ເທສະການຮູບເງົາຍີ່ປຸ່ນ ຄັ້ງທີ 2 ເຜີຍມູມມອງທາງວັດທະນະທຳທີ່ແຕກຕ່າງຜ່ານແຜ່ນຟິມ

ເທສະການຮູບເງົາຍີ່ປຸ່ນ ຄັ້ງທີ 2 ເຜີຍມູມມອງທາງວັດທະນະທຳທີ່ແຕກຕ່າງຜ່ານແຜ່ນຟິມ

Posted by

      ພິທີໄຂງານເທສະການຮູບເງົາຍີ່ປຸ່ນ ຄັ້ງທີ 2 ຫຼື The Japanese Film Festival in Vientiane ຢ່າງເປັນທາງການ ໄດ້ຈັດຂຶ້ນເມື່ອຕອນຄ່ຳຂອງວັນທີ 15 ທັນວາ 2017 ທີ່ສູນການຄ້າວຽງຈັນເຊັນເຕີ ງານນີ້ຈັດຂຶ້ນໂດຍສູນອາຊີມູນນິທີຍີ່ປຸ່ນ ປະຈຳນະຄອນຫຼວງວຽງຈັນ ຫຼື The Japan Foundation Asia center, Vientiane ແນໃສ່ນຳສະເໜີຜົນງານຜ່ານແຜ່ນຟິມເຊິ່ງມີກິ່ນອາຍຂອງວິຖີວັດທະນະທຳທີ່ແຕກຕ່າງ ເພື່ອສ້າງແຮງບັນດານໃຈໃຫ້ສັງຄົມປັດຈຸບັນມຸ່ງໝັ້ນຕັ້ງໜ້າສ້າງ ແລະ ມອບສິ່ງດີໆແກ່ກັນ ແລະກັນ.

       ເຂົ້າຮ່ວມໃນພິທີຄັ້ງນີ້ມີ ທ່ານ ຊົມພູ ດວງສະຫວັນ ປະທານກວດກາ ຄະນະພັກສະພາແຫ່ງຊາດ ແລະປະທານກຳມາທິການວັດທະນະທຳສັງຄົມ ທ່ານ ທາເຄຊິ ຮິກິຮາຣະ ເອກອັກຄະລາຊະທູດຍີ່ປຸ່ນ ປະຈຳ ສປປ ລາວ ພ້ອມພັນລະຍາ ທ່ານ ຮິໂລຊິ ອຸຊິດາ ຜູ້ອຳນວຍການ Japan Foundation Asia center ປະຈຳນະຄອນຫຼວງວຽງຈັນ ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວ ແຫ່ງ ສປປ ລາວ ທ່ານ ສົມບັດ ສິຣິພອນວິທະຍາ ຜູ້ອຳນວຍການໃຫຍ່ສູນການຄ້າວຽງຈັນເຊັນເຕີ ທ່ານ ເທບມະຫາວິໄຊ ໄຊທິລາດ ຫຼື ຕ້າ ເອແພັກ ສິລະປິນ ນັກຮ້ອງຊື່ດັງ ທັງເປັນຜູ້ອຳນວຍການບໍລິສັດກ້າວໜ້າ ເອັນເຕີເທັນເມັນ ຈຳກັດ ມີບັນດາແຂກຖືກເຊີນ ບັນດາສິລະປິນຊື່ດັງຂອງລາວ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

      ສູນອາຊີມູນນິທີຍີ່ປຸ່ນ ແມ່ນອົງການດຽວທີ່ດຳເນີນໂຄງການແລກປ່ຽນທາງວັດທະນະທຳລະຫວ່າງປະເທດທີ່ຄອບຄຸມທົ່ວໂລກ ກໍ່ຕັ້ງຂຶ້ນເມື່ອປີ 1972 ໃນຖານະນິຕິບຸກຄົນສະເພາະກິດ ພາຍໃຕ້ການຄຸ້ມຄອງຂອງກະຊວງການຕ່າງປະເທດຍີ່ປຸ່ນ ສຳລັບເທສະການຮູບເງົາຍີ່ປຸ່ນ ຄັ້ງທີ 2 ແມ່ນໄດ້ຈັດສາຍຮອບທຳອິດໃນລະຫວ່າງວັນທີ 16-17 ທັນວາ ແລະ ຈັດສາຍຮອບທີສອງໃນລະຫວ່າງວັນທີ 22-24 ທັນວາ 2017 ເຊິ່ງໃນປີນີ້ ສູນອາຊີມູນນິທີຍີ່ປຸ່ນ ຮ່ວມກັບໂຮງຮູບເງົາ Major Platinum Cineplex ວຽງຈັນ ແລະ ສະຖານທູດຍີ່ປຸ່ນ ປະຈໍາລາວ ໄດ້ນໍາສະເໜີສະເໜີຮູບເງົາໃໝ່ຫຼ້າສຸດ 7 ເລື່ອງຄື“Rudolf the Black Cat” “Her Love Boils Bathwater” “ReLIFE” “Let’s Go, JETS!” “MUMON” “In this Corner of the World” ແລະ“Survival Family” ໂດຍຮູບເງົາທັງໝົດນີ້ຖືເປັນຜົນງານຄຸນະພາບ ແລະ ຖືເປັນສື່ກາງທາງວັດທະນະທຳທີ່ແຕກຕ່າງກັນຂອງຄົນທົ່ວໂລກ ຜ່ານການເລົ່າເລື່ອງ ແລະ ເຕັກນິກການຖ່າຍທຳທີ່ຫຼາກຫຼາຍ ພ້ອມນີ້ ສູນອາຊີມູນນິທິຍີ່ປຸ່ນ ກໍໄດ້ຈັດເທສະການຮູບເງົາຍີ່ປຸ່ນໃນ 12 ປະເທດກຸ່ມອາຊຽນ ຮວມທັງອົດສະຕຣາລີ ແລະ ອິນເດຍ ນອກນັ້ນ ຍັງໄດ້ນຳເອົາຮູບເງົາຂອງອາຊີເຂົ້າຮ່ວມສາຍໃນເທສະການຮູບເງົາສາກົນໂຕກຽວໃນທຸກໆປີອີກດ້ວຍ.

      ພິເສດ ເພື່ອຊີງລາງວັນ ສົ່ງ Review ດີເດັ່ນ ພຽງສົ່ງ Review ຮູບເງົາຂອງທ່ານມາທີ່ເວັບໄຊ www.la.japaesefilmfest.org ຫຼື ສາມາດສະແກນທີ່ຢູ່ເວັບໄຊໄດ້ທີ່ດ້ານຫຼັງໃບປິວ ຫຼື ໂປສກາສ ທີ່ທີມງານແຈກໃຫ້ ເຊິ່ງຜູ້ຊະນະເລີດຈະໄດ້ຮັບສິດເຂົ້າຮ່ວມງານເທສະການຮູບເງົານານາຊາດໂຕກຽວ ແລະ ຍັງຈະໄດ້ຮຽນຮູ້ວັດທະນະທຳຍີ່ປຸ່ນເປັນເວລາທັງໝົດ 4 ວັນ ສອບຖາມຂໍ້ມູນເພີ່ມເຕີມໄດ້ທີ່ນໍາເບີໂທລະສັບ 856-21 240280 ອີເມວ: info@jfacvt.la ເຟສບຸກ: Japan Foundation Asia center, Vientiane.

ຂ່າວ: ໄຊມຸງຄຸນ

Leave a Reply

Your email address will not be published. Required fields are marked *

*