ເທສະການຣັກບີ້ ຈະຈັດໃຫຽ່ໃນທ້າຍອາທິດນີ້ ທີ່ສະໜາມກີລາເຈົ້າອະນຸວົງ ນະຄອນຫຼວງວຽງຈັນ

ເທສະການຣັກບີ້ ຈະຈັດໃຫຽ່ໃນທ້າຍອາທິດນີ້ ທີ່ສະໜາມກີລາເຈົ້າອະນຸວົງ ນະຄອນຫຼວງວຽງຈັນ

Posted by

     ຖືເປັນການໂຮມເອົາສອງກິດຈະກຳແຂ່ງຂັນກີລາຣັກບີ້ເຂົ້າມາເປັນເທສະການລາວຣັກບີ້ ເຊິ່ງຈະເປີດສາກຂຶ້ນຢ່າງຍິ່ງໃຫຽ່ທີ່ສະໜາມກີລາເຈົ້າອະນຸວົງ ນະຄອນຫຼວງວຽງຈັນ ໂດຍການແຂ່ງຂັນລາຍການເອເຊຍ ຣັກບີ້ ເຊເວັນ ໂທຣຟີ (ການແຂ່ງຂັນທີມຊາດຍິງ) ແລະ ການຊີງແຊັມສະໂມສອນ ວຽງຈັນນານາຊາດ ຄັ້ງທີ 10 (ການແຂ່ງຂັນສະໂມສອນຊາຍ-ຍິງທັງໃນ ແລະ ນອກປະເທດ) ບັນຍາກາດການຊີງໄຊຈະດຸເດືອດຂະໜາດໃດ ພິສູດໄດ້ໃນລະຫວ່າງວັນທີ 17-19 ກຸມພາ 2017 ນີ້.

     ນີ້ແມ່ນປະຫວັດສາດໜ້າທຳອິດຂອງສະຫະພັນຣັກບີ້ແຫ່ງຊາດລາວ ທີ່ຈະໄດ້ຮັບກຽດຈັດງານ ເອເຊຍ ຣັກບີ້ ເຊເວັນ ໂທຣຟີ ທີ່ນະຄອນຫຼວງວຽງຈັນ ເຊິ່ງທີມຊາດຍິງລາວປະເພດຫຼິ້ນ 7 ຄົນ ຈະໄດ້ ພົບກັບ 6 ປະເທດຄື ອິນເດຍ ມາເລເຊຍ ຟິລິບປິນ ປາກີສະຖານ ແລະ ສ. ເກົາຫຼີ ຫຼັງການແຂ່ງຂັນຄັ້ງນີ້ຈົບລົງທາງທີມຊາດຍິງຍັງຈະຕ້ອງກຽມໂຕໃນການແຂ່ງຂັນທີ່ປະເທດສີລັງກາ ໃນເດືອນກັນຍາ ແລະ ຕຸລາ 2017 ນີ້ ສຳລັບປະເທດທີ່ຈະເຂົ້າຮ່ວມແຂ່ງຂັນລາຍການນີ້ເປັນຄັ້ງທຳອິດແມ່ນປະເທດປາກີສະຖານ ແລະ ເນປານ ເຊິ່ງທັງສອງປະເທດຍັງບໍ່ທັນມີປະສົບການລົງສະໜາມໃນລະດັບນານາຊາດ ສຳລັບລາຍການແຂ່ງຂັນທີມຊາດຍິງແມ່ນຈະເລີ່ມຂຶ້ນໃນວັນສຸກ ແລະ ວັນເສົາທ້າຍອາທິດນີ້ ພາຍໃຕ້ຊື່ງານ ເທສະການລາວຣັກບີ້   ແລະ ຍັງຈະມີການແຂ່ງຂັນລະດັບເຍົາວະຊົນໃນມື້ທຳອິດຂອງງານ ເຊິ່ງເປັນການແຂ່ງຂັນດຶງສາຍແທັກຂອງທີມໃນໂຄງການ  ພາດອິນແບັກ  ໃນຮຸ່ນອາຍຸບໍ່ເກີນ 16 ປີ ທັງຊາຍ ແລະ ຍິງ.

     ນັ້ນແມ່ນການຖະແຫຼງຢືນຢັນຢ່າງເປັນທາງການຂອງ ທ່ານ ວິຣະຢຸດ ຣາທິກຸນ ປະທານສະຫະພັນຣັກບີ້ແຫ່ງຊາດລາວ ພ້ອມດ້ວຍຄະນະ ແລະ ບັນດາຄູເຝິກກີລາຣັກບີ້ ໃນວັນທີ 14 ກຸມພາ 2017 ທີ່ໂຮງແຮມເມີກຽວ ນະຄອນຫຼວງວຽງຈັນ ເຊິ່ງທາງຄະນະໄດ້ໃຫ້ຮູ້ວ່າ ເທສະການລາວຣັກບີ້ປີນີ້ຖືເປັນການສະເຫຼີມສະຫຼອງຄັ້ງທີ 10 ຂອງການຊີງແຊັມວຽງຈັນນານາຊາດ ໂດຍຄັ້ງທຳອິດແມ່ນຈັດຂຶ້ນເມື່ອປີ 2007 ທີ່ສະໜາມກີລາດົງໂດກ ຈາກວັນນັ້ນວົງການກີລາຣັກບີ້ລາວ ກໍສືບຕໍ່ເຕີບໃຫຽ່ຂະຫຽາຍໂຕຂຶ້ນເປັນ 19 ທີມລະດັບສູງທັງຊາຍ ແລະ ຍິງ ທີ່ມີທັງປະເພດທີມ 7 ຄົນ ແລະ 10 ຄົນ ເຊິ່ງໃນປີນີ້ກໍມີ 10 ທີມສະໂມສອນຊາຍສະໝັກເຂົ້າແຂ່ງຂັນ ທັງໝົດລ້ວນແມ່ນທີມໂຮມດາວນັກກີລາຣັກບີ້ຈາກທົ່ວໂລກເຊັ່ນ ອາເມຣິກາ ອົດສະຕຣາລີ ອັງກິດ ແລະ ຮົງກົງ ທີ່ເປັນຜູ່ສະໜັບສະໜູນທີມຣັກບີ້ມາຕະຫຼອດ.

     ໃນເທສະການລາວຣັກບີ້ ທ່ານສາມາດມ່ວນຊື່ນຊົມການແຂ່ງຂັນໄປກັບເຄື່ອງດື່ມຍີ່ຫໍ້ດັງ ແລະ ບັນດາຮ້ານອາຫານຕ່າງໆທີ່ຄອຍບໍລິການ ນອກນັ້ນ ຍັງຈະມີການຈັບສະຫຼາກເພື່ອຮັບຂອງລາງວັນຕ່າງໆທີ່ຈະແຈກພາຍໃນງານ ພິເສດແມ່ນບໍ່ເສຍຄ່າຜ່ານປະຕູ ຢ່າລືມໄປຮ່ວມມ່ວນຊື່ນຊົມ ແລະ ເຊຍຣັກບີ້ ພ້ອມນີ້ ທ່ານສາມາດຊື້ແພັກເກັດກຸ່ມສຳລັບໃຫ້ກຸ່ມໝູ່ ຫຼື ພະນັກງານຂອງທ່ານ ເພື່ອຮັບສິດທີພິເສດພາຍໃນງານ ຫຼື ທ່ານສາມາດຕິດຕາມຜ່ານຊ່ອງທາງ Facebook ແລະ Youtube ເພື່ອຮັບຊົມການຖ່ານທອດສົດ ຂໍ້ມູນເພີ່ມຕື່ມແມ່ນ sponsor@laorugby.com .

ຂ່າວ/ພາບ: ໄຊມຸງຄຸນ

Leave a Reply

Your email address will not be published. Required fields are marked *

*