ໂອກາດ ແລະ ສິ່ງທ້າທາຍ ຕໍ່ວຽກງານຄຸ້ມຄອງວັດທະນະທໍາ ໃນນະຄອນຫຼວງວຽງຈັນ

ໂອກາດ ແລະ ສິ່ງທ້າທາຍ ຕໍ່ວຽກງານຄຸ້ມຄອງວັດທະນະທໍາ ໃນນະຄອນຫຼວງວຽງຈັນ

Posted by

ໃນຖານະເປັນເມືອງເອກຂອງປະເທດ ແລະ ເປັນສູນກາງທາງດ້ານເສດຖະກິດ-ສັງຄົມຂອງຊາດ ຈິ່ງເຮັດໃຫ້ນະຄອນຫຼວງວຽງຈັນ ມີທັງໂອກາດ ແລະ ສິ່ງທ້າທາຍຫຼາຍຢ່າງໃນໄລຍະເຊື່ອມໂຍງເປັນປະຊາຄົມເສດຖະກິດອາຊຽນ ທີ່ຈະປາກົດເປັນຮູບປະທຳໃນທ້າຍປີ 2015 ນີ້ ຂະນະທີ່ຜູ້ຮັບຜິດຊອບຂະແໜງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ກໍໝັ້ນໃຈວ່າ ກາລະໂອກາດແຫ່ງການເຊື່ອມໂຍງຈະນຳຜົນປະໂຫຽດມາສູ່ນະຄອນຫຼວງວຽງຈັນ ນຶ່ງໃນນັ້ນກໍແມ່ນວັດທະນະທຳ ຂະໜົບທໍານຽມ ແລະ ປະເພນີດີງາມ ທີ່ເປັນພື້ນຖານ ແລະ ຢັ່ງເລິກຢູ່ໃນຈິດໃຈຂອງຊາວເມືອງໃຫຍ່ ຈິ່ງຖືເປັນທ່າແຮງບົ່ມຊ່ອນ ແລະ ພ້ອມທີ່ຈະນຳສະເໜີຕໍ່ເພື່ອນມິດປະເທດໄດ້ຢ່າງເອກອ້າງທະນົງໃຈ.

…….ທ່ານ ຄຳປະດິດ ເຂັມມານິດ ຫົວໜ້າພະແນກ ຖວທ ນະຄອນຫຼວງວຽງຈັນ ໄດ້ໃຫ້ຮູ້ວ່າ ໂດຍອີງໃສ່ມະຕິ 09 ສະໄໝ V ຂອງຄະນະບໍລິຫານງານສູນກາງພັກ ກ່ຽວກັບວຽກງານວັດທະນະທຳໃນໄລຍະໃໝ່ ໄດ້ລະບຸແຈ້ງວ່າ ແຜນພັດທະນາເສດຖະກິດ-ສັງຄົມແຫ່ງຊາດ ຕ້ອງຕິດພັນກັບວຽກງານປົກປັກຮັກສາມໍລະດົກທາງດ້ານວັດທະນະທຳອັນດີງາມຂອງຊາດ ຂອງປະຊາຊົນບັນດາເຜົ່າ ສ້າງແບບແຜນດຳລົງຊີວິດ ວັດທະນະທຳທີ່ສົດໃສ ເພື່ອໃຫ້ປວງຊົນລາວບັນດາເຜົ່າມີຄວາມຈະເລີນສີວິໄລທາງດ້ານຈິດໃຈ ໄປຄຽງຄູ່ກັບ ຄວາມຈະເລີນທາງດ້ານເສດຖະກິດ ດັ່ງນັ້ນ ໃນໄລຍະຜ່ານມາ ພະແນກ ຖວທ ນະຄອນຫຼວງວຽງຈັນ ຈິ່ງໄດ້ມີຄວາມພະຍາຍາມເອົາໃຈໃສ່ໃນການຈັດຕັ້ງຜັນຂະຫຽາຍນະໂຍບາຍວຽກງານວັດທະນະທຳຂອງພັກໃຫ້ເປັນຮູບປະທຳ ແລະ ມີບາດກ້າວຂະຫຽາຍໂຕຂຶ້ນເລື້ອຍໆ ພະແນກ ຖວທ ນະຄອນຫຼວງວຽງຈັນ ໄດ້ສຸມໃສ່ 4 ແຜນງານໃຫຍ່ຄື (1) ວຽກງານສ້າງຄົນ ສ້າງຄອບຄົວ ແລະ ສ້າງບ້ານວັດທະນະທຳ ເຊິ່ງໄດ້ເລີ່ມຈັດຕັ້ງປະຕິບັດມາແຕ່ປີ 1997 ມາຮອດປັດຈຸບັນ ທົ່ວນະຄອນຫຼວງວຽງຈັນ ສາມາດມອບໃບຢັ້ງຢືນຄອບຄົວວັດທະນະທຳໄດ້ 110.747 ຄອບຄົວ ເທົ່າກັບ 54,98% ຂອງຈຳນວນຄອບຄົວທັງໝົດ ສ້າງບ້ານວັດທະນະທຳໄດ້ 406 ບ້ານ ເທົ່າກັບ 84,40% ຂອງຈຳນວນບ້ານທັງໝົດ (2) ວຽກງານຄຸ້ມຄອງ ອະນຸຮັກມໍ ລະດົກວັດທະນະທຳທາງດ້ານວັດຖຸ ແລະ ບໍ່ເປັນວັດຖຸ ໄດ້ເອົາໃຈໃສ່ໃນການສຳຫຼວດ ເກັບກຳ ຂຶ້ນບັນຊີ ແລະ ໄດ້ກຳນົດເຂດສະຫງວນ ເພື່ອສ້າງເປັນໂຄງການອະນຸຮັກ ບູລະນະ ແລະ ປະຕິສັງຂອນ ແນໃສ່ຮັກສາໄວ້ເຊິ່ງຄຸນຄ່າທາງດ້ານປະຫວັດສາດ ວັດທະນະທຳ ຜ່ານມາ ມໍລະດົກສະຖານ ວັດວາສະຖານ ແລະ ສິ່ງສັກກາລະບູຊາຫຼາຍແຫ່ງ ໄດ້ຮັບການອະນຸຮັກ ປົກປັກຮັກສາ ປະຕິສັງຂອນ ແລະ ໄດ້ກາຍເປັນສະຖານທີ່ທ່ອງທ່ຽວທີ່ໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະ ຕ່າງປະເທດ ປະກອບສ່ວນສ້າງລາຍຮັບເປັນຈຳນວນຫຼວງຫຼາຍໃຫ້ແກ່ປະເທດຊາດເປັນຕົ້ນ ພະທາດຫຼວງວຽງຈັນ ຫໍພະແກ້ວ ວັດສີສະເກດ ວັດຊຽງຄວນ (3) ວຽກງານສິລະປະວັນນະຄະດີ ຢູ່ຮາກຖານເມືອງ ບ້ານວັດທະນທຳ ໄດ້ຮັບການຟື້ນຟູ ແລະ ສົ່ງເສີມໃຫ້ມີການຈັດຕັ້ງເຄື່ອນໄຫວຢ່າງກວ້າງຂວາງ ໄດ້ມີໜໍ່ແໜງໜ່ວຍສິລະປະສະໝັກຫຼິ້ນຈາກຂົງເຂດຕ່າງໆເກີດຂຶ້ນເປັນຈຳນວນຫຼາຍ ແລະ ຜ່ານຂະບວນການເຝິກອົບຮົມໃນວຽກງານໂຕຈິງເປັນຕົ້ນ ໜ່ວຍສິລະປະສະໝັກຫຼິ້ນເຫຼົ່ານັ້ນໄດ້ມີການພັດທະນາກ້າວສູ່ຄວາມເປັນອາຊີບເທື່ອລະກ້າວ ສາມາດຮັບໃຊ້ໜ້າທີ່ການເມືອງ ແລະ ປະກອບສ່ວນເຂົ້າໃນການສ້າງຄວາມບັນເທີງ ຄວາມເບີກບານມ່ວຊື່ນໃຫ້ແກ່ສັງຄົມ ແລະ (4) ໄດ້ເອົາໃຈໃສ່ວຽກງານຄຸ້ມຄອງ ຕິດຕາມກວດກາ ແລະ ແກ້ໄຂບັນຫາປາກົດການຫຍໍ້ທໍ້ທາງດ້ານວັດທະນະທຳ ທີ່ເກີດຂຶ້ນຢູ່ນະຄອນຫຼວງວຽງຈັນ ເຊິ່ງເຫັນວ່າໃນໄລຍະຜ່ານມາປາກົດການຫຍໍ້ທໍ້ທີ່ເປັນການສ້າງຄວາມບໍ່ເປັນລະບຽບຮຽບຮ້ອຍ ຄວາມບໍ່ຈົບງາມ ແລະ ເປັນການເສື່ອມເສຍຕໍ່ວັດທະນະທໍາອັນດີງາມຂອງຊາດ ກໍໄດ້ຮັບການແກ້ໄຂ ຕີຖອຍ ໃຫ້ຫຼຸດລົງເທື່ອລະກ້າວ ໃນເງື່ອນໄຂແຫ່ງການເຊື່ອງໂຍງກັບພາກພື້ນ ແລະ ສາກົນ ວຽກງານວັດທະນະທຳ ກໍແມ່ນຂະແໜງນຶ່ງທີ່ໄດ້ຮັບຜົນກະທົບໂດຍກົງ ເຊິ່ງເປັນທັງກາລະໂອກາດ ແລະ ສິ່ງທ້າທາຍໃໝ່ຕໍ່ກັບວຽກງານຄຸ້ມຄອງທາງດ້ານວັດທະນະທຳ ຢູ່ ນະຄອນຫຼວງວຽງຈັນ ໃນນັ້ນ ສິ່ງທີ່ເປັນກາລະໂອກາດກໍແມ່ນ ພວກເຮົາຈະໄດ້ມີເງື່ອນໄຂທີ່ເອື້ອອຳນວຍໃນການໂຄສະນາປະຊາສຳພັນມູນເຊື້ອວັດທະນະທຳອັນດີງາມຂອງຊາດ ຂອງປະຊາຊົນລາວບັນດາເຜົ່າ ໃຫ້ຊາວໂລກໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ ແລະ ເລິກເຊິ່ງ ໄປພ້ອມກັນນັ້ນ ພວກເຮົາກໍຈະມີໂອກາດໄດ້ຮັບຮູ້ ແລກປ່ຽນບົດຮຽນ ປະສົບການອັນໃໝ່ ທັນສະໄໝ ຈາກວິຖີວັດທະນະທຳຂອງປະເທດຕ່າງໆທີ່ມີລັກສະນະສ້າງສັນ ກ້າວໜ້າ ເພື່ອນຳມາເພີ່ມພູນຄູນສ້າງຕາມທິດທາງສ້າງວັດທະນະທຳໃຫ້ມີລັກສະນະຊາດ ມະຫາຊົນ ແລະ ກ້າວໜ້າສີວິໄລ ແທດເໝາະກັບສະພາບການຂະຫຽາຍໂຕຂອງສັງຄົມໃນແຕ່ລະຍຸກສະໄໝ.

SPS_9756

ພາບປະກອບ

…….ຢ່າງໃດກໍດີ ໃນການເຊື່ອມໂຍງກໍໄດ້ຕັ້ງບັນຫາໃຫ້ພະແນກ ຖວທ ນະຄອນຫຼວງວຽງຈັນ ຕ້ອງທົບທວນເຖິງສິ່ງທ້າທາຍທີ່ຈະຕ້ອງປະເຊີນບໍ່ໜ້ອຍເຊັ່ນວ່າ ການຫຼັ່ງໄຫຼເຂົ້າມາຂອງກະແສນິຍົມວັດທະນະທຳ ແບບແຜນດຳລົງຊີວິດຂອງປະເທດຕາເວັນຕົກ ປະເທດໃກ້ຄຽງ ໄດ້ກາຍເປັນໄພຂົມຂູ່ຕໍ່ກັບມູນເຊື້ອ ວິຖີວັດທະນະທຳທີ່ເປັນເອກະລັກດັ້ງເດີມຂອງຊາດລາວ ສິ່ງທີ່ເປັນຫ່ວງກວ່າໝູ່ກໍແມ່ນ ໃນສັງຄົມໄວໜຸ່ມ-ເຍົາວະຊົນ ເຊິ່ງເປັນຜູ້ເກີດໃໝ່ໃຫຍ່ລຸນທີ່ຈະສືບທອດພາລະກຳປະຫວັດສາດຂອງຊາດ ແຕ່ເຂົາເຈົ້າເຫຼົ່ານີ້ (ບາງກຸ່ມ ບາງຄົນ) ຍັງບໍ່ທັນຊາບຊຶມ ແລະ ກຳແໜ້ນຕໍ່ກັບມູນເຊື້ອວັດທະນະທຳອັນເປັນເອກະລັກ ຄວາມເປັນຊາດ ຈິ່ງເກີດມີຄວາມສັບສົນໃນການສືບທອດທາງດ້ານວັດທະນະທຳ ເກີດມີກະແສນິຍົມໄປຕາມສາກົນນິຍົມ ໂດຍບໍ່ໄຈ້ແຍກອອກໄດ້ວ່າອັນໃດແມ່ນລັກສະນະຊາດ ອັນໃດແມ່ນລັກສະນະສາກົນ ແລະ ອັນໃດແມ່ນວັດທະນະທຳຊອດກະຈາ ຈິ່ງເກີດມີປາກົດການແຂ່ງຂັນກັນຫຼິ້ນກິນຟຸມເຟືອຍ ມ່ວນຊື່ນບັນເທີງເກີນຂອບເຂດ ສ້າງປາກົດການຫຍໍ້ທໍ້ໃຫ້ແກ່ສັງຄົມ ນອກຈາກນັ້ນ ສິ່ງທີ່ໜ້າເປັນຫ່ວງກໍແມ່ນການຫັນວັດທະນະທຳເປັນ ເຄື່ອງມືຂອງການຄ້າຫາຜົນປະໂຫຽດທາງດ້ານເສດຖະກິດ ອັນເປັນການສ້າງຄວາມເສື່ອມເສຍຕໍ່ກັບມໍລະດົກວັດທະນະທຳ ບໍ່ວ່າຈະເປັນທາງ ດ້ານວັດຖຸ ຫຼື ຈິດໃຈ.

ພາບປະກອບ

ພາບປະກອບ

…….ຢ່າງໃດກໍດີ ຕໍ່ໜ້າຍຸກສະໄໝແຫ່ງການເຊື່ອມໂຍງສາກົນທີ່ມີອັນໃໝ່ໆເຂົ້າມາຢູ່ເລື້ອຍໆ ແຕ່ຖ້າບັນດາຜູ້ກ່ຽວຂ້ອງ ບໍ່ວ່າຈະເປັນຂະແໜງການ ອົງການຈັດຕັ້ງທາງສັງຄົມ ຄູ-ອາຈານ ຜູ້ປົກຄອງ ແລະ ອຳນາດ ການປົກຄອງທ້ອງຖິ່ນ ຫາກກຳແໜ້ນຄຳສັ່ງຂອງປະທານໄກສອນ ພົມວິຫານ ທີ່ກ່າວໄວ້ວ່າ ຖ້າເສຍວັດທະນະທຳ ປະເທດຊາດກໍສູນເສຍ ເຊິ່ງຖ້າຫາກຫຼາຍຝ່າຍອອກແຮງຕັ້ງໜ້ານຳພາລູກຫຼານໃຫ້ເພີ່ມຄວາມຮັກໃນວັດທະນະທຳອັນດີງາມຂອງຊາດຢ່າງເອກອ້າງທະນົງໃຈ ກໍຈະເຮັດໃຫ້ນະຄອນຫຼວງວຽງຈັນ ເປັນອີກນຶ່ງເມືອງເອກທີ່ຄົງຄຸນຄ່າດ້ານວັດທະນະທຳ ຢ່າງມີສະເໜ.

ໂດຍ: ສ.ບົວພາ

Leave a Reply

Your email address will not be published. Required fields are marked *

*