ຮຽນຮູ້ປະສົບການຂອງ ທ່ານ ນາງ ບົວສະຫວັນ ອາສາ​ສະໝັກສອນ​ກ່ຽວ​ກັບ​ເຕັກນິກ​ການ​ຕ່ຳຫູກ

ຮຽນຮູ້ປະສົບການຂອງ ທ່ານ ນາງ ບົວສະຫວັນ ອາສາ​ສະໝັກສອນ​ກ່ຽວ​ກັບ​ເຕັກນິກ​ການ​ຕ່ຳຫູກ

Posted by

      ທ່ານ​ ນາງ ບົວ​ສະຫວັນ ສິດທິ​ວັນ ຊາວ​ຊ່າງ​ຫັດຖະກຳ​ຕ່ຳຫູກ​ທີ່​ກ້າວ​ຂຶ້ນ​ເປັນ​ເຈົ້າຂອງ​ທຸລະ​ກິດ​ສ່ວນ​ບຸກຄົນ “ຕ່ຳ​ລາຍ​ລາວ” ເຊິ່ງ​ມີທີ່ຕັ້ງຢູ່​ບ້ານສີ​ສັງວອນ ​ເມືອງ​ໄຊ​ເຊສດຖາ ນະຄອນຫຼວງ​ວຽງ​ຈັນ ​ທີ່ໄດ້​ຮັບ​ກາ​ໝາຍ​ສິນຄ້າ ນຶ່ງ​​ເມືອງ ນຶ່ງ​ຜະລິດ​ຕະພັນ​ແຫ່ງຊາດ ​(ໂອດ໊ອບ) ​ໄດ້​ບອກ​ເລົ່າ​ປະສົບ​ການ​ຊີວິດ​ໃນ​ໂອກາດ​ໃຫ້​ສຳພາດ​ຕໍ່​ທີ​ມຂ່າວ ວິທະຍຸນະຄອນຫຼວງວຽງຈັນ ​ເມື່ອ​ສັບປະດາ​ທີ່​ຜ່ານ​ມາ​ວ່າ  “ບໍ່​ໜ້າ​ເຊື່ອ​ວ່າ​ຕົນ​ເອງ​ຈະ​ມີ​ໂອກາດ​ໄດ້​ນຳ​ໃຊ້​ພູມ​ປັນຍາ​ທີ່​ບັນພະບຸລຸດ​ໃຫ້​ມາ​ໄປ​ເຜີຍ​ແຜ່​ສູ່​ບັນດາ​ຊາວບ້ານ​ທ້ອງ​ຖິ່ນ ​ໂດຍ​ການ​ເປັນ​ອາຈານ​ສອນ​ອາສາ​ສະໝັກກ່ຽວ​ກັບ​ເຕັກນິກ​ການ​ຕ່ຳຫູກ”.

      “ຮຽນ​ມາ​ພຽງ​ຊັ້ນ ປ.2 ຍ້ອນ​ເປັນ​ເອື້ອຍ​ກົກ​ຂອງ​ນ້ອງ​ຫຼາຍ​ຄົນ ​ທັງ​ມີ​ຖານະ​ຊາວນາ​ທຸກ​ຍາກ ຈິ່ງ​ຕັດສິນ​ໃຈ​ອອກ​ມາ​ເປັນ​ກຳລັງ​ແຮງ​ຊ່ອຍ​ແມ່ ​ແຕ່​ຍ້ອນ​ຄວາມ​​ໄຝ່ຮັກ​ມັກ​ງານ​ຫັດຖະກຳ​ຕ່ຳຫູກ ​ແລະ ​ຕິດ​ພັນ​ກີ່​ຕ່ຳຫູກ​ມາ​ແຕ່​ນ້ອຍ ຈິ່ງ​ຖື​ເປັນ​ການ​ອົບຮົມ​ບົ່ມ​ປູກ​ປະສົບ​ການ​ຜ່ານ​ການ​ປະຕິບັດໂ​ຕ​ຈິງ ​ແລະ ​ນຳ​ໃຊ້​ຄວາມ​ຮູ້​ດ້ານ​ຫັດ​ຖະກຳຕ່ຳຫູກ​ນີ້​ລະ​ລ້ຽງ​ຕົນ​ເອງ ​ແລະ​ ຄອບຄົວ​ຕະຫຼອດ​ມາ ​ແຕ່​ວ່າເສັ້ນທາງ​ຊີວິດ​ກໍ​ບໍ່​ໄດ້​ໂຮຍ​ດ້ວຍ​ກີບ​ດອກ​ໄມ້ ຫຼື ບໍ່​ມີ​ສະພາບ​ດ່ັງທີ່​ເປັນ​ຢູ່​ໃນ​ປັດຈຸບັນ” ທ່ານ ນາງ ບົວ​ສະຫວັນ ກ່າວ.

ທ່ານ​ ນາງ ບົວ​ສະຫວັນ ສິດທິ​ວັນ ຊາວ​ຊ່າງ​ຫັດຖະກຳ​ຕ່ຳຫູກ​​ເຈົ້າຂອງ​ທຸລະ​ກິດ​ສ່ວນ​ບຸກຄົນ “ຕ່ຳ​ລາຍ​ລາວ”

      ຍ້ອນ​ມີ​ຖານະ​ທຸກ​ຍາກ ​ແລະ ​ບໍ່​ມີ​ເງິນ​ທຶນ​ພໍ​ທີ່​ຈະ​ຊື້​ຝ້າຍ ຊື້​ໄໝ ຊື້​ໄມ້ ຊື້​ຟືມ​ມາ​ເຮັດ​ກີ່​ຕ່ຳຫູກ ຈິ່ງ​ໄດ້​​ເຈ່ຍລູກ​ໄປ​ເປັນ​ກຳມະກອນ​ຮັບຈ້າງຕ່ຳ​ແຜ່ນ​ຢູ່​ອົງການ​ຊ່ອຍ​ເຫຼືອ​ເຊິ່ງກັນ​ແລະ​ກັນ ນັບ​ແຕ່​ປີ 2002 ຫຼັງ​ຈາກ​ນັ້ນ ປະມານ​ເກືອບ 3 ປີ ​ກໍ​ມີ​ເງິນ​ທຶນ​ອອກ​ມາ​ເຮັດ​ທຸລະ​ກິດ​ຄອບຄົວ ຈິ່ງ​ເລີ່​ມຕ່ຳ​ຜ້າພັນ​ຄໍ​ດ້ວຍ​ໄໝ​ມ້ອນ 100% ອອກ​ຂາຍ ແລ້ວ​ກາຍ​ເປັນ​ທີ່​ຮູ້ຈັກ​ຂອງ​ສັງຄົມ ​ໂດຍ​ສະ​ເພາະ​ແມ່ນ​ລູກ​ຄ້າ​ທີ່​ເປັນ​ຄົນ​ຕ່າງປະ​ເທດ ທີ່​ມີ​ການ​ສັ່ງ​ຊື້​ເຂົ້າມາ​ຢ່າງ​ຫຼວງ​ຫຼາຍ.

      ປັດຈຸບັນ ຜະລິ​ດຕະພັນ​ຂອງ ​ຫັດຖະກຳ​ຕ່ຳ​ລາຍ​ລາວ​ ປະກອບ​ມີ ຜ້າພັນ​ຄໍ ກະ​ເປົາພາຍ ​ແພ​ບ່ຽງ ​​ແພ​ຕັດ​ເສື້ອ ແພ​ຄຸມ​ໄຫຼ່ ​ ສິ້ນ​ໄໝ​ມ້ອນ ​ໄໝ​ຫຼາບ ​ແລະ ​ອື່ນໆ ເຊິ່ງ​ຂະຫຍາຍ​ອອກ​ປະມານ 40 ກີ່​ ຮວມທັງຊາວ​ຊ່າງ​ມາ​ຮັບ​ເອົາ​ໄປ​ຕ່ຳ​ຢູ່​ເຮືອນ​ຂອງ​ເຂົາ​ເຈົ້າ ຈິ່ງ​ສາມາດ​ເວົ້າ​ໄດ້​ວ່າ ທ່ານ ນາງ ບົວ​ສະຫວັນ ​ໄດ້​ປະກອບສ່ວນ​ສຳຄັນ​ເຂົ້າ​ໃນ​ການ​ສ້າງວຽກ​ເຮັດ​ງານ​ທຳ​ໃຫ້​ແກ່​ເອື້ອຍ​ນ້ອງ​ແມ່ຍິງ​ລາວ.

      ສິ່ງ​ທີ່​ໜ້າ​ພາກພູມ​ໃຈ​ແມ່ນ​ການ​​ໄດ້​ຮັບ​ໂອກາດ​ຈາກ​ພາກ​ລັດ​ໃນ​ການຈັດ​ສະ​ແດງ​ສິນຄ້າ​ຢູ່​ທັງພາຍ​ໃນ ​ແລະ​ ຕ່າງປະ​ເທດ ເຊິ່ງ​ຜະລິດ​ຕະພັນ​ຂອງ​ ຕ່ຳ​ລາຍ​ລາວ ​ໄດ້​ນຳ​ອອກ​ເຜີຍ​ແຜ່​ຢູ່​ປະ​ເທດ​ໄທ ຍີ່ປຸ່ນ ຝຣັ່ງ ຊູແອດ ສະ​ວິດ ​ແລະ ​ມີ​ລູກ​ຄ້າ​ຂາ​ປະຈຳ​ຢູ່​ອາ​ເມຣິກາສັ່ງ​ຊື້​ຕະຫຼອດ ​ແຕ່​ສິ່ງ​ທີ່​ໜ້າ​ຍິນ​ດີ ​ແລະ ​ຖື​ເປັນ​ກຽດ​ອີກ​ຢ່າງນຶ່ງ​ກໍ​ຄື ທາງ​ໂຄງການ​ພັດທະນາ​ຊຸມ​ຊົນ​ຂອງ​ໂຄງການ​ເຂື່ອນ​ໄຟຟ້າ​ນ້ຳ​ເທີນ 2 ​ໄດ້​ເລືອກ​ເອົາ ທ່ານ ນາງ ບົວ​ສະຫວັນ ​​ເປັນນຶ່ງ​ໃນ​ອາຈານ​ອາສາ​ສະໝັກ​ທີ່​ໃຫ້​ຄວາມ​ຮູ້​ກ່ຽວ​ກັບ​ເຕັກ​ນິກການ​ຕ່ຳຫູກ​ໃຫ້​ແກ່​ຊາວບ້ານ​ສົບ​ເຮ້ຍ ສົບ​ຄຳ ນ້ຳ​ນຽນ ​ເມືອງ​ນາ​ກາຍ ​ແຂວງ​ຄຳ​ມ່ວນ ​ໂດຍ​ທ່ານ​ນາງ​ໄດ້​ແນະນຳ​ຕັ້ງ​ແຕ່​ຂັ້ນຕອນ​ການ​ຟອກ​ໄໝ ຍ້ອມ​ສີ ການ​ຕາກ​ໃນ​ອຸນຫະພູມ​ທີ່​ເໝາະ​ສົມ ການ​ປັ່ນ​ຫຼອດ ການຄົ້ນ ການ​ສືບ ​ເກັບ​ລາຍ ​ແລະ ​ການ​ຕ່ຳ.

      ນີ້ກໍນັບ​ເປັນ​ອີກນຶ່ງ​ບຸກຄົນ​ຕົ້ນ​ແບບ​ທີ່​ສັງຄົມ​ຄວນ​ຮຽນ​ຮູ້ ​ແລະ​ ຖື​ເປັນ​ແບບຢ່າງ​ດ້ານ​ການ​ດຳລົງ​ຊີວິດ ເຊິ່ງ​ທ່ານ ນາງ ບົວ​ສະຫວັນ ​ໄດ້​ກ່າວ​ຢ້ຳອີກວ່າ  “​ໃນ​ໄລຍະ​ທີ່​ຜ່ານ​ມາ​ເຖິງ​ປັດຈຸບັນ ກໍ​ຍັງ​ຄົງປະຕິບັດ​ຕົນ​ເປັນ​ຄົນ​ປະ​ຢັດ ອົດອອມ ​ແລະ ​ດຸ​ໝັ່ນ​ຂະຫຍັນ​ພຽນ ພ້ອມ​ນີ້ ກໍ​ຈະ​ຫາ​ໂອກາດ​ຖ່າຍ​ທອດ​ບົດຮຽນ​ດີໆ​ດ້ານ​ການ​ຕ່ຳ​ຫູກ​ໃຫ້​ແກ່​ເອື້ອຍ​ນ້ອງ​ແມ່ຍິງ​ທີ່​ສົນ​ໃຈ​ໄຝ່ຮຽນ ຂໍ​ພຽງ​ມີ​ຄວາມ​ອົດທົນ ມຸ່ງ​ໝັ້ນ ​ແລະ ​ປະພຶດ​ດີ ກໍ​ເຊື່ອ​ວ່າ​ວັນນຶ່ງ​ຂ້າງ​ໜ້າ​ຕ້ອງ​ປະສົບ​ຄວາມ​ສຳ​ເລັດ​ດີ​ແນ່ນອນ”.

ຂ່າວ/ຮູບ: ສົມ​ຈັນ ບົວ​ພາ

Leave a Reply

Your email address will not be published. Required fields are marked *

*