳນຶກ ຕ້ານການນຳໃຊ້ແຮງງານເດັກ ຊຶ່ງໃນ
ປັດຈຸບັນ ທົ່ວໂລກມີແຮງງານເດັກເຖິງ 115 ລ້ານຄົນ ທີ່ມີອາຍຸລະຫວ່າງ
5-17 ປີ ແມ່ນຍັງເຮັດວຽກໜັກ ແລະ ເປັນອັນຕະລາຍຕໍ່ສຸຂະພາບ
ໃນນີ້ ມີແຮງງານເດັກຍິງ 41 ລ້ານຄົນ, ສຳລັບ ສປປ.ລາວ ຂອງເຮົາ
ພັກ ແລະ ລັດຖະບານ ຍາມໃດກໍເຫັນໄດ້ຄວາມສຳຄັນ ເປັນຫ່ວງເປັນໄຍ
ເອົາໃຈໃສ່ຢ່າງຈິງຈັງໃນການພັດທະນາ ແລະ ປົກປ້ອງເດັກ ເພາະເດັກ
ເປັນຊັບພະຍາກອນອັນລໍ້າຄ່າຂອງຊາດ ເປັນຜູ້ສືບທອດພາລະກິດໃນການ
ສ້າງສາ ພັດທະນາປະເທດຊາດ ແລະ ເປັນຜູ້ກຳນົດຊະຕາກຳຂອງຊາດ
ໃນອະນາຄົດ ຜ່ານມາລັດຖະບານໄດ້ໃຫ້ສັດຕະຍາບັນຕໍ່ສົນທິສັນຍາສາກົນ
ຫລາຍສະບັບ ພ້ອມທັງໄດ້ສ້າງນິຕິກຳ ເພື່ອປົກປ້ອງສິດ ຜົນປະໂຫຍດ
ອັນຊອບທຳຂອງເດັກ ແລະ ແມ່ຍິງຕະຫລອດມາ ປັດຈຸບັນ ຢູ່ໃນຂັ້ນຕອນ
ຂອງການຮ່າງແຜນງານແຫ່ງຊາດ ເພື່ອລຶບລ້າງການນຳໃຊ້ແຮງງານເດັກ.

ພິທີສະເຫລີມສະຫລອງວັນຕ້ານການນຳໃຊ້ແຮງງານເດັກສາກົນ ຄົບຮອບ 14 ປີ
ທີ່ສະໂມສອນມະຫາວິທະຍາໄລແຫ່ງຊາດ

ຂ່າວ/ພາບ: ເທພະວົງສອນ

 
 
 

0 Comments

You can be the first one to leave a comment.

 
 

Leave a Comment