ຫັດຖະກຳຕໍ່າແຜ່ນແພເຜົ່າແງະ ເຜີຍແຜ່ເອກະລັກທີ່ຊົງຄຸນຄ່າ

ຫັດຖະກຳຕໍ່າແຜ່ນແພເຜົ່າແງະ ເຜີຍແຜ່ເອກະລັກທີ່ຊົງຄຸນຄ່າ

Posted by

      ແຜ່ນແພທີ່ຕ່ຳດ້ວຍສີມືຂອງເອື້ອຍນ້ອງແມ່ຍິງຊົນເຜົ່າແງະ ບ້ານໃໝ່ຫົວເມືອງ ເມືອງລະມາມ ແຂວງເຊກອງ ໄດ້ສ່ອງແສງວິຖີຊີວິດຊອງຊຸມຊົນ ຜົນງານທີ່ໂດດເດັ່ນກໍແມ່ນແພແຂວນຝາສຳລັບຕົບແຕ່ງພາຍໃນ ທີ່ມີການອະທິບາຍເລື່ອງລາວດ້ວຍລວດລາຍຜ່ານເສັ້ນຝ້າຍຍ້ອມສີທຳມະຊາດ ເຊິ່ງເປັນນຶ່ງໃນພູມປັນຍາຊາວບ້ານໂດຍນາງ ເພັດ ນອງລາວ ໄດ້ສືບສານງານຫັດຖະກຳຕ່ຳຫູກເຜົ່າແງະເປັນສິນຄ້າ ຈິ່ງຖືເປັນການປະກອບສ່ວນໃນວຽກງານແກ້ໄຂ ແລະ ລຶບລ້າງຄວາມທຸກຍາກ ເນື່ອງຈາກມີລາຍຮັບທີ່ໄດ້ນຳຜະລິດຕະພັນຈາກກີ່ຕ່ຳຫູກຂອງຕົນເອງ.

      ນາງ ເພັດ ນອງລາວ ໄດ້ໃຫ້ສຳພາດຕໍ່ທີມຂ່າວວິທະຍຸນະຄອນຫຼວງວຽງຈັນ ໃນໂອກາດມາຮ່ວມງານວາງສະແດງສິນຄ້າລາວ-ຫວຽດນາມ ໃນລະຫວ່າງຕົ້ນເດືອນກໍລະກົດນີ້ວ່າ “ໂດຍສືບທອດພູມປັນຍາຈາກແມ່ ເຊິ່ງຕົນເອງໄດ້ຮຽນຕ່ຳຫູກ ປູກຝ້າຍ ແລະ ຍ້ອມສີທຳມະຊາດມາແຕ່ນ້ອຍ ເມື່ອສ້າງຄອບຄົວແລ້ວກໍໄດ້ຮັບການສະໜັບສະໜູນຈາກສາມີທີ່ເຫັນຄວາມສຳຄັນຂອງການຜະລິດເປັນສິນຄ້າ ດັ່ງນັ້ນ ຈິ່ງໄດ້ຫັນມາເຮັດງານຫັດຖະກຳເປັນອາຊີບຫຼັກນັບແຕ່ປີ 2012 ເປັນຕົ້ນມາ”.

      ຂະນະທີ່ທ່ານ ຄຳໄຫຼ ນອງລາວ ກໍໄດ້ກ່າວວ່າ “ການພັດທະນາສີມື ຄືຫົວໃຈສຳຄັນຂອງການສ້າງຜະລິດຕະພັນຕ່ຳຜ້າເຜົ່າແງະ ເຊິ່ງໃນໄລຍະຜ່ານມາ ອົງການໄຈກາ ໄດ້ຊຸກຍູ້ໃຫ້ຊຸມຊົນບ້ານໃໝ່ຫົວເມືອງ ຮວມມີຄອບຄົວຂອງຕົນເອງກໍໄດ້ເຂົ້າຮ່ວມການເຝິກອົບຮົມຢູ່ແຂວງສະຫວັນນະເຂດ ເມື່ອປີ 2013 ໂດຍແມ່ນອາຈານຄົນລາວເປັນຜູ້ສິດສອນໂຕຈິງ ຈິ່ງໄດ້ນຳເອົາບົດຮຽນມາພັດທະນາຜະລິດຕະພັນໃຫ້ມີຄວາມຫຼາກຫຼາຍ ບໍ່ວ່າຈະເປັນຖົງພາຍ ແພແຂວນຕົບແຕ່ງພາຍໃນ ແພປູໂຕະ ແພຕັດເສື້ອ ສິ້ນເຜົ່າແງະ ແພບ່ຽງ ແພຕູ້ມ ແຜ່ນຮອງຈອກ-ຮອງຈານ ຊົບໝອນ ຜ້າກະຕ່ຽວ ຜ້າຮຽງ ແລະອື່ນໆ ເຊິ່ງມີລາຄາແຕ່ 10.000 ກີບຂຶ້ນໄປ ແລະ ສາມາດສ້າງລາຍໄດ້ໃຫ້ຄອບຫຼາຍລ້ານກີບຕໍ່ເດືອນ”.

      ສິນຄ້າປະເພດຫັດຖະກຳເຜົ່າແງະຂອງທ່ານ ຄຳໄຫຼ ແລະ ນາງ ເພັດ ນອງລາວ ມີລູກຄ້າປະຈຳຢູ່ແຂວງຫຼວງພະບາງ ແລະ ອີກຫຼາຍໆຮ້ານໃນນະຄອນຫຼວງວຽງຈັນ ເຊິ່ງຄູ່ຮ່ວມທຸລະກິດໃຫ້ຮູ້ວ່າ ບັນດາຜະລິດຕະພັນຖືກສົ່ງອອກໄປຕ່າງປະເທດຫຼາຍລາຍການ ທັງນີ້ ກໍຍ້ອນຮູບແບບການຕ່ຳທີ່ເນັ້ນນຳສະເໜີວິຖິຊີວິດຊົນເຜົ່າແງະໃນ ສປປ ລາວ ທີ່ເປັນເອກະລັກສະເພາະ ແລະ ມີຄວາມປອດໄພ ເພາະບໍ່ນຳໃຊ້ສີເຄມີຍ້ອມຝ້າຍ.

      ດ້ວຍຄວາມພະຍາຍາມພັດທະນາຄຸນະພາບຜະລິດຕະພັນໃຫ້ທັນກັບຄວາມຕ້ອງການຂອງຕະຫຼາດ ຜ່ານການສະໜັບສະໜູນໂດຍພາກລັດທີ່ຈັດໃຫ້ມີງານວາງສະແດງ-ຂາຍສິນຄ້າຢູ່ນະຄອນຫຼວງວຽງຈັນ ຢູ່ຫຼວງພະບາງ ແລະຢູ່ແຂວງອື່ນໆ ຮວມທັງໄດ້ຮັບໂອກາດໄປວາງສະແດງຢູ່ຕ່າງປະເທດ ຈິ່ງເຮັດໃຫ້ຜະລິດຕະພັນຜ້າຝ້າຍເຜົ່າແງະ ຂອງຄອບຄົວນອງລາວ ເປັນທີ່ຮູ້ຈັກຢ່າງກວ້າງຂວາງ ທັງນີ້ ຖືເປັນຄວາມພາກພູມໃຈຂອງຊາວຊ່າງຫັດຖະກຳຢູ່ຊຸມຊົນທ້ອງຖິ່ນທີ່ສາມາດເອກອ້າງຫົວຄິດປະດິດສ້າງ ແລະ ສີໄມ້ລາຍມືອັນເປັນຍອດຍິ່ງແຫ່ງພູມປັນຍາລາວ ໃຫ້ຊາວໂລກໄດ້ຮັບຮູ້.

ຂ່າວ: ສົມຈັນ ບົວພາ

Leave a Reply

Your email address will not be published. Required fields are marked *

*