ສູນກາງ ຊາວໜຸ່ມ ປະຊາຊົນ ປະຕິວັດລາວ ຈັດກິດຈະກຳບໍລິຈາກເລືອດເພື່ອຊ່ອຍເລືອສັງຄົມ

ສູນກາງ ຊາວໜຸ່ມ ປະຊາຊົນ ປະຕິວັດລາວ ຈັດກິດຈະກຳບໍລິຈາກເລືອດເພື່ອຊ່ອຍເລືອສັງຄົມ

Posted by

      ຂະບວນການບໍລິຈາກເລືອດເພື່ອສະເຫຼີມສະຫຼອງວັນອາສາສະໝັກສາກົນ ປະຈຳປີ 2017 ໄດ້ຈັດຂຶ້ນເມື່ອວັນທີ 15 ທັນວາ 2017 ຜ່ານມາທີ່ສູນກາງຊາວໜຸ່ມ ປະຊາຊົນ ປະຕິວັດລາວ (ຊປປລ) ເຊິ່ງເປັນການຮ່ວມມືລະຫວ່າງອົງການກາແດງລາວ ແລະ ອົງການສະຫະປະຊາຊາດປະຈຳລາວ ເພື່ອປຸກລະດົມການບໍລິຈາກເລືອດຊ່ອຍເຫຼືອສັງຄົມ ໂດຍການເປັນປະທານຮ່ວມຂອງ ທ່ານ ນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ ທ່ານ ນາງ ກາລິນາ ອິມໂມເນັນ ຜູ້ປະສານງານອົງການສະຫະປະຊາຊາດ ປະຈຳລາວ ທ່ານ ຮສ ດຣ ສິງ ເມໂນລາດ ຮອງປະທານອົງການກາແດງລາວ ພ້ອມດ້ວຍບັນດາອາສາສະໝັກບໍລິຈາກເລືອດຈາກ 47 ພາກສ່ວນ.

      ຮອງເລຂາຄະນະບໍລິຫານງານສູນກາງ ຊປປລ ໄດ້ກ່າວວ່າ ເລືອດແມ່ນອົງປະກອບສຳຄັນທີ່ບໍ່ມີສິ່ງໃດມາທົດແທນໄດ້ ແລະ ມີຄວາມຈຳເປັນທີ່ສຸດຕໍ່ຊີວິດຂອງມະນຸດເຮົາ ປັດຈຸບັນຍັງມີຫຼາຍໆຊີວິດຢູ່ໃນໂລກ ແລະ ຢູ່ໃນປະເທດລາວເຮົາທີ່ອາໄສການໃສ່ເລືອດເພື່ອຄວາມຢູ່ລອດ ດັ່ງນັ້ນ ນະໂຍບາຍຂອງລັດຖະບານ ແຫ່ງ ສປປ ລາວ ຕໍ່ກັບການບໍລິຈາກເລືອດ ຈິ່ງເນັ້ນໃສ່ການປຸກລະດົມການບໍລິຈາກເລືອດແບບສະໝັກໃຈ ບໍ່ຮຽກຮ້ອງສິ່ງຕອບແທນ ແລະ ໃນໄລຍະຜ່ານມາ ສູນກາງຊາວໜຸ່ມກໍໄດ້ຈັດຂະບວນການບໍລິຈາກເລືອດພາຍໃຕ້ຄຳຂວັນ “ເລືອດໜຶ່ງຢົດເພື່ອອະນາຄົດຂອງຊາດ” ຫຼ້າສຸດ ກໍໄດ້ສືບຕໍ່ຮ່ວມກັບສູນກາງແນວລາວສ້າງຊາດ ອົງການກາແດງລາວ ພາຍໃຕ້ຄຳຂວັນ “ຮ່ວມໃຈບໍລິຈາກເລືອດແມ່ນຮັກຊາດ ແລະ ພັດທະນາ” ຕິດພັນກັບການສະເຫຼີມສະຫຼອງວັນອາສາສະໝັກສາກົນໃນທຸກປີໂດຍຮ່ວມກັບອົງການສະຫະປະຊາຊາດ.

      ກິດຈະກຳຄັ້ງນີ້ມີຜູ້ເຂົ້າຮ່ວມທັງໝົດປະມານ 8.322 ຄົນ ມີຜູ້ບໍລິຈາກເລືອດໄດ້ 1.512 ຄົນຕໍ່ຖົງ ຍິງ 617 ຄົນ ກວດເລືອດບໍ່ຜ່ານ 742 ຄົນ ເຊິ່ງອີງຕາມຂໍ້ມູນຂອງສູນເລືອດແຫ່ງຊາດໃນແຕ່ລະປີ ການບໍລິຈາກເລືອດສ່ວນຫຼາຍແມ່ນຊາວໜຸ່ມ-ໄວໜຸ່ມ ກວມເອົາ 80% ຂອງຈຳນວນຜູ້ບໍລິຈາກທັງໝົດ ໃນນີ້ ຫຼາຍສະຫາຍກໍໄດ້ຮັບການຍ້ອງຍໍຊົມເຊີຍຈາກພັກ-ລັດຖະບານ ແລະ ອົງການຈັດຕັ້ງຂັ້ນຕ່າງໆ.

ຂ່າວ: ໄຊມຸງຄຸນ

Leave a Reply

Your email address will not be published. Required fields are marked *

*