ແຂວງຫຼວງພະບາງ ສະຫຼຸບວຽກງານ ຮສສ ແຮງງານ ແລະສະຫວັດດີການສັງຄົມປະຈໍາປີ 2016

ແຂວງຫຼວງພະບາງ ສະຫຼຸບວຽກງານ ຮສສ ແຮງງານ ແລະສະຫວັດດີການສັງຄົມປະຈໍາປີ 2016

Posted by

     ກອງປະຊຸມສະຫຼຸບວຽກງານແຮງງານ ແລະສະຫວັດດີການສັງຄົມແຂວງຫຼວງພະບາງ ປະຈໍາປີ 2016 ໂດຍການໃຫ້​ກຽດເຂົ້າຮ່ວມ ແລະ ໂອ້ລົມຂອງ​ ທ່ານ ຄຳ​ແພງ ​ໄຊ​ສົມ​ແພງ ລັດຖະມົນຕີ​ກະຊວງ​ແຮງ​ງານ ​ແລະສະຫວັດດີ​ກາ​ນສັງຄົມ (ຮສສ) ມີທ່ານຮອງເຈົ້າແຂວງ ​ບັນດາຫົວໜ້າພະແນກ ຮອງຫົວໜ້າພະແນກ ພະນັກງານ ວິຊາການຫຼັກແຫຼ່ງ ແລະ ຜູ່ກ່ຽວຂ້ອງເຂົ້າ​ຮ່ວມ​​ຢ່າງພ້ອມພຽງ.

     ກອງປະຊຸມດັ່ງກ່າວໄດ້ຈັດຂຶ້ນຢ່າງເປັນທາງການໃນລະຫວ່າງວັນທີ 14-15 ກຸມພາ 2017 ທີ່ແຂວງຫຼວງພະບາງ ໂດຍ ທ່ານ ຄຳຫວັນ ວັນວິໄລ  ຫົວໜ້າພະແນກ ຮສສ ແຂວງ ໄດ້ຂຶ້ນຜ່ານບົດສະຫຼຸບລາຍງານການຈັດຕັ້ງປະຕິບັດວຽກງານແຮງງານ ແລະສະຫວັນດີການສັງຄົມ ສົກປີ 2015-2016  ເຊິ່ງໄດ້ຕີລາຄາດ້ານດີ ດ້ານອ່ອນ ຜົນສຳເລັດການຈັດຕັ້ງປະຕິບັດວິຊາສະເພາະແຕ່ລະດ້ານ ແລະ ຖອດຖອນບົດຮຽນທີ່ເຮັດໄດ້ໃນຊຸມປີຜ່ານມາ ພ້ອມທັງສະເໜີທິດທາງແຜນການປີ 2017 ແລະ ຮັບຟັງການສະເໜີບົດວິຊາການກ່ຽວກັບແຜນພັດທະນາວຽກງານແຮງງານ ແລະ ສະຫວັດດີການສັງຄົມ ໂດຍສຸມໃສ່ໂຕຊີ້ວັດ ຕາມໂຕເລກຄາດໝາຍສູ້ຊົນແຕ່ລະດ້ານ ບົດສະເໜີການ​ຍົກສູງການຮ່ວມ​ມືສາກົນທີ່ມີປະສິດທິຜົນ ບັນດາມາດຕະການໃນການຈັດຕັ້ງປະຕິບັດໂຕເລກຄາດໝາຍສູ້ຊົນ ເປັນຕົ້ນແມ່ນໂຕເລກການພັດທະນາສີມືແຮງງານ ການຈັດຫາງານ ການຄຸ້ມຄອງແຮງງານ ການຂະຫຽາຍອັດຕາປົກຄຸມປະກັນສັງຄົມ ແລະ ການບໍລິການປິ່ນປົວສຸຂະພາບໃຫ້ຜູ່ປະກັນຕົນ ການປະຕິບັດນະໂຍບາຍສະແດງຄວາມກະຕັນຍູຮູ້ບຸນຄຸນຕໍ່ຜູ່ມີຜົນງານ ການຄຸ້ມຄອງກອງທຶນສົງເຄາະ ແລະ ການຊ່ອຍເຫຼືອເດັກດ້ອຍໂອກາດ ການເກັບກູ້ລະເບີດ ແລະ ວຽກງານກາແດງ ຫຼັງຈາກນັ້ນ ຜູ່ເຂົ້າຮ່ວມກອງປະຊຸມກໍໄດ້ພ້ອມກັນປະກອບຄໍາຄິດເຫັນໃສ່ຄຳຖາມເຈາະຈີ້ມຢ່າງກົງໄປກົງມາດ້ວຍບັນຍາກາດທີ່ສ້າງສັນ.

     ນຶ່ງໃນວາລະສຳຄັນແມ່ນກອງປະຊຸມໄດ້ຮັບຟັງການໂອ້ລົມໂດຍທ່ານລັດຖະມົນຕີກະຊວງແຮງງານ ແລະສະຫວັດດີການສັງຄົມ ເຊິ່ງທ່ານໄດ້ເນັ້ນໜັກໃຫ້ພ້ອມກັນເອົາໃຈໃສ່ເພີ່ມທະວີຄວາມຮັບຜິດຊອບ ແລະ ຄວາມເປັນເຈົ້າການໃນການຄົ້ນຄວ້າ ການບໍລິຫານວຽກງານ ຮສສ ໃຫ້ມີປະສິດທິພາບສູງຂຶ້ນ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນປັດຈຸບັນ ກໍຄືການບໍລິຫານວຽກງານແຮງງານ ແລະ ສະຫວັດດີການສັງຄົມ ໃຫ້ເຂົ້າສູ່ລວງເລິກ ເປັນລະບົບທົ່ວເຖິງສັງຄົມ ຄຽງຄູ່ກັບການສຶກສາອົບຮົມການເມືອງແນວຄິດໃຫ້ສະມາຊິກພັກ-ພະນັກງານ-ລັດຖະກອນ ໃຫ້ມີຄວາມອຸ່ນອຽນທຸ່ນທ່ຽງ ເຊື່ອມຊຶມມະຕິກອງປະຊຸມໃຫຽ່ ຄັ້ງທີ X ຂອງພັກປະຊາຊົນປະຕິວັດລາວ ​ກົດລະບຽບຂອງພັກ ມີຄວາມສາມັກຄີເປັນເອກະພາບ ແລະ ເຊື່ອໝັ້ນຕໍ່ການນຳພາຂອງພັກ ພ້ອມກັນຈັດຕັ້ງປະຕິບັດໜ້າທີ່ວິຊາສະເພາະຢ່າງຫ້າວຫັນ ກົມກຽວ ແລະ ມີຜົນສໍາເລັດ ເຊິ່ງພະນັກງານໃນຂົງເຂດ ຮສສ ຕ້ອງບຸກບືນຫ້າວຫັນ ແລະ ມີຄວາມຮັບຜິດຊອບຕໍ່ການມອບໝາຍ ປະຕິບັດລະບຽບວິໄນຕໍ່ການຈັດຕັ້ງ ມະຕິຄໍາສັ່ງ ພ້ອມນີ້ ກໍຕ້ອງມີແບບແຜນວິທີເຮັດວຽກໃໝ່ ແລະ ຕ້ອງປະສານສົມທົບກັບພາກສ່ວນກ່ຽວຂ້ອງ ໂດຍສະເພາະກໍແມ່ນການປະສານກັບທາງກະຊວງ ແລະ ແຂວງ ພ້ອມນັ້ນ ກໍຕ້ອງຍາດແຍ່ງການຊ່ອຍເຫຼືອຈາກອົງການຈັດຕັ້ງສາກົນ ເພື່ອເຮັດໃຫ້ວຽກງານເຄື່ອນໄຫວໄປຕາມພາລະບົດບາດ ໜ້າທີ່ ແລະ ຕາມແຜນການທີ່ໄດ້ກໍານົດໄວ້ໃຫ້ມີຜົນສຳເລັດ.

ຂ່າວ/ພາບ: ສ.ບົວພາ

Leave a Reply

Your email address will not be published. Required fields are marked *

*