ເຈົ້າໜ້າທີ່ກວດກາປ່າໄມ້ແຂວງອຸດົມໄຊ ຈັດພິທີຈູດທຳລາຍສັດປ່າທີີ່ຍຶດໄດ້ຈາກຕະຫຼາດ 2 ແຫ່ງ

ເຈົ້າໜ້າທີ່ກວດກາປ່າໄມ້ແຂວງອຸດົມໄຊ ຈັດພິທີຈູດທຳລາຍສັດປ່າທີີ່ຍຶດໄດ້ຈາກຕະຫຼາດ 2 ແຫ່ງ

Posted by

      ຫຼາຍຄັ້ງທີ່ບັນດາເຈົ້າໜ້າທີ່ກວດກາປ່າໄມ້ໄດ້ຍຶດຊາກສັດປ່າ ແລະ ທຳການສຶກສາອົບຮົມກຸ່ມພໍ່ຄ້າແມ່ຄ້າທີ່ມີພຶດຕິກຳຄ້າຂາຍແບບຜິດກົດໝາຍ ຫຼ້າສຸດກໍມີພິທີຈູດທໍາລາຍສັດປ່າທີ່ພະແນກກະສິກຳ ແລະປ່າໄມ້ແຂວງອຸດົມໄຊ ເຊິ່ງຍຶດໄດ້ຈາກບັນດາແມ່ຄ້າຢູ່ຕະຫຼາດບ້ານນາຮ້ວງ ແລະ ຕະຫຼາດຈຸດສຸມບ້ານຫຼັກ 32 ເມືອງໄຊ ໂດຍເຈົ້າໜ້າທີ່ກ່ຽວຂ້ອງໄດ້ນຳໄປເຜົາທຳລາຍເມື່ອທ້າຍເດືອນ ມີນາ 2017 ຜ່ານມາ.

      ເຂົ້າຮ່ວມໃນພິທີດັ່ງກ່າວນີ້ິມີບັນດາຄະນະພະແນກກະສິກໍາ ແລະປ່າໄມ້ແຂວງ ຫ້ອງວ່າການປົກຄອງແຂວງ ອົງການຈັດຕັ້ງທີ່ກ່ຽວຂ້ອງ ຮວມທັງບັນດາແມ່ຄ້າທີ່ຄ້າຂາຍສັດປ່າຜິດກົດໝາຍ ເຊິ່ງທາງເຈົ້າໜ້າທີ່ໄດ້ກັກໂຕ ໂດຍພາຍຫຼັງເຈົ້າໜ້າທີ່ກວດກາປ່າໄມ້ແຂວງ ໄດ້ລົງກວດກາ ແລະ ຍຶດຊາກສັດປ່າ ພ້ອມທັງກັກຜູ້ຂາຍສັດນ້ຳ ສັດປ່າ ຢູ່ 2 ຈຸດຄື ຈຸດຕະຫຼາດບ້ານນາຮ້ວງ ແລະ ຈຸດບ້ານສາມສ້າງເຂດຫຼັກ 32 ເມືອງໄຊ ແຂວງອຸດົມໄຊ ເມື່ອວັນທີ 30 ມີນາ ຜ່ານມາ ເຊິ່ງໄດ້ກັກໂຕແມ່ຄ້າໄດ້ 8 ຄົນ ພ້ອມຂອງກາງທີ່ເປັນສັດປ່າຫຼາຍລາຍການ ເປັນຕົ້ນແມ່ນກວາງ ຟານ ເໝັ້ນ ໝູປ່າ ເຫງັນ ບ່າງ ກະຮອກ ແລະ ສັດປີກປະເພດນົກ ແລະ ໄກ່ປ່າ ທັງຮູບແບບດິບ ແລະ ແຫ້ງ ຮວມ 100 ກວ່າກິໂລກຣາມ ຄິດເປັນມູນຄ່າໃນເບື້ອງຕົ້ນປະມານ 10 ລ້ານກີບ.

      ພິທີຈູດທຳລາຍຊາກສັດປ່າຫວງຫ້າມເມື່ອຄັ້ງວັນທີ 31 ມີນາ 2017 ໄດ້ມີມວນຊົນໃຫ້ຄວາມສົນໃຈເຂົ້າຮ່ວມຕິດຕາມການປະຕິບັດງານຂອງເຈົ້າໜ້າທີ່ເຊິ່ງເຮັດວຽກດ້ານການຕ້ານ ແລະ ສະກັດກັ້ນການຊື້ຂາຍສັດປ່າ ຕາມກົດໝາຍວ່າດ້ວຍສັດນ້ຳ ສັດປ່າ ແລະ ນິຕິກໍາຕ່າງໆທີ່ລັດຖະບານວາງອອກ ເພື່ອໃຫ້ເຫັນໄດ້ເຖິງຄວາມໂປ່ງໃສໃນການຈັດຕັ້ງປະຕິບັດວຽກງານ ສ່ວນບັນດາແມ່ຄ້າທີ່ຖືກເຈົ້າໜ້າທີ່ກັກໂຕໃນຄັ້ງນີ້ ກໍຖືກປັບໃໝຕາມລະບຽບການ ພ້ອມເຂົ້າຮັບການສຶກສາອົບຮົມ ແລະ ປ່ອຍໂຕໃນເວລາຕໍ່ມາ.

ຂ່າວ/ພາບ: ຄານມະນີ ຮຽນດໍຈັນ      

 

Leave a Reply

Your email address will not be published. Required fields are marked *

*