ແຂວງ​ສາລະວັນ ໄຂ​ສູນ​ວິຊາ​ຊີບ​ເພື່ອ​ພັດທະນາ​ທັກສະ ແລະສີມືແຮງງານໃຫ້​ແກ່​ເອື້ອຍ​ນ້ອງ​ແມ່ຍິງ

ແຂວງ​ສາລະວັນ ໄຂ​ສູນ​ວິຊາ​ຊີບ​ເພື່ອ​ພັດທະນາ​ທັກສະ ແລະສີມືແຮງງານໃຫ້​ແກ່​ເອື້ອຍ​ນ້ອງ​ແມ່ຍິງ

Posted by

      ​ສະຫະພັນ​ແມ່ຍິງ​ແຂວງ​ສາລະ​ວັນ​ ໄດ້​ຈັດ​ພິທີໄຂ​ສູນ​ວິຊາ​ຊີບ​ເພື່ອ​ພັດທະນາ​ທັກສະ ແລະສີມືແຮງງານໃຫ້​ແກ່​ເອື້ອຍ​ນ້ອງ​ແມ່ຍິງ ໂດຍມີຈຸດປະສົງໃຫ້ເອື້ອຍ​ນ້ອງ​ແມ່ຍິງຄວ້າໄດ້ໂອກາດໃນການມີ​ວຽກ​ເຮັດ​ງານ​ທຳ ທັງນີ້ຖືເປັນການ​ຍົກ​ສູງ​ຄຸນະພາບຊີວິດ​ຂອງ​​ເອື້ອຍ​ນ້ອງ​ແມ່ຍິງໃຫ້​ດີ​ຂຶ້ນ  ເຊິ່ງສູນດັ່ງກ່າວຈະເປັນ​ບ່ອນ​ສ້າງ​ບຸກຄະລາ​ກອນເພື່ອຕອບສະໜອງ ແລະຮອງຮັບການຂະຫຍາຍໂຕຂອງເສດຖະກິດ-ສັງຄົມ.

      ​​​ພິທີໄຂສູນວິຊາຊີບແມ່ຍິງ​ແຂວງ​ສາລະ​ວັນ ໄດ້ຈັດຂຶ້ນເມື່ອຕົ້ນອາທິດຜ່ານມາ ເຊິ່ງໃຫ້ກຽດ​ເຂົ້າ​ຮ່ວມໂດຍ ທ່ານ ນາງ​ ອິນ​ລາ​ວັນ ​ແກ້ວ​ບຸນ​ພັນ ປະທານ​ສູນ​ກາງ​ສະຫະພັນ​ແມ່ຍິງ​ລາວ ທ່ານ ບຸນທຽມ ​ແກ້ວ​ໄຊຍະ​ວົງ ຫົວໜ້າຄະນະ​ຈັດ​ຕັ້ງ​ແຂວງ ​ແລະ ທ່ານ ມຸລາ​ລີ ຮອງຫົວໜ້າອົງການ​ສະຫະປະຊາ​ຊາດ​ເພື່ອ​ການ​ພັດ​ນາ ປະຈຳ ສປປ ລາວ ມີຜູ້ຕາງໜ້າຈາກ​ກະຊວງ​ການ​ຕ່າງປະ​ເທດ ກະຊວງ​ພາຍ​ໃນ ກະຊວງ​ແຜນການ ແລະ​ການ​ລົງທຶນ ​ແລະ ​ພະ​ແນ​ກການ​ອ້ອມ​ຂ້າງ​ແຂວງ​ເຂົ້າ​ຮ່ວມ.

      ໃນພິທີ ຫົວໜ້າຄະນະ​ຈັດ​ຕັ້ງ​ແຂວງ ​ໄດ້ຍ້ອງຍໍຊົມ​ເຊີຍ​ຕໍ່ການ​ນຳ​ສູນ​ກາງ​ສະຫະພັນ​ແມ່ຍິງ​ລາວ ແລະ ​ຜູ້​ຕາງໜ້າ​ອົງການ​ສະຫະ​ປະຊາ​ຊາດ​ເພື່ອ​ການ​ພັດທະນາ ຜູ້​ປະສານ​ງານ​ໂຄງການ​ພັດທະນາ​ຊຸມ​ຊົນ​ແບບ​ມີ​ສ່ວນ​ຮ່ວມ ​ແລະ​ຍືນ​ຍົງ ພ້ອມ​ດ້ວຍ​ພາກສ່ວນ​​ທີ່​ກ່ຽວຂ້ອງ ​ທີ່ມີຄວາມເປັນ​ຫ່ວງ​ເປັນ​ໃຍ ​ແລະ ​ເອົາ​ໃຈ​ໃສ່​ຊອກ​ຫາ​ທຶນຮອນ​ມາ​ຊ່ອຍ​ພັດທະນາ​ຊີວິດ​ການ​ເປັນ​ຢູ່​ຂອງ​ປະຊາຊົນ​ຊາວ​ແຂວງ​ສາລະ​ວັນ ໂດຍສະເພາະກໍແມ່ນການຍົກລະດັບສີມືແຮງງານໃຫ້ເອື້ອຍນ້ອງແມ່ຍິງ ເຊິ່ງຖ້າເຂົາເຈົ້າຫາກໄດ້ຮັບການພັດທະນາດ້ານສີມື ແລະທັກສະ ກໍຈະເປັນເງື່ອນໄຂສຳຄັນໃນການປະກອບສ່ວນແກ້ໄຂຄວາມທຸກຍາກ ທີ່ຖືເປັນການຍົກ​ສູງ​ຊີວິດ​ການ​ເປັນ​ຢູ່​ຂອງ​​ເອື້ອຍ​ນ້ອງ​ແມ່ຍິງໃຫ້​ດີ​ຂຶ້ນ ແລະ ເປັນຈຸດປະສົງເປົ້າໝາຍຂອງ​ໂຄງການ​ພັດທະນາ​ຊຸມ​ຊົນ​ແບບ​ມີ​ສ່ວນ​ຮວ່ມ ​ແລະ​ຍືນ​ຍົງ​.

      ນອກຈາກການໄຂສູນວິຊາຊີບສຳລັບເອື້ອຍນ້ອງແມ່ຍິງແລ້ວ ກໍຍັງມີການ​ສະໜອງອຸປະກອນ​ໃຫ້​ແກ່​ສູນ​ສົ່ງ​ເສີມ​ວີ​ຊາ​ຊີບ ແລະ ສູນ​ຂໍ້​ມູນ​ຂ່າວສານ​ຂັ້ນ​ແຂວງ ​ຂັ້ນ​ເມືອງ ​​ເປັນ​ຕົ້ນ​ແມ່ນເມືອງ​ຕະ​ໂອ້​ຍ​ ​ເມືອງ​ເລົ່າ​ງາມ ​ແລະ​ ເມືອງ​ວາ​ປີ​ ເຊິ່ງມີ 10 ບ້ານ​ເປົ້າໝາຍ ພ້ອມນັ້ນກໍ​ໄດ້​ສະໜັບສະໜູນທຶນຮອນໃນການ​ທັດສະ​ນະ​ສຶກສາ​ແລກ​ປ່ຽນບົດຮຽນທັງ​ພາຍ​ໃນ ​ແລະ​ ຕ່າງປະ​ເທດ​ ຮວມ​ມູນ​ຄ່າທັງໝົດ 365.000 ໂດ​ລາສະຫະລັດ ສຳລັບໂຄງການ​ນີ້​ແມ່ນ​ນອນຢູ່​ໃນ​ແຜນ​ພັດທະນາ​ເສດຖະກິດ​-ສັງຄົມ​ຂອງ​ແຂວງ ​ແລະ ເປັນນຶ່ງໃນວຽກງານເພື່ອສະໜັບສະໜູນ​ເປົ້າໝາຍສະຫັດ​ສະວັດ​ເພື່ອ​ການ​ພັດທະນາ​ແບບ​ຍືນ​ຍົງ ເຊິ່ງຖືກຜັນຂະຫຍາຍ​ເຂົ້າ​ໃນ​ແຜນ​ພັດທະນາ​ແມ່ຍິງ 7 ​ແຜນ​ງານ ​ແລະ 23 ​ໂຄງການ​ຂອງ​ສະຫະພັນ​ແມ່ຍິງ​ແຂວງ​ສາລະວັນ.

ຂ່າວ: ສຸກໃຈ

Leave a Reply

Your email address will not be published. Required fields are marked *

*