ຫຼວງ​ນ້ຳ​ທາ​ ຮ່ວມອະນຸຮັກ ແລະ ພັດທະນາ​ຊີວະ​ນານາ​ພັນໃຫ້​ເປັນ​ສິນຄ້າແບບ​​ຍືນ​ຍົງ

ຫຼວງ​ນ້ຳ​ທາ​ ຮ່ວມອະນຸຮັກ ແລະ ພັດທະນາ​ຊີວະ​ນານາ​ພັນໃຫ້​ເປັນ​ສິນຄ້າແບບ​​ຍືນ​ຍົງ

Posted by

      ສືບເນື່ອງມາຈາກເຄື່ອງປ່າຂອງດົງຢູ່ປະເທດເຮົາຍັງມີຄວາມອຸດົມສົມບູນ ທີ່ສາມາດສ້າງປະໂຫຍດແກ່ປະຊາຊົນ ແລະ ປະເທດຊາດໄດ້ຢ່າງຫຼວງຫຼາຍ ຂະນະດຽວກັນກໍຕ້ອງມີການອະນຸຮັກສິ່ງທີ່ມີຢູ່ໄວ້ນໍາໃຊ້ໄດ້ຢ່າງຍາວນານ ດ້ວຍວິໄສທັດດັ່ງກ່າວ ແຂວງຫຼວງນ໊ຳທາ ຈິ່ງໄດ້ໄຂໂຄງການຊີວະນານາພັນໃຫ້ເປັນສິນຄ້າແບບຍືນຍົງ (BBP) ໂດຍຫວັງວ່າໂຄງການນີ້ຈະກາຍເປັນເວທີແຫ່ງການຮຽນຮູ້ ແລະ ເຜີຍແຜ່ໃຫ້ປະຊາຊົນມີຄວາມຮັກພືດພັນທຳມະຊາດຫຼາຍຂຶ້ນ.

​      ພິທີໄຂໂຄງການ​ພັດທະນາ​ຊີວະ​ນາໆ​ພັນ​ໃຫ້​ກາຍ​ເປັນ​ສິນຄ້າ​ແບບ​ຍືນ​ຍົງ ໄດ້ຈັດຂຶ້ນໃນຕອນ​ເຊົ້າ​ວັນ​ທີ 04 ​ເມສາ 2017 ຢູ່​ໂຮງຮຽນທິດ​ສະ​ດີ​ການ​ເມືອງ​ການ​ປົກຄອງ​ແຂວງ​ຫຼວງ​ນ້ຳ​ທາ​ ໂດຍ​ການ​ເປັນ​ປະທານ​ຂອງ​ທ່ານ ທວງ ນາມ​ວົງສາ ຮອງ​ຫົວໜ້າ​ພະ​ແນ​ກກະສິກຳ ​ແລະປ່າ​ໄມ້​ແຂວງ​ຫຼວງ​ນ້ຳ​ທາ ມີທ່ານ ທອງ​ໄຊ ອາດ​ຜາ​ສຸກ ຮອງ​ເຈົ້າ​ເມືອງ​ໆຫຼວງນ້ຳ​ທາ ທ່ານ ດິກ​ກີ ຊີມ​ໂມ​ລັງ​ກີ ຫົວໜ້າ​ໂຄງການ GIZBBP ພ້ອມພາກສ່ວນກ່ຽວຂ້ອງ ແລະ 4 ບ້ານ​ເປົ້າ​ໝາຍ​ຄື ບ້ານ​ສົບຊິ​ມ ສິນ​ອຸດົມ ຫາດ​ຍອງ ແລະ ບ້ານ​ຫາດ​ນາ​ແລ້ງ ​ເຂົ້າ​ຮ່ວມ.

      ​ໂຄງການພັດທະນາ​ຊີວະ​ນາໆ​ພັນ​ໃຫ້​ກາຍ​ເປັນ​ສິນຄ້າ​ແບບ​ຍືນ​ຍົງ ແນໃສ່ສົ່ງເສີມຫັດຖະກໍາຈັກສານ ແລະ ເຟີນີເຈີໄມ້ປ່ອງ ໃຫ້ເປັນໂຕແບບໃນການສ້າງລະບົບຕະຫຼາດ ເຊິ່ງມີແບບແຜນການຜະລິດ ແລະ ສ້າງລະບົບຂໍ້ມູນຂ່າວສານຂັ້ນບ້ານ ເພື່ອຍົກລະດັບໄມ້ປ່ອງໃຫ້ກາຍມາເປັນສິນຄ້າໂອດ໊ອບຂອງເມືອງ ​ແລະ ​ແຂວງ ພ້ອມນີ້ ກໍມີການເຝິກອົບຮົມເພື່ອສ້າງຄວາມອາດສາມາດໃນການອອກແບບຜະລິດຕະພັນໃໝ່ ແລະ ເຕັກນິກໃນການຜະລິດ ຄຽງຄູ່ກັບການຫຼຸດຜ່ອນການບຸກລຸກປ່າສະຫງວນ ແລະ ສ້າງໃຫ້ປະຊາຊົນກາຍມາເປັນຜູ້ປະກອບການຂັ້ນທ້ອງຖິ່ນ ເພື່ອສົ່ງເສີມການເພີ່ມມູນຄ່າຕາມກົນໄກການຕະຫຼາດເຊິ່ງຈະຈັດຕັ້ງປະຕິບັດຢູ່ພາຍໃນ 4 ບ້ານເປົ້າໝາຍຂອງໂຄງການໃນຂອບເຂດປ່າປ້ອງກັນຂອງປ່າສະຫງວນນໍ້າຫ້າ ແລະ ພັດທະນາລະບົບການແລກປ່ຽນຂໍ້ມູນຂ່າວສານທີ່ແທດເໝາະກັບຄວາມຮູ້ຄວາມສາມາດຂອງຊາວບ້ານ ເຝິກອົບຮົມສ້າງຄວາມອາດສາມາດໃຫ້ແກ່ຜູ້ຜະລິດ ເພື່ອໃຫ້ແທດເໝາະກັບຄວາມຕ້ອງການຂອງຜູ້ບໍລິໂພກທັງພາຍໃນ ແລະ ຕ່າງປະເທດ.

      ແຜນການແມ່ນຈະສ້າງຈຸດຈຳໜ່າຍຜະລິດຕະພັນຂັ້ນບ້ານ ຂັ້ນເມືອງ ແລະ ແຂວງ ພ້ອມສົ່ງເສີມຕະຫຼາດນັດຫັດຖະກຳ ແລະ ການວາງສະແດງສິນຄ້າຂັ້ນບ້ານ ຂັ້ນເມືອງ ແຂວງ ແລະ ເຂົ້າຮ່ວມງານວາງສະແດງຕະຫຼາດນັດຫັດຖະກຳ ຢູ່ນະຄອນຫຼວງວຽງຈັນ ພ້ອມກັນນັ້ນກໍຈະສຶກສາຄວາມຕ້ອງການຜະລິດຕະພັນໄມ້ປ່ອງຢູ່ ສປ.ຈີນ ພ້ອມທັງຈະສົ່ງເສີມ ແລະ ດຶງດູດນັກລົງທຶນຈີນເຂົ້າມາລົງທຶນພັດທະນາຜະລິດຕະພັນໄມ້ປ່ອງ ແລະ ຈະພັດທະນາສະຫຼາກສິນຄ້າ ຫຼື ກາໝາຍເພື່ອສົ່ງເສີມການຂາຍ ພ້ອມຊຸກຍູ້ໃຫ້ປະຊາຊົນເຂົ້າໃຈຕໍ່ແນວທາງນະໂຍບາຍຂອງພັກ-ລັດຖະບານ ກ່ຽວກັບການປົກປັກຮັກສາປ່າໄມ້ ແລະ ຊີວະນາໆພັນໃນເຂດປ່າສະຫງວນແຫ່ງຊາດນໍ້າຫ້າ ສ້າງລະບຽບຄຸ້ມຄອງພ້ອມທັງເຜີຍແຜ່ໃຫ້ປະຊາຊົນໄດ້ຮັບຊາບທົ່ວເຖິງກັນກ່ຽວກັບການອະນຸຮັກຊັບພະຍາກອນປ່າໄມ້ທີ່ມີຢູ່ຢ່າງຈຳກັດ ເພື່ອໃຫ້ນຳໃຊ້ໄດ້ຢ່າງຍືນຍົງ.

ຂ່າວ:  ກິ່ນ​ນາ​ລົມ ​ແອ່ນ​ຖ່າຍ​ໄທ

Leave a Reply

Your email address will not be published. Required fields are marked *

*