ສົກປີ 2015 ນີ້ ນະຄອນຫຼວງວຽງຈັນ ຈະເຮັດຫຍັງແດ່!

ສົກປີ 2015 ນີ້ ນະຄອນຫຼວງວຽງຈັນ ຈະເຮັດຫຍັງແດ່!

Posted by

ໃນປີ 2015 ນີ້ ນະຄອນຫຼວງວຽງຈັນ ໄດ້ວາງທິດທາງແຜນການໃນການພັດທະນາ ນະຄອນຫຼວງວຽງຈັນ ເຊິ່ງໃນນັ້ນ
ຈະສຸມໃສ່ຫຼາຍວຽກງານທີ່ສຳຄັນເປັນຕົ້ນ ແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໂດຍຈະສ້າງ
ໃຫ້ເປັນນະຄອນທີ່ໜ້າຢູ່ ພ້ອມທັງໃຫ້ບັນລຸການຈັດເກັບລາຍຮັບ ແລະ ຊຳລະໜີ້ສິນຄຸມເຄືອ ຄືທີ່ຮູ້ວ່າ ໃນປີ 2015 ນີ້
ຈະມີຫຼາຍເຫດການທີ່ສຳຄັນເກີດຂຶ້ນຄື ການສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ
ວັນຊາດຄົບຮອບ 40 ປີ ແລະ ກອງປະຊຸມໃຫ່ຍອົງຄະນະພັກນະຄອນຫຼວງວຽງຈັນ ຄັ້ງທີ VI ໃນສະພາບ ແລະ ເງື່ອນໄຂ
ດັ່ງກ່າວ ນະຄອນຫຼວງວຽງຈັນ ຈະໄດ້ສຸມໃສ່ຫຼາຍວຽກທີ່ສຳຄັນຕົ້ນຕໍຄື:
– ບັນຫາສຳຄັນແມ່ນການກະກຽມ ແລະ ດຳເນີນກອງປະຊຸມໃຫ່ຍ ຄັ້ງທີ VI ຂອງອົງຄະນະພັກໃຫ້ສຳເລັດ.
– ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເຮັດໃຫ້ເສດຖະກິດຂະຫຽາຍໂຕຢ່າງຕໍ່ເນື່ອງ ຮວມຍອດ
ຜະລິດຕະພັນພາຍໃນເພີ່ມຂຶ້ນ ບໍ່ໃຫ້ຫຼຸດ 12,8% ຄາດຄະເນ GDP ໃຫ້ໄດ້ໃນລະດັບ 35.400 ຕື້ກີບ ສະເຫລ່ຍຕໍ່ຫົວຄົນ
4.390 ໂດລາ ຢາກໄດ້ແນວນັ້ນ ຕ້ອງລະດົມການລົງທຶນເຂົ້າໃນການພັດທະນາເສດຖະກິດ-ສັງຄົມ ຂັ້ນນະຄອນຫຼວງ
14.700 ຕື້ກີບ ເພີ່ມຂຶ້ນຈາກປີຜ່ານມາ 18% ພ້ອມນີ້ ກໍຕ້ອງຕັດສິນໃຈປະຕິບັດຄາດໝາຍ ຈັດເກັບລາຍຮັບຂອງ
ນະຄອນຫຼວງວຽງຈັນໃຫ້ໄດ້ 876.29 ຕື້ກີບ ແລະ ປະຕິບັດແຜນລາຍຈ່າຍ 613.75 ຕື້ກີບ ທຽບໃສ່ປີຜ່ານມາເພີ່ມຂຶ້ນ
29% ຈັດຕັ້ງປະຕິບັດໂຄງການລົງທຶນຂອງລັດ 143 ໂຄງການ ມູນຄ່າເກືອບ 59 ຕື້ກີບ ແລະ ຊຳລະໜີ້ຫຼາຍກ່ວາ
60 ຕື້ກີບ ໃນສົກປີ 2014-2015 ຄາດໝາຍຈັດເກັບລາຍຮັບໃຫ້ບັນລຸ 1.009,68 ຕື້ກີບ ທຽບໃສ່ແຜນຄາດໝາຍຂອງ
ສົກປີຜ່ານມາເພີ່ມຂຶ້ນ 15,23%.
– ໜ້າທີ່ສຳຄັນອີກຢ່າງນຶ່ງ ແມ່ນການຍູ້ແຮງພາລະກິດການພັດທະນາ ແລະ ຄຸ້ມຄອງໂຕເມືອງ ໃນນັ້ນ ສ້າງໃຫ້ເປັນ
ນະຄອນທີ່ໜ້າຢູ່ ແລະ ໝັ້ນຄົງ ເປັນໃຈກາງດ້ານການເມືອງ ເສດຖະກິດ ວັດທະນະທຳ ການສຶກສາ ແລະ ສູນກາງ
ພົວພັນສາກົນຂອງປະເທດ ສຳລັບການພັດທະນາໂຕເມືອງວຽງຈັນໃນຕໍ່ໜ້າ ແມ່ນສຸມໃສ່ປະຕິບັດໄປຕາມຜັງຮວມ
ແຜນຜັງທີ່ກຳນົດບົນພື້ນຖານວິທະຍາສາດ ຕ້ອງຖືເອົາສິ່ງແວດລ້ອມເປັນກົກ ແລະ ເປັນຈຸດເລີ່ມ ການປຸກສ້າງເຮືອນຊານ
ຂອງປະຊາຊົນຕ້ອງເປັນລະບົບ ບໍ່ລະເມີດກົດໝາຍບ້ານເມືອງແລະເຂດດິນສະຫງວນ ລະຫວ່າງການພັດທະນາຕ້ອງຕິດພັນ
ກັບການຮັກສາສິ່ງແວດລ້ອມ ເອົາໃຈໃສ່ເປັນພິເສດຄຸ້ມຄອງບຶງທາດຫຼວງ ພູພະນັງ ພູເຂົາຄວາຍ ນ້ຳຂອງ ນ້ຳງື່ມ ຄຸ້ມຄອງ
ດິນກະສິກຳໃນເຂດຊົນລະປະທານທັງໝົດ ຫ້ວຍ ຮ່ອງ ໜອງນ້ຳຕ່າງໆໃຫ້ດີ.
– ຈັດສັນຄວາມເປັນລະບຽບຮຽບຮ້ອຍໃນໂຕເມືອງ ການຮັກສາຄວາມສະອາດ ຕໍ່ໄປຈະໄດ້ປະຕິບັດຕາມຫຼັກການ ຜູ້ໃດຖິ້ມ
ສິ່ງເສດເຫຼືອຫຼາຍແມ່ນຜູ້ນັ້ນຕ້ອງຕ້ອງຈ່າຍ ແລະ ຈ່າຍເທົ່າກັບມູນຄ່າການສ້າງສິ່ງເສດເຫຼືອຂຶ້ນມາ.
– ຖືສຳຄັນຍິ່ງການພັດທະນາ ແລະ ຄຸ້ມຄອງຜັງເມືອງ ທຸກເມືອງໃນນະຄອນຫຼວງ ຕ້ອງຈັດສັນ ແລະ ກຳນົດເຂດນຳໃຊ້
ທີ່ດິນ.
– ໜ້າທີ່ສຳຄັນອີກສິ່ງນຶ່ງ ແມ່ນການປົກປັກຮັກສານະຄອນຫຼວງວຽງຈັນ ໃຫ້ມີຄວາມສະຫງົບ ເປັນລະບຽບຮຽບຮ້ອຍ ແກ້ໄຂ
ປາກົດການຫຍໍ້ທໍ້ທີ່ພົ້ນເດັ່ນ ເປັນຕົ້ນຄົນຕິດຢາເສບຕິດໃຫ້ຫຼຸດລົງ 50% ລະງັບການຂີ້ລັກ ປຸ້ນຈີ້ ແລະ ອຸປະຕິເຫດໃຫ້ຕໍ່າລົງ.

……..ນອກຈາກນັ້ນແລ້ວ ນະຄອນຫຼວງ ຍັງມີໜ້າທີ່ສຳຄັນ ປະກອບສ່ວນເຂົ້າໃນການສະເຫຼີມສະຫຼອງວັນບຸນສຳຄັນ
ຂອງພັກ ຂອງຊາດ ໃນປີ 2015 ຮວມທັງການເຂົ້າເປັນສະມາຊິກປະຊາຄົມເສດຖະກິດອາຊຽນໃນປີ 2015 ແລະ ການເປັນ
ເຈົ້າພາບກອງປະຊຸມສຸດຍອດອາຊຽນ ຄັ້ງທີ 16 ໃນປີ 2016 ດັ່ງນັ້ນ ໜ້າທີ່ຮວມສຳຄັນຂອງ ນະຄອນຫຼວງວຽງຈັນ ແມ່ນ
ປັບປຸງ ບູລະນະໂສມໜ້າໂຕເມືອງ ຈັດສັນຄວາມເປັນລະບຽບຮຽບຮ້ອຍໃນໂຕເມືອງ ການຮັກສາອະນາໄມຄວາມສະອາດ
ເພື່ອສູ້ຊົນສ້າງນະຄອນຫຼວງຂອງພວກເຮົາ ໃຫ້ເປັນນະຄອນຫຼວງທີ່ໜ້າຢູ່ ມີສະເໜ່ ແລະ ມີການພັດທະນາ.

ໂດຍ: ວັນຄຳ

Leave a Reply

Your email address will not be published. Required fields are marked *

*