ເກົາຫລີ ມອບລົດຖ່າຍທອດສົດ ໃຫ້ສະພາແຫ່ງຊາດລາວ

 

ຫ້ອງວ່າການ ສະພາແຫ່ງຊາດ ສປປ.ລາວ ໄດ້ຮັບລົດຖ່າຍທອດສົດ
ໂທລະພາບ ແລະ ອຸປະກອນຮັບໃຊ້ການຖ່າຍທອດສົດ ມູນຄ່າ
1.450.000 ໂດລາສະຫະລັດ ຊຶ່ງເປັນການຊ່ວຍເຫລືອຈາກ
ທາງຄະນະບໍລິຫານງານໂທລະພາບ ແລະ ລັດຖະບານ ສ.ເກົາຫລີ
ເພື່ອຊ່ວຍໃຫ້ສະພາແຫ່ງຊາດລາວ ມີລົດຖ່າຍທອດສົດໂທລະພາບ
ແລະ ອຸປະກອນຮັບໃຊ້ວຽກງານວິຊາການໂທລະພາບເປັນຂອງໂຕເອງ
ໃນຂະນະທີ່ສະພາແຫ່ງຊາດລາວພວມລິເລີ່ມແຜນການສ້າງລາຍການ
ໂທລະພາບ “ ຜູ້ແທນປະຊາຊົນ ” .

ການຊ່ວຍເຫລືອໃນຄັ້ງນີ້ ຈະເປັນປະໂຫຍດອັນໃຫຍ່ຫລວງໃຫ້ແກ່
ປະຊາຊົນບັນດາເຜົ່າຂອງ ສປປ.ລາວ ເວົ້າລວມ, ເວົ້າສະເພາະແມ່ນ
ສະພາແຫ່ງຊາດ ຈະໄດ້ມີພາຫະນະຮັບໃຊ້ໃນການໂຄສະນາເຜີຍແຜ່
ແນວທາງ ນະໂຍບາຍຂອງພັກ ທີ່ໄດ້ຫັນເປັນອັນລະອຽດໃນຂົງເຂດ
ນິຕິບັນຍັດ, ເຜີຍແຜ່ກ່ຽວກັບຜົນສຳເລັດຂອງກອງປະຊຸມສະພາແຫ່ງຊາດ
ໃນແຕ່ລະສະໄໝ ກໍຄືການເຄື່ອນໄຫວຂອງຄະນະປະຈຳສະພາແຫ່ງຊາດ,
ສະມາຊິກສະພາແຫ່ງຊາດໃນແຕ່ລະເຂດເລືອກຕັ້ງ ໃຫ້ເຂົ້າເຖິງມວນຊົນ
ຢ່າງກວ້າງຂວາງ ແລະ ວ່ອງໄວ ທັນສະພາບການ, ເຜີຍແຜ່ ສຶກສາ
ອົບຮົມສະຕິກົດໝາຍໃຫ້ທົ່ວສັງຄົມ ເພື່ອຍົກສູງຈິດສຳນຶກ ມະໂນທຳ ແລະ
ຄວາມຮັບຜິດຊອບຂອງພະນັກງານ ທີ່ຕິດພັນກັບສະຕິເຄົາລົບລັດຖະທຳມະນູນ
ແລະ ກົດໝາຍຂອງບ້ານເມືອງ.

ພິທີມອບ-ຮັບດັ່ງກ່າວ ໄດ້ຈັດຂຶ້ນໃນຕອນບ່າຍຂອງວັນທີ 6 ກຸມພາ 2013
ທີ່ສະພາແຫ່ງຊາດ ລະຫວ່າງທ່ານ ສາດສະດາຈານ ກິມກວານຊາງ ປະທານ
ຄະນະບໍລິຫານງານສູນກາງໂທລະພາບ ຕາງໜ້າໃຫ້ລັດຖະບານ ສ.ເກົາຫລີ
ແລະ ທ່ານ ດຣ. ອຸ່ນແກ້ວ ວຸດທິລາດ ຫົວໜ້າຫ້ອງວ່າການສະພາແຫ່ງຊາດ
ໂດຍການເປັນກຽດເຂົ້າຮ່ວມຂອງທ່ານ ສົມພັນ ແພງຄຳມີ ຮອງປະທານສະພາ
ແຫ່ງຊາດ, ທ່ານນາງ ບຸນເພັງ ມູນໂພໄຊ ລັດຖະມົນຕີຫ້ອງວ່າການລັດຖະບານ,
ທ່ານ ສາດສະດາຈານ ດຣ. ນາງ ຢູຮຸນສຸກ ປະທານສະມາຄົມສິລະປິນ
ມວນຊົນ ສ.ເກົາຫລີ, ສະມາຊິກສະພາແຫ່ງຊາດແລະເຈົ້າໜ້າທີ່ທີ່ກ່ຽວຂ້ອງ.

ຂ່າວ/ພາບ: ສ.ບົວພາ

 
 
 

0 Comments

You can be the first one to leave a comment.

 
 

Leave a Comment