ສູນກາງແນວລາງສ້າງຊາດ ແລະ ອົງການພຸດທະສາສະໜາສຳພັນລາວ ສືບຕໍ່ກິດຈະກຳຊ່ອຍເຫຼືອສັງຄົມ

ສູນກາງແນວລາງສ້າງຊາດ ແລະ ອົງການພຸດທະສາສະໜາສຳພັນລາວ ສືບຕໍ່ກິດຈະກຳຊ່ອຍເຫຼືອສັງຄົມ

Posted by

      ເມື່ອວັນທີ 02 ສິງຫາ 2017 ຜ່ານມາ ຍາທ່ານໃຫຍ່ ມະຫາເວດ ມະເສໄນ ຮອງປະທານສູນກາງ ອົງການພຸດທະສາສະໜາສຳພັນລາວ (ອພສ) ແລະ ພະອາຈານ ພົງສະຫວັນ ອານຸສິນ ກຳມະການສູນກາງອົງການພຸດທະສາສະໜາສຳພັນລາວ ຄະນະກຳມາທິການສາທາລະນຸປະການ ຫົວໜ້າໜ່ວຍງານສັງຄົມສົງເຄາະ ທັງເປັນປະທານມູນນິທິຊ່ອຍເຫຼືອຄົນທຸກຍາກ ສາຂານະຄອນຫຼວງວຽງຈັນ ແລະ ທ່ານ ດຣ ນາງ ວິພາວັນ ພົມວິຫານ ພ້ອມດ້ວຍຄະນະ ໄດ້ນຳເອົາຈັດຕຸປັດໄຈ ແລະ ຄວາມຢ້ຽມຢາມຖາມຂ່າວໄປສູ່ພີ່ນ້ອງຊາວແຂວງສະກົນນະຄອນ ປະເທດໄທ ທີ່ປະສົບໄພນ້ຳຖ້ວມ.

      ການເດີນທາງໄປໃນຄັ້ງນີ້ ແມ່ນໄດ້ນຳເອົານ້ຳດື່ມແມັກເນຕິກ ກາຫົວໃຈ ຈຳນວນ 10.000 ຕຸກ ເຊິ່ງເປັນນ້ຳໃຈຂອງສູນກາງແນວລາງສ້າງຊາດ (ສນຊ) ແລະ ອົງການພຸດທະສາສະໜາສຳພັນລາວ (ອພສ) ແລະ ນ້ຳໃຈຈາກທີມງາມມູນນິທິຊ່ອຍເຫຼືອຄົນທຸກຍາກສາຂາ ນະຄອນຫຼວງວຽງຈັນ ຮວມທັງປະຊາຊົນລາວບັນດາເຜົ່າ ເພື່ອຢື້ຢາມຖາມຂ່າວ ແລະ ບິແບ່ງ ບັນເທົາທຸກຈາກເຫດການອຸທົກກະໄພໃນຄັ້ງນີ້.

      ກ່ອນໜ້ານີ້ (ວັນທີ 31 ກໍລະກົດ 2017) ທາງຮ້ານບັນນີ ຄາເຟ ແລະ ຮ້ານດິບ ໂມດິຟາຍ ກໍໄດ້ປະກອບສ່ວນສຳຄັນໃນວຽກງານຊ່ອຍເຫຼືອສັງຄົມ ໂດຍການລະດົມຂອງ ພະອາຈານ ພົງສະຫວັນ ອານຸສິນ ເຊິ່ງຕອບສະໜອງຕາມການສະເໜີຂອງ ສນຊ ໃນໂອກາດທີ່ທ່ານ ຈັນທະວົງ ແສນອາມາດມົນຕີ ຮອງປະທານ ສນຊ ໄດ້ເດີນທາງໄປເຮັດວຽກ ແລະ ຢ້ຽມຢາມຜູ້ຊົງຄຸນວຸດທິ ແລະ ຜູ້ອາວຸໂສຢູ່ແຂວງຫົວພັນ ທັງນີ້ ທ່ານ ນາງ ພອນວິໄລ ແສນປະເສີດ ກໍໄດ້ຕາງໜ້າ ໃຫ້ທ່ານ ບຸນທະວີສຸກ ແສນປະເສີດ (ລູກຊາຍ) ເຈົ້າຂອງຮ້ານບັນນີ ຄາເຟ ແລະ ຮ້ານດິບ ໂມດິຟາຍ ໃນການນຳເອົາຜ້າຫົ່ມໃໝ່ຈຳນວນ 100 ຜືນ ແລະ ເສື້ອກັນໜາວໃໝ່ຈຳນວນ 50 ຜືນ ພ້ອມດ້ວຍເຄື່ອງນຸ່ມຫົ່ມ ຈຳນວນ 20 ກະສອບ ຮວມມູນຄ່າ 10.250.000 ກີບ ມາມອບໃຫ້ ສນຊ ເພື່ອນຳໄປມອບຕໍ່ໃຫ້ຜູ້ອາວຸໂສຢູ່ແຂວງຫົວພັນ.

ຂ່າວ: ສຸກໃຈ

Leave a Reply

Your email address will not be published. Required fields are marked *

*