ອຸ່ນ​ເຮືອນ ທຳ​ມະ​ວົງ ຄອບຄົວໂ​ຕ​ແບບ​ເມືອງ​ນາຊາຍ​ທອງ

ອຸ່ນ​ເຮືອນ ທຳ​ມະ​ວົງ ຄອບຄົວໂ​ຕ​ແບບ​ເມືອງ​ນາຊາຍ​ທອງ

Posted by

      ​ໃນ​ຖານະ​ທີ່​ເປ​ັນຄອບຄົວ​ຊາວນາ ເຊິ່ງຍຶດອາຊີບ​ການ​ຜະລິດ​ເຂົ້າ​ເປັນ​ສິນ​ຄ​້າ ຈິ່ງ​ມີ​ການ​ປັບປ່ຽນ​ຈາກ​ການ​ເຮັດ​ນາ​ແບບ​ປະຖົມ​ປະ​ຖານ​ມາ​ເປັນ​ການ​ນຳ​ໃຊ້​ກົນ​ຈັກ​ເຂົ້າ​​ໃນ​ຂະ​ບວນການ​ຜະລິດ​ອັນ​ໄດ້​ເຮັດ​ໃຫ້ຊີວິດ​ການ​ເປັນ​ຢູ່ ​ກໍ​ຄື​ລາຍ​ໄດ້​ຂອງ​ຄອບຄົວ​​ດີ​ຂຶ້ນ ​ແລະ ​ຕັດ​ບັນຫາ​ເລື່ອງ​ແຮງ​ງານ​ບໍ່ພໍ ​ແຕ່​ກໍ​ມີຄວາມ​ເປັນ​ຫ່ວງ​​ເລື່ອງ​ຄຸ​ນະພາ​ບ​ເຂົ້າ ຖ້າ​ຈະ​ເອົາ​ການ​ຜະລິດ​ທີ່​​ໃຊ້​ເວລາ​ໜ້ອຍ ​ແຕ່​ໄດ້​ປະລິມານ​ຫຼາຍ ພັດ​ເຮັດ​ໃຫ້​ຄຸນ​ລັກສະນະ​ເດັ່ນ​ຂອງ​ເຂົ້າລາວ​ນັ້ນຄື ກິ່ນ​ຫອມ ​ແລະ ​ສຳຜັດ​ທີ່​ອ່ອນ​ນຸ້ມນັ້ນສູນ​ເສຍ​ໄປ.

      ທີ່​ຍົກ​ມາ​ຂ້າງ​ເທິງ​ຄື​ທັດສະນະ​ຂອງ ທ່ານ ອຸ່ນ​ເຮືອນ ທຳ​ມະ​ວົງ ຄອບຄົວ​ໂຕ​ແບບ​ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ​ໃນ​ການ​ຜະລິດ​ເຂົ້າ​ເປັນ​ສິນຄ້າ ​ໂດຍ​ນຳ​ໃຊ້​ກົນ​ຈັກ ເຊິ່ງເປັນ​ຜູ້​ອະນຸ​ຮັກ​ ​ແລະ ​ສືບ​ສານ​ອາຊີບ​ຊາວ​ນາ​ທີ່​ບັນພະບຸລຸດ​ພາ​ເຮັດ​ມາ​ໄດ້​ຫຼາຍ​ເຊັ່ນ​ຄົນ​ແລ້ວ ​ໃນ​ໂອກາດ​ໃຫ້​ສຳພາດ​ຕໍ່​ທີ​ມຂ່າວ​ວິທະຍຸນະຄອນຫຼວງ ​ເມື່ອ​ລະຫວ່າງ​ທ້າຍ​ເດືອນ​ມີນາ 2017 ຜ່ານ​ມານ​ັ້ນ ທ່ານ ອຸ່ນ​ເຮືອນ ​ໃຫ້​ຮູ້​ວ່າ ​ໃນ​ບັນດາ​ຄອບຄົວ​ຊາວນາ​ຢູ່​ບ້ານ​ຮ່ອງ​ງົວ ​ເມືອງ​ນາ​ຊາຍ​ທອງ ກໍ​ຍັງ​ມີ​ບໍ່ຫຼາຍ​ປານ​ໃດ​ທີ່ຍັງ​ຄົງຍຶດອາຊີບ​ເຮັດ​ນາ​ເປັນ​ຫຼັກ ​ແຕ່​ສຳລັບ​ຕົນ​ເອງ​ໃນ​ເມື່ອ​ເປັນຄວາມ​ຮັກ ຄວາມ​ຜູກພັນ ​ແລະ​ ຄວາມ​ຫຼົງໄຫຼ​ໃນ​ວິຖີ​ທີ່​ຕິດ​ພັນ​ທົ່ງ​ນາມາ​ແຕ່​ນ້ອຍ ຈິ່ງ​ບໍ່​ຢາກ​ປະປ່ອຍ​ໃຫ້​ອາຊີບ​ນີ້​​ໝົດ​ໄປ​ຕາມ​ການ​ເວລາ ​ແລະ ​​ເສື່ອ​ມ​ໄປ​ຍ້ອນສະພາບ​ການ​ຂະຫຍາຍໂຕ​ຂອງ​ສັງຄົມ​ປັດຈຸບັນ.

      “ສຳລັບ​ການ​ຫັນປ່ຽນ​ມາ​ນຳ​ໃຊ້​ກົນ​ຈັກ​ເຂົ້າ​ໃນ​ການ​ຜະລິດ​ແມ່ນ​ເລີ່​ມມາ​ແຕ່​ສົກ​ປີ 1979-1980 ​ໃນ​ເນື້ອ​ທີ່​ນາ​ຂອງ​ຕົນ​ປະມານ 2 ​ເຮັກຕາ​ກວ່າ ​ແລະ​ ມີ​ແຮ​ງງານ​ຕົ້ນຕໍ​ພຽງ​ສອງ​ຄົນ​ຄື ຜົວ ​ແລະ ​ເມຍ ສຳລັບ​ລູກ​ສອງ​ຄົນ​ແມ່ນ​ເປັນ​ແຮງ​ງານ​ເສີມ​ຫຼັງ​ເລີກ​ຮຽນ ​ເມື່ອ​ຜະ​ເຊີນ​ກັບ​ບັນຫາ​ແຮງ​ງານ​ຈິ່ງ​ຫັນ​ມາ​ຈ້າງ​ກົນ​ຈັກ​​​​ໄຖ ຄາດ ຟາດ-ປັ່ນ ສ່ວນ​ການ​ປັກ​ດ​ຳ​ແມ່ນ​ກົນ​ຈັກ​ຂອງ​ຕົນ​ເອງ ຈິ່ງ​​ເຫັນ​ໄດ້​ວ່າ​ຕົ້ນທຶນ​ການ​ຜະລິດ​ຫຼຸດ​ລົງ ສ່ວນ​ຜົນ​ຜະລິດ​ກໍ​ຢູ່​ໃນ​ລະດັບ​ທີ່​ໜ້າ​ພໍ​ໃຈ​ຄື 4,3 ​ໂຕນ​ຕໍ່​ເຮັກຕາ ສຳລັບ​ນາປີ ​ແລະ ​ປະມານ 4,5 ​ໂຕນ​ຕໍ່​ເຮັກຕາ​ສຳລັບ​ນາ​ແຊງ” ທ່ານ​ ອຸ່ນ​ເຮືອນ ກ່າວ.

      “ບັນຫາ​ທີ່​ພົບ​ກໍ​ແມ່ນ​ລາຄາ​ເຂົ້າຫຼຸດ​ຕ່ຳ​ ​ແລະ ​ບໍ່​ຄົງ​ທີ່ ຍ້ອນ​ຢູ່ພາຍ​ໃຕ້​ການ​ນຳ​ກົດ​ຂອງ​ບັນດາ​ໂຮງສີ ​ແລະ ​ພໍ່ຄ້າ​ຄົນ​ກາງ ຈິ່ງ​ເຮັດ​ໃຫ້​ລາຍ​ຮັບ​ຂອງ​ຊາວນາ​ລາວບໍ່​ໄດ້​ດີເທົ່າ​ທີ່​ຄວນ ເຊິ່ງບັນຫາ​ດັ່ງກ່າວ​ກໍ​ໄດ້​ມີ​ການ​ຫາລື​ກັນ​ໃນ​ບັນດາ​ຊາວນາ​ ​ແລະ ​ພະນັກງານ​ວິຊາ​ການ​ຈາກ​ໜ່ວຍ​ງານ​ສົ່ງ​​ເສີມ​ກະສິກຳ ​ແລະ ​ສະຫະກອນ ຫ້ອງການ​ກະສິກຳ​ຯ ເມືອງ​ນາ​ຊາຍ​ທອງ ​ແລະ ​ມີແຜນຈັດຕັ້ງກຸ່ມ​ການ​ຜະລິດ​ເພື່ອ​​ສ້າງ​ຄວາມ​ແຂງ​​ແກ່ນ​ໃຫ້​ແກ່​ຜູ້​ຜະລິດ ເຊິ່ງ​ຄິດ​ວ່າການ​ໂຮມໂຕ​ຈາກ​ໄຮ່ນາ​ນ້ອຍ​ເປັນ​ໄຮ່ນາ​ໃຫຍ່​ຈະ​ເຮັດ​ໃຫ້ການຕໍ່​ລອງ ​ແລະ​ ການ​ຍົກ​ສູງ​ຄຸ​ນະພາ​ບ​ເຂົ້າມີ​ທ່າ​ກ້າວ​ດີ​ຂຶ້ນ ສ່ວນ​ການ​ນຳ​ໃຊ້​ແນວ​ພັນ​ເຂົ້າ​ແບບ​ໃໝ່​​ໃຫ້​ຜົນ​ຜະລິດ​ສູງໃຊ້​​ເວລາ​ໜ້ອຍນັ້ນກໍ​ຈິງ ​ແຕ່​ສິ່ງ​ທີ​່​ເປັນ​ຄຸນ​ລັກສະນະ​ເດັ່ນ​ຂອງ​ເຂົ້າລາວ​ນັ້ນກໍ​ຄື ກິ່ນ​ຫອມ ​ແລະ ​ຄວາມ​ອ່ອນ​ໜຽວ​ນຸ້ມ (​ເຂົ້າມີ​ຢາງ) ຕາມ​ທຳ​ມະ​ຊາດພັດ​ຫາຍ​ໄປ ອັນ​ນີ້ຄິດ​ວ່າ ຖ້າ​ຈະ​ຜະ​ລິດ​ເພື່ອ​ການ​ຄ້າ ​ແລະ ​ໃຫ້​ໄດ້​ລາຄາ​ກໍ​ຕ້ອງ​ຫາລື​ກັນ​ຄັກ​ແນ່​ວ່າ​ຈະ​​ເອົາ​ປະລິມານ ຫຼື ຄຸນະພາ​ບ​ເຂົ້າ (ຜະລິດ​ໄດ້​ຫຼາຍ​ແຕ່​ຂາຍ​ໄດ້​ລາຄາ​ຖືກ ​ທັງ​ຄຸ​ນະພາ​ບ​ເຂົ້າຕ່ຳ) ເຊິ່ງ​ມັກມີ​ຫາງ​ສຽງ​ວ່າ ​ເຂົ້າອັ່ງ​​ໂຮງສີ​  ນີ້​ລະ! ​ຄື​ບັນຫາ​ຂອງ​ຊາວນາ​ທີ່​ບໍ່​ສາມາດ​ຕໍ່​ລອງ​ກັບ​ພໍ່ຄ້າ​ໄດ້”  ທ່ານ ອຸ່ນ​ເຮືອນ ກ່າວ​ເນັ້ນ.

      ຈະ​ເຮັດ​​ແນວ​ໃດ​ເພື່ອ​ໃຫ້​ຜົນ​ຜະລິດ​ເຂົ້າລາວ​ມີ​ມາດຕະຖານ ຫຼື ຄຸນະພາ​ບສູງ ​ຄື​ໄດ້​ທັງ​ປະລິມານ  ​ແລະ​ ຮັກສາ​ໄດ້​ຄຸນ​ລັກສະນະ​ດັ້ງ​ເດີມ​ຂອງ​ພັນ​ເຂົ້າຄື ກິ່ນ​ຫອມ ​ແລະ ​ຄວາມ​ອ່ອນນຸ້ມ ຮວມ​ທັງ​ເວລາ​ໃນ​ການ​ຜະລິດ ປັດ​ໄຈ​ດ້ານ​ຕົ້ນທຶນ ​ແລະ​ ອື່ນໆ ຍັງ​ຄົງ​ເປັນ​ຄຳ​ຖາມ​ທີ່​ຫຼາຍ​ພາກສ່ວນທັງ​ພາກ​ລັດ ຊາວນາ ​ແລະ​ ນັກທຸລະກິດ​ຕ້ອງ​ຄິດ​ວາງ​ແຜນ​ຢ່າງຮອບ​ຄອບ ຖ້າ​ຈະ​ມຸ່ງ​ໄປ​ໃສ່​ການ​ສົ່ງ​ອອກ​ສູ່​ຕະຫຼາດ​ຕ່າງປະ​ເທດ ​ແລະ​ ນີ້​ກໍແມ່ນນຶ່ງ​ໃນ​ທັດສະນະ​ຂອງ​ຊາວນາ​ລາວ ​ທີ່​ຂໍ​ແລກປ່ຽນ​ຜ່ານ​ສື່ ​ເພື່ອຈະ​ໄດ້​ເປັນ​ປະ​ເດັນ​ຫາລື​ໃນ​ການ​ສ້າງ​ຄວາມ​ຍືນ​ຍົງ​ໃຫ້​ແກ່​ຊາວນາ ​ແລະ​ ບັນດາ​ຜູ້​ປະກອບ​ການ​ກ່ຽວ​ກັບ ​ເຂົ້າສານ​ລາວ.

ໂດຍ: ສົມ​ຈັນ ບົວ​ພາ

 

Leave a Reply

Your email address will not be published. Required fields are marked *

*