ເຜີຍສິ່ງດີໆ ຈາກຊາວກະສິກຳອິນຊີກຸ່ມຊຽງດາ

ເຜີຍສິ່ງດີໆ ຈາກຊາວກະສິກຳອິນຊີກຸ່ມຊຽງດາ

Posted by

     ຊີວິດຊາວສວນກະສິກຳອິນຊີ ເຮັດໃຫ້ວິຖີການເປັນຢູ່ຂອງຄອບຄົວລຸງສີທົນ ແລະ ປ້າຕຸ້ມ ບຸນປະເສີດ ມີການປ່ຽນແປງໄປໃນທາງທີ່ດີ ບໍ່ວ່າຈະເປັນສຸຂະພາບ ລາຍໄດ້ ແລະ ການພົບປະ ຫຼື ຊື່ສຽງ ໃນສັງຄົມ “ໃຜສິວ່າຊາວສວນຄືພວກເຮົາຈະໄດ້ຮັບການເອົາໃຈໃສ່ຈາກພາກລັດເຖິງຂັ້ນຈັດແຫຼ່ງຄ້າຂາຍສະເພາະໃຫ້ ດີໃຈແທ້ໆນັກຂ່າວເອີ້ຍ!” ປ້າຕຸ້ມ ກ່າວ.

     ຄູ່ຜົວເມຍໃນໄວ 50 ກວ່າປີ ມີຮອຍຍິ້ມທີ່ຈິງໃຈໃນຂະນະໃຫ້ສຳພາດກັບທີມຂ່າວພວກເຮົາ ເມື່ອສັບປະດາທີ່ຜ່ານມາວ່າ “ໃນນາມຊາວບ້ານຊຽງດາ ເມືອງໄຊເຊດຖາ ນະຄອນຫຼວງວຽງຈັນ ທີ່ຍຶດອາຊີບກະສິກຳ (ສວນຜັກ) ມາຕັ້ງແຕ່ເຊັ່ນພໍ່ແມ່ ບັນພະບຸລຸດ ແຕ່ຕົກມາໃນຍຸກສະໄໝຂອງລຸງທົນ ແລະ ປ້າຕຸ້ມ ແມ່ນສຸມໃສ່ການຜະລິດຕິດພັນການນຳໃຊ້ຝຸ່ນເຄມີ ແລະ ຢາຂ້າສັດຕູພືດເປັນຫຼັກ ຈິ່ງເຮັດໃຫ້ສຸຂະພາບບໍ່ແຂງແຮງ (ເຈັບອອດໆແອດໆ) ທັງແບກຮັບໜີ້ຄ່າຝຸ່ນ ຄ່າຢາ ຂາຍຜັກ ຂາຍໝາກຖົ່ວ ຂາຍໝາກແຕງໄດ້ມາກໍເອົາໄປໃຊ້ໜີ້ໝົດ ແລ້ວຈິ່ງຢືມໃໝ່ ເມື່ອມີໂຄງການກະສິກຳອິນຊີເຂົ້າມາແລ້ວ ຄອບຄົວຕົນກໍຫັນປ່ຽນການຜະລິດ ຈິ່ງເຫັນໄດ້ວ່າຖານະການເປັນຢູ່ ແລະ ສະພາບຮ່າງກາຍມີອັນແຕກຕ່າງໃນທາງທີ່ດີຂຶ້ນຢ່າງເຫັນໄດ້ຄັກ.

ປ້າຕຸ້ມ ກະສິກອນສວນພືດອິນຊີ ບ້ານຊຽງດາ ເມືອງໄຊເຊດຖາ ນະຄອນຫຼວງວຽງຈັນ.

ລຸງສິທົນ ກະສິກອນອິນຊີ ບ້ານຊຽງດາ ເມືອງໄຊເຊດຖາ ນະຄອນຫຼວງວຽງຈັນ.

     ໃນເນື້ອທີ່ການຜະລິດປະມານ 4 ໄລ່ ແຕ່ກໍເຮັດໃຫ້ຄອບຄົວລຸງສີທົນ ແລະ ປ້າຕຸ້ມ ມີຜົນຜະລິດປ້ອນຕະຫຼາດອິນຊີອາທິດລະ 4 ເທື່ອ ເຊິ່ງປະກອບມີ ຜັກສະຫຼັດ ຜັກຫົມ ຜັກບົ້ງ ຜັກຫອມລາບ ໝາກເຜັດ ໝາກແຕງ ໝາກຖົ່ວ ແລະ ອື່ນໆ ອັນໄດ້ເຮັດໃຫ້ສອງຜົວເມຍມີລາຍໄດ້ສະໝ່ຳສະເໝີ  “ບໍ່ຮັ່ງມີລ້ຳລວຍແຕ່ກໍມີຢູ່ມີກິນ ມີຄວາມສະບາຍກາຍ ສະບາຍໃຈ ແລະ ເບີກບານມ່ວນຊື່ນ ຕື່ນຂຶ້ນມາກໍໄດ້ກິນອາຫານດີໆທີ່ຊື້ ຫຼື ຜະລິດ ຈາກຕະຫຼາດ ແລະ ສວນອິນຊີ ມີຄວາມສາມັກຄີໃນກຸ່ມການຜະລິດ ແລະ ມີໂອກາດໄດ້ພົບປະລູກຄ້າທີ່ແມ່ນບັນດາຄົນຮັກສຸຂະພາບທັງນັ້ນ”  ຍອດຂາຍນັ້ນບໍ່ຂໍເປີດເຜີຍ ແຕ່ພໍ່ລຸງແມ່ປ້າກໍຍິ້ມເປີ້ຍເມື່ອນັກຂ່າວຖາມເລື່ອງລາຍໄດ້.

     ສຳລັບຝຸ່ນທີ່ນຳມາໃສ່ແມ່ນມີການຈັດສັນປັນສ່ວນຝຸ່ນຄອກທີ່ທາງຄະນະກຸ່ມຊື້ມາແລ້ວກໍມີການໝັກບົ່ມ ໂດຍການເຝິກອົບຮົມຈາກຫ້ອງການກະສິກຳ ແລະປ່າໄມ້ເມືອງໄຊເຊດຖາ ນະຄອນຫຼວງວຽງຈັນ ທັງນີ້ ປ້າຕຸ້ມ ກໍແຍ້ມໃຫ້ຮູ້ວ່າ  “ປັດຈຸບັນ ພວມສະເໜີທາງຄະນະເພື່ອເອົາຄອບຄົວລູກເຊິ່ງເປັນຊາວກະສິກອນເຂົ້າມາເປັນສະມາຊິກກຸ່ມຜະລິດພືດຜັກອິນຊີຊຽງດາ ໂດຍຫວັງວ່າຈະເປັນຜູ່ສືບທອດວຽກງານກະສິກຳອິນຊີທີ່ພໍ່ແມ່ຮັກ ແລະ ພາກພູມໃຈ ຍ້ອນໄດ້ໃຫ້ສິ່ງດີໆຕໍ່ສັງຄົມ ກໍຄືຜູ້ບໍລິໂພກ ແລະ ສາມາດປ່ຽນແປງຕົນເອງໃນທາງທີ່ດີຂຶ້ນໄດ້”.

ໂດຍ: ສົມຈັນ ບົວພາ

 

Leave a Reply

Your email address will not be published. Required fields are marked *

*