ແຂວງໄຊຍະບຸລີ ຢືນຢັນ ມະຫະກໍາບຸນຊ້າງປີນີ້ຈະມີຫຼາຍກິດຈະກຳ  ແລະ ສໍາຜັດກັບວິຖີຊຸມຊົົນພື້ນເມືອງ

ແຂວງໄຊຍະບຸລີ ຢືນຢັນ ມະຫະກໍາບຸນຊ້າງປີນີ້ຈະມີຫຼາຍກິດຈະກຳ ແລະ ສໍາຜັດກັບວິຖີຊຸມຊົົນພື້ນເມືອງ

Posted by

      ມະຫະກຳບຸນຊ້າງແຂວງໄຊຍະບູລີ ປະຈຳປີ 2018 ຈະເລີ່ມຂຶ້ນໃນລະຫວ່າງວັນທີ 16-22 ກຸມພາ 2018 ເຊິ່ງພິທີໄຂງານຢ່າງເປັນທາງການຈະຈັດຂຶ້ນໃນວັນທີ 17 ກຸມພາ ໂດຍຈະມີຊ້າງເຂົ້າຮ່ວມທັງໝົດ 69 ໂຕ ພ້ອມທັງຈະຈັດໃຫ້ມີຫຼາກຫຼາຍກິດຈະກຳໜ້າສົນໃຈທີ່ເນັ້ນໃສ່ການວາງສະແດງ-ຂາຍສິນຄ້າຫັດຖະກຳປະຈຳທ້ອງຖິ່ນ ແລະ ສິນຄ້າອຸປະໂພກບໍລິໂພກ ຮວມເຖິງອາຫານພື້ນບ້ານ ແລະ ການສະແດງສິລະປະວັນນະຄະດີ ຄຽງຄູ່ກັບການນຳສະເໜີບັນດາແຫຼ່ງທ່ອງທ່ຽວສຳຄັນຂອງແຂວງໄຊຍະບູລີ.

      ທ່ານ ຍັນຍົງ ສີປະເສີດ ຮອງເຈົ້າແຂວງໆໄຊຍະບູລີ ທັງເປັນປະທານຈັດງານມະຫະກໍາບຸນຊ້າງໄດ້ຖະແຫຼງຂ່າວຕໍ່ສື່ມວນຊົນໃນຕົ້ນເດືອນນີ້ວ່າ ງານມະຫະກໍາບຸນຊ້າງແຂວງໄຊຍະບູລີ ເປັນບຸນປາງໃຫຍ່ຂອງຊາດ ເຊິ່ງຈະເຜີຍໃຫ້ເຫັນບົດບາດ ແລະ ເອກະລັກຂອງແຂວງ ນີ້ແມ່ນກິດຈະກຳສຳຄັນທີ່ມີວັດຖຸປະສົງເພື່ອອະນຸຮັກຊ້າງລາວເຊິ່ງເປັນມູນມໍລະດົກຂອງຊາດ ທັງເປັນມິ່ງຂວັນຄູ່ບ້ານຄູ່ເມືອງ ພ້ອມນີ້ ກໍເພື່ອສືບສານການອະນຸຮັກວັດທະນະທຳ ຮີດຄອງປະເພນີອັນດີງາມ ແລະ ວິຖີການດຳລົງຊີວິດຂອງປະຊາຊົນບັນດາເຜົ່າໃນແຂວງໄຊຍະບູລີ ທີ່ຕິດພັນກັບຊ້າງມາແຕ່ອະດີດຕະການ ໂດຍທາງແຂວງຈະຈັດຄວບຄູ່ກັບພິທີເປີດປີທ່ອງທ່ຽວຂອງແຂວງ.

(ຮູບປະກອບ) ມະຫະກໍາບູນຊ້າງ ແຂວງໄຊຍະບຸລີ.

      ໃນຕະຫຼອດໄລຍະການຈັດງານ ຫຼັກໆແມ່ນຈະເນັ້ນໜັກກິດຈະກຳທີ່ຕິດພັນກັບຊ້າງ ແລະ ການອະນຸຮັກຊ້າງ ຜ່ານການສະແດງຂອງຊ້າງຄຳຮູ້ ເຊິ່ງຈະຍົກລະດັບໃຫ້ມີຄວາມຫຼາກຫຼາຍສີສັນກວ່າປີທີ່ຜ່ານມາ ພ້ອມກັນນີ້ ໃນແຕ່ລະວັນ ແມ່ນຈະຈັດໃຫ້ມີກິດຈະກໍານຳທ່ຽວຕາມແຫຼ່ງທ່ອງທ່ຽວທຳມະຊາດທີ່ສວຍງາມຖ້ຳນ້ຳທັ່ງ ຖ້ຳຜາຂີ້ມິ້ນ ຖ້ຳລະຄັງສະຫວັນ ກົກໄມ້ຂ່າໃຫຍ່ອາຍຸຫຼາຍຮ້ອຍປີ ນ້ຳຕົກຕາດເຈົ້າ ເຫຼົ່ານີ້ເປັນຕົ້ນ ພ້ອມທັງການຢ້ຽມຊົມ ແລະ ຮຽນຮູ້ ເຊັ່ນ ຮີດຄອງປະເພນີ ແລະ ວິຖີວັດທະນະທໍາຂອງປະຊາຊົນບັນດາເຜົ່າທີ່ຖືເປັນເອກະລັກຂອງແຂວງໄຊຍະບູລີ ເຊັ່ນ ວິຖີຊີວິດຂອງເຜົ່າຕອງເຫຼືອງ ວັດທະນະທຳເຜົ່າລື້ ແລະ ເຜົ່າອື່ນໆ ເຊິ່ງຍັງຄົົງອະນຸຮັກຂະນົບທຳນຽມດັ່ງເດີມໄວ້ໄດ້ຢ່າງມີສະເໜ.

      ວາລະດຽວກັນ ກໍຍັງຈະຈັດພິທີກໍາທາງສາສະໜາເຊັ່ນ ພິທີເຮັດບຸນຕັກບາດອຸທິດບຸນກຸສົນໃຫ້ຊ້າງ ການວາງສະແດງສິນຄ້າ ໜຶ່ງເມືອງໜຶ່ງຜະລິດຕະພັນຈາກພາຍໃນ ແລະ ຕ່າງປະເທດ ສິນຄ້າກະສິກຳ ຫັດຖະກຳ ອຸດສາຫະກຳປຸງແຕ່ງທີ່ເປັນເອກະລັກຂອງທ້ອງຖິ່ນ ການສະແດງຄອນເສີດ ແລະ ການສະແດງສິລະປະວັນນະຄະດີຈາກພາກສ່ວນຕ່າງໆ ໂດຍທ່ານຮອງເຈົ້າແຂວງໆໄຊຍະບູລີ ຍັງໄດ້ເຊີນຊວນພີ່ນ້ອງຊາວລາວຈົ່ງກຽມໂຕກຽມໃຈໄປຮ່ວມຊົມງານມະຫະກຳບຸນຊ້າງຄັ້ງນີ້ ເພື່ອປະກອບສ່ວນສຳຄັນເຂົ້າໃນການພັດທະນາອຸດສະຫະກຳທ່ອງທ່ຽວພາຍໃນປະເທດໃຫ້ຂະຫຍາຍໂຕ ແລະ ມີຄວາມຍືນຍົງ.

ຂ່າວ: ສົດໃສ

Leave a Reply

Your email address will not be published. Required fields are marked *

*