ໂຕະເອັກຊ໌ ຈັດກິດຈະກຳປະກວດບົດຄວາມພາຍໃຕ໊ຫົວຂໍ້ ຜົນກະທົບຂອງສື່ອອນໄລນ໌ ຢູ່ ສປປ ລາວ

ໂຕະເອັກຊ໌ ຈັດກິດຈະກຳປະກວດບົດຄວາມພາຍໃຕ໊ຫົວຂໍ້ ຜົນກະທົບຂອງສື່ອອນໄລນ໌ ຢູ່ ສປປ ລາວ

Posted by

      ນີ້ແມ່ນໜຶ່ງໃນກິດຈະກຳເພື່ອກຽມຄວາມພ້ອມໃຫ້ໄວໜຸ່ມລາວທີ່ພວມກ້າວເຂົ້າສູ່ຍຸກແຫ່ງການສື່ສານຜ່ານໂລກດິຈີຕອລ ທີ່ມີທັງກາລະໂອກາດ ແລະ ສິ່ງທ້າທາຍນານັບປະການ ເຫັນເຖິງຄວາມສຳຄັນດັ່ງກ່າວ ໂຕະເອັກຊ໌ (TOH-X Coworking Space) ຈິ່ງໄດ້ມີການຈັດປະກວດຂຽນບົດຄວາມກ່ຽວກັບຜົນກະທົບຂອງສື່ສັງຄົມອອນໄລນ໌ ຢູ່ ສປປ ລາວ (Social Media Impact on Lao society).

      ກິດຈະກຳດັ່ງກ່າວຈັດຂຶ້ນໃນວັນທີ 13 ມັງກອນ 2018 ທີ່ຫ້ອງການສຳນັກງານ ໂຕະເອັກຊ ຕັ້ງຢູ່ຖະໜົນໂພນສະອາດ ເມືອງໄຊເສດຖາ ນະຄອນຫຼວງວຽງຈັນ ເຊິ່ງແມ່ນໜຶ່ງໃນກິດຈະກຳພາຍໃຕ້ໂຄງການ APT Young Professional and Student Programme (APTYPS 2017) ໂດຍການເປັນປະທານຂອງ ທ່ານ ພູຂົງ ຈິດຮູບໂລກ ຫົວໜ້າກົມແຜນການ ແລະການຮ່ວມມື ກະຊວງໄປສະນີ ໂທລະຄົມມະນາຄົມ ແລະການສື່ສານ ທ່ານ ນາງ ອາຣີວັນ ຮາວຣັງສີ ຫົວໜ້າໃຫຍ່ກອງເລຂາອົງການໂທລະຄົມອາຊີ-ປາຊີຟິກ (Asia-Pasific Telecommunity) ມີບັນດາຜູ້ເຂົ້າແຂ່ງຂັນຈາກຫຼາຍສາຂາອາຊີບ ສໍາລັບການແຂ່ງຂັນຄັ້ງນີ້ແມ່ນເປັນຮອບສຸດທ້າຍ ເຊິ່ງມີ 15 ທີມທີ່ຜ່ານການຄັດເລືອກໃນຮອບທຳອິດເຊິ່ງໄດ້ດຳເນີນການແຂ່ງຂັນ ແລະ ນຳສະເໜີບົດຄວາມຂອງຕົນເອງ.

      ກິດຈະກຳດັ່ງກ່າວຖືເປັນການສະແດງໃຫ້ເຫັນເຖິງຄວາມສາມາດຂອງໄວໜຸ່ມລາວເຮົາ ບໍ່ວ່າຈະເປັນທັກສະທາງດ້ານພາສາອັງກິດ ການຮຽນຮູ້ສື່ສັງຄົມອອນໄລນ໌ ແລະ ວິທີການນຳໃຊ້ໃຫ້ເກີດປະໂຫຍດຢ່າງແທ້ຈິງ ເຊິ່ງໄດ້ສະແດງອອກເຖິງຄວາມທັນສະໄໝ-ກ້າວໜ້າທາງດ້ານໄອທີ ຂອງ ສປປ ລາວ ແລະ ເປັນການບົ່ງບອກເຖິງຄວາມຮັບຮູ້ກ່ຽວກັບສື່ສັງຄົມອອນໄລນ໌ຢ່າງທັນຍຸກທັນສະໄໝ ໂດຍໃນວາລະດັ່ງກ່າວ ກໍມີທັງບັນດາສະຖານທູດ ຫົວໜ່ວຍທຸລະກິດ ແລະ ກອງເຊຍຂອງແຕ່ລະທີມເຂົ້າຮ່ວມຕິດຕາມຜົນງານຢ່າງພ້ອມພຽງ ພ້ອມນີ້ ກໍມີຫຼາຍບໍລິສັດທີ່ກ່ຽວຂ້ອງກັບການສື່ສານເຂົ້າຮ່ວມວາງສະແດງຜົນງານ ແລະ ຜະລິດຕະພັນ.

      ສຳລັບຜູ້ຊະນະເລີດອັນດັບທີ 1 ໄດ້ແກ່ ນາງ ແສງຄຳ ທອງພະໄຕສັກ ໄດ້ຮັບໃບຢັ້ງຢືນ ແລະ ຂັນລາງວັນ ພ້ອມເງິນສົດ 5 ລ້ານກີບ ອັນດັບ 2 ນາງ ສອນວົງສຸດາ ຫຼວງລາດ ໄດ້ຮັບໃບຢັ້ງຢືນ ພ້ອມເງິນສົດ 3 ລ້ານກີບ ແລະ ອັນດັບ 3 ນາງ ໂຕເອັມ ວິໄລສຸກ ແລະ ທ້າວ ອານຸຊາ ສີມຸກດາ ໄດ້ຮັບໃບຢັ້ງຢືນ ພ້ອມເງິນສົດ 2 ລ້ານກີບ.

ຂ່າວ: ສຸກໃຈ

Leave a Reply

Your email address will not be published. Required fields are marked *

*