ໂຮງຮຽນອິສເຕີ້ນສະຕາຣ໌ ຈັດກິດຈະກໍາປະຈໍາປີພາຍໃຕ້ຫົວຂໍ້ ສັບປະດາແລກປ່ຽນວັດທະນະທໍາສາກົນ ຄັ້ງທີ 3

ໂຮງຮຽນອິສເຕີ້ນສະຕາຣ໌ ຈັດກິດຈະກໍາປະຈໍາປີພາຍໃຕ້ຫົວຂໍ້ ສັບປະດາແລກປ່ຽນວັດທະນະທໍາສາກົນ ຄັ້ງທີ 3

Posted by

     ໂຮງຮຽນອິສເຕີ້ນສະຕາຣ໌ (EASTERN STAR SCHOOLS) ໄດ້ຈັດກິດຈະກໍາ ສັບປະດາແລກປ່ຽນວັດທະນະທໍາຂອງປະເທດໃນອາຊຽນ ແລະ ປະເທດຕ່າງໆຄື ບຣູໄນດາຣຸສຊາລາມ ກຳປູເຈຍ ອິນໂດເນເຊຍ ລາວ ມາເລເຊຍ ມຽນມາ ຟິລິບປີນ ສິງກະໂປ ໄທ ຫວຽດນາມ ເກົາຫຼີ ຍີ່ປຸ່ນ ອິນເດຍ ອັງກິດ ຝຣັ່ງ ອາເມຣິກາ ອົດສະຕຣາລີ ເຊິ່ງກິດຈະກໍານີ້ຈັດຂຶ້ນເປັນປີທີ 3 ປະຈໍາປີ 2017.

     ພິທີໄຂກິດຈະກໍາ ສັບປະດາແລກປ່ຽນວັດທະນະທໍາສາກົນ ປະຈໍາປີ 2017 ໄດ້ຈັດຂຶ້ນໃນຕອນເຊົ້າວັນທີ 06 ມັງກອນ 2017 ທີ່ເດີ່ນໂຮງຮຽນອິສເຕີ້ນສະຕາຣ໌ ບ້ານໜອງບອນ ເມືອງໄຊເຊດຖາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ຄໍາສະຫວັນ ໂຄດໄຊ ຮອງຫົວໜ້າພະແນກສຶກສາທິການ ແລະກີລານະຄອນຫຼວງວຽງຈັນ ທ່ານ ເອີຄານ ຢີນມັສ (Erkan Yilmaz) ອໍານວຍການໃຫຽ່ໂຮງຮຽນອິສເຕີ້ນສະຕາຣ໌ ທ່ານອາຈານ ປະເສີດ ໄຊຍະມົງຄຸນ ອໍານວຍການຝ່າຍລາວ ທັງເປັນຮອງອໍານວຍການໂຮງຮຽນອິສເຕີ້ນສະຕາຣ໌ ທ່ານ ຮາວີ ຊານກ່າ ໄອໂຊລ່າ ເອກອັກຄະລັດຖະທູດອິນເດຍ ປະຈໍາ ສປປ.ລາວ ມີປະທານສະມາຄົມການສຶກສາພາກເອກະຊົນ ບັນດາຄູ ອາຈານ ນັກຮຽນ ແລະ ຜູ້ປະກອບການທຸລະກິດຈາກຕ່າງປະເທດທີ່ດໍາເນີນທຸລະກິດຢູ່ລາວ ພ້ອມດ້ວຍມວນຊົນເຂົ້າຮ່ວມຢ່າງຫຼວງຫຼາຍ.

sps_7237

     ທ່ານ ອາຈານ ປະເສີດ ໄຊຍະມົງຄຸນ ໃຫ້ຮູ້ວ່າ ກິດຈະກໍາໃນວັນສັບປະດາແລກປ່ຽນວັດທະນະທໍາສາກົນ ຈັດຂຶ້ນທຸກປີ ເລີ່ມແຕ່ປີ 2015 ເປັນຕົ້ນມາ ແລະ ຄັ້ງນີ້ເປັນຄັ້ງທີ 3 ໂດຍປະຕິບັດຕາມ 3 ລັກສະນະ ແລະ 5 ຫຼັກມູນການສຶກສາ ຂອງກະຊວງສຶກສາທິການ ແລະກີລາ ວາງອອກ ແນໃສ່ສ້າງຄວາມສາມັກຄີລະຫວ່າງນັກຮຽນນັບແຕ່ຂັ້ນອະນຸບານເຖິງມັດທະຍົມສຶກສາ ໄດ້ແລກປ່ຽນ ແລະ ຮຽນຮູ້ກ່ຽວກັບທຸງຊາດຂອງແຕ່ລະປະເທດອາຊຽນ ແລະ ໃນໂລກ ເຊິ່ງກ່ອນໜ້າຈະຈັດກິດຈະກໍາແມ່ນໃຫ້ນັກຮຽນແຕ່ລະຊັ້ນໄດ້ຈົກສະຫຼາກ ເມື່ອຖືກປະເທດໃດ ກໍນໍາໄປສຶກສາກ່ຽວທຸງຊາດ ຮີດຄອງປະເພນີ ວັດທະນະທໍາການນຸ່ງຖື ສະກຸນເງິນ ພ້ອມທັງອາຫານການກິນຂອງປະເທດນັ້ນໆ ແລ້ວມາຈັດສະແດງໃນວັນຈັດກິດຈະກໍາສໍາຄັນ ເປັນເວທີໄຂກວ້າງໃຫ້ນັກຮຽນມີຄວາມຮູ້ ແລະ ກ້າສະແດງອອກຄວາມສາມາດຂອງຕົນ.

sps_7265

     ພາຍໃນງານໄດ້ຈັດກິດກໍາສະແດງສິລະປະວັນນະຄະດີນັກຮຽນ ນອກນີ້ ຍັງມີການວາງສະແດງການສຶກສາ ການນຸ່ງຖື ແລະ ການປຸງແຕ່ງປະເພດອາຫານປະຈໍາຊາດຂອງປະເທດຕ່າງໆ ຫຼາຍກວ່າ 20 ຮ້ານ ໃນນັ້ນຈາກຄອບຄົວນັກຮຽນ ບັນດາຫົວໜ່ວຍທຸລະກິດຕ່າງປະເທດທີ່ດໍາເນີນທຸລະກິດຢູ່ນະຄອນຫຼວງວຽງຈັນ.

ຂ່າວ/ພາບ: ເທບພະວົງ

Leave a Reply

Your email address will not be published. Required fields are marked *

*