ເສີມ​ຂະ​ຫຽາ​ຍມູນ​ເຊື້ອ ​ວັນຊາດ​ທີ 02 ທັນວາ

ເສີມ​ຂະ​ຫຽາ​ຍມູນ​ເຊື້ອ ​ວັນຊາດ​ທີ 02 ທັນວາ

Posted by

     ວັນທີ 02 ທັນວາ 2016 ຜ່ານມາ ແມ່ນວັນຊາດແຫ່ງສາທາລະນະລັດ ປະຊາທິປະໄຕ ປະຊາຊົນລາວ ທີ່ໄດ້ໝູນວຽນມາບັນຈົບຄົບຮອບ 41 ປີ (02 ທັນວາ 1975 – 02 ທັນວາ 2016) ໃນໂອກາດນີ້ ຫຼາຍໜ່ວຍງານ ຫຼາຍອົງການຈັດຕັ້ງ ນັບທັງພັກ-ລັດ ແລະ ປະຊາຊົນຫຼາກຫຼາຍສາຂາອາຊີບ ກໍໄດ້ສະເຫຼີມສະຫຼອງດ້ວຍຫຼາກຫຼາຍຮູບການທີ່ເຕັມໄປດ້ວຍຄວາມໝາຍເລິກເຊິ່ງ.

     41 ປີ ແຫ່ງການປົກປັກຮັກສາ ແລະສ້າງສາພັດທະນາປະເທດຊາດ ກໍຄື 41 ປີແຫ່ງການສ້າງຕັ້ງລະບອບໃໝ່ ທີ່ປະຊາຊົນລາວໃນທົ່ວປະເທດໄດ້ພ້ອມກັນອອກແຮງເພື່ອປົກປັກຮັກສາໝາກຜົນຂອງການປະຕິວັດພາຍໃຕ້ການນຳພາຂອງພັກປະຊາຊົນປະຕິວັດລາວ ໂດຍມີສະຫາຍເລຂາທິການໃຫຽ່ ໄກສອນ ພົມວິຫານ ຜູ້ນຳທີ່ແສນເຄົາລົບຮັກທີ່ໄດ້ເຕົ້າໂຮມ ແລະ ນຳພາປະຊາຊົນບັນດາເຜົ່າກ້າວຂຶ້ນຝ່າຟັນອຸປະສັກ ແລະ ຄວາມຫຽຸ້ງຍາກນານັບປະການ ແລະ ນັບວັນຍິ່ງມີບາດກ້າວເຕີບໃຫຽ່ຂະຫຽາຍໂຕ.

     ມາເຖິງປັດຈຸບັນ ສປປ.ລາວ ກໍປຽບດັ່ງໄວໜຸ່ມທີ່ພຸ່ງກ້າວເຂົ້າສູ່ໄລຍະແຫ່ງການພັດທະນາໃນຍຸກເຊື່ອມໂຍງ ໝາກຜົນຂອງການປົກປັກຮັກສາຄວາມເປັນເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນ ແຕ່ໄລຍະປົດປ່ອຍໃໝ່ມາເຖິງວັນນີ້ ເຮັດໃຫ້ປະເທດຊາດກໍມີຄວາມໝັ້ນຄົງ ມີສະຖຽນລະພາບທາງດ້ານການເມືອງ ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍ ການພັດທະນາເສດຖະກິດ-ສັງຄົມມີການຂະຫຽາຍໂຕຕໍ່ເນື່ອງ  ສະເພາະໃນໄລຍະ 15 ປີທີ່ຜ່ານມາ (2001-2015) ສປປ.ລາວ ໄດ້ມີຄວາມຄືບໜ້າທາງດ້ານການພັດທະນາເສດຖະກິດ-ສັງຄົມ ເສດຖະກິດແຫ່ງຊາດ GDP ໄດ້ຂະຫຽາຍໂຕດ້ວຍຈັງຫວະໄວ ແລະ ຕໍ່ເນື່ອງ ສະເຫຼ່ຍ 7,4% ຕໍ່ປີ GDP ສະເຫຼ່ຍຕໍ່ຫົວຄົນໄດ້ ເພີ່ມຂຶ້ນຈາກ 319 ໂດລາສະຫະລັດໃນສົກປີ 2000-2001 ມາເປັນ 1.671 ໂດລາສະຫະລັດໃນສົກປີ 2013-2014 ແລະ ຄາດວ່າຈະໄດ້ປະມານ 1.670 ໂດລາສະຫະລັດໃນສົກປີ 2014-2015 ແລະ ໃນປີ 2011 ທະນາຄານໂລກໄດ້ເລື່ອນ ສປປ.ລາວ ຈາກກຸ່ມປະເທດທີ່ມີລາຍໄດ້ຕ່ຳ (Low Income Countries) ຂຶ້ນມາສູ່ກຸ່ມປະເທດທີ່ມີລາຍໄດ້ປານກາງລະດັບຕ່ຳ (Lower-Middle Income Countries).

     ສປປ.ລາວ ມີຄວາມຄືບໜ້າໃນການກະກຽມຄວາມພ້ອມເພື່ອນຳເອົາປະເທດໃຫ້ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ (LDCs) ອີງຕາມການປະເມີນຂອງສາກົນໃນປີ 2015 ເຫັນວ່າ ລາຍໄດ້ແຫ່ງຊາດສະເຫຼ່ຍ (GNI) ປະຕິບັດໄດ້ 1.232 ໂດລາສະຫະລັດຕໍ່ຫົວຄົນ ເທົ່າກັບ 99% ຂອງມາດຖານ (ມາດຖານແມ່ນ 1.242 ໂດລາສະຫະລັດ) ດັດຊະນີຊັບສິນມະນຸດ (HAI) ໄດ້ 60,8 ເທົ່າກັບ 92% ຂອງມາດຖານ (ມາດຖານຕ້ອງສູງກວ່າ 66) ດັດຊະນີຄວາມບອບບາງທາງດ້ານເສດຖະກິດ (EVI) ຢູ່ໃນລະດັບ 36,2 ເທົ່າກັບ 88% ຂອງມາດຖານ (ມາດຖານຕ້ອງຕ່ຳກວ່າ 32).

     ໃນໄລຍະ 15 ປີທີ່ຜ່ານມາ ໂດຍປະຕິບັດຕາມແນວທາງປ່ຽນແປງໃໝ່ຂອງພັກ ປະເທດເຮົາກໍໄດ້ປະສົບຜົນສຳເລັດໃນການພັດທະນາສັງຄົມ ແລະ ການປົກປັກຮັກສາສິ່ງແວດລ້ອມເຊັ່ນ ລະບົບການສຶກສາໄດ້ຮັບການປັບປຸງເຂົ້າສູ່ລວງເລິກ ໂດຍຖືເອົາການພັດທະນາຊັບພະຍາກອນມະນຸດເປັນໃຈກາງ ໄດ້ສຳເລັດການຮຽນຈົບຊັ້ນປະຖົມບຳລຸງທົ່ວປະເທດ ໄດ້ປັບປຸງ ຍົກລະດັບການບໍລິການດ້ານສາທາລະນະສຸກ ແລະ ວັດທະນະທຳຂອງປະຊາຊົນເຮົາໃຫ້ສູງຂຶ້ນຕື່ມ ໄດ້ປັບປຸງອົງການຄຸ້ມຄອງ ແລະ ພັດທະນານິຕິກຳທີ່ກ່ຽວຂ້ອງກັບການປົກປັກຮັກສາສິ່ງແວດລ້ອມຕາມທິດພັດທະນາແບບຍືນຍົງ ການເຊື່ອມໂຍງເສດຖະກິດກັບພາກພື້ນ ແລະ ສາກົນນັບມື້ນັບເຂົ້າສູ່ລວງເລິກ ສປປ.ລາວ ໄດ້ເຂົ້າເປັນສະມາຊິກຂອງອົງການການຄ້າໂລກ ໃນຕົ້ນປີ 2013 ໄດ້ເຂົ້າຮ່ວມປະຊາຄົມເສດຖະກິດອາຊຽນ ໃນທ້າຍປີ 2015 ແລະ ເປັນເຈົ້າພາບກອງປະຊຸມລະດັບສາກົນທີ່ສຳຄັນຕ່າງໆ ເຊິ່ງເຮັດໃຫ້ ສປປ.ລາວ ມີບົດບາດພົ້ນເດັ່ນຂຶ້ນໃນເວທີສາກົນ.

     ປັດຈຸບັນ ສະພາບແວດລ້ອມພວມມີການປ່ຽນແປງຢ່າງວ່ອງໄວພາຍໃຕ້ກະແສໂລກາພິວັດ ແລະ ການເຊື່ອມໂຍງໃນພາກພື້ນ ແລະສາກົນ ດັ່ງນັ້ນ ຍິ່ງກວ່າເວລາໃດໝົດຈິ່ງຮຽກຮ້ອງໃຫ້ປະຊາຊົນບັນດາເຜົ່າຕ້ອງມີຄວາມບຸກບືນ ເສີມຂະຫຽາຍຈິດໃຈຊາດ ແລະ ນ້ຳໃຈວັນຊາດທີ 02 ທັນວາ ເຂົ້າໃນການປະຕິບັດມະຕິກອງປະຊຸມໃຫຽ່ ຄັ້ງທີ X ຂອງພັກໃຫ້ປາກົດຜົນເປັນຈິງ ເພື່ອສ້າງສັງຄົມມີປະຊາທິປະໄຕ ມີຄວາມຍຸຕິທຳ ແລະ ສີວິໄລ.

ໂດຍ: ສ.ບົວພາ

Leave a Reply

Your email address will not be published. Required fields are marked *

*