ໂຮງຮຽນເຕັກນິກກະສິກຳດົງຄຳຊ້າງ ໄຂສູນການຮຽນຮູ້ ເພື່ອການພັດທະນາກະສິກຳແບບຍືນຍົງ

ໂຮງຮຽນເຕັກນິກກະສິກຳດົງຄຳຊ້າງ ໄຂສູນການຮຽນຮູ້ ເພື່ອການພັດທະນາກະສິກຳແບບຍືນຍົງ

Posted by

      ສູນການຮຽນຮູ້ເພື່ອການພັດທະນາກະສິກຳຍືນຍົງ ແມ່ນນຶ່ງໃນໂຄງການຮ່ວມມືດ້ານວິຊາການລະຫວ່າງສອງປະເທດ ລາວ-ໄທ ທີ່ສ້າງໃຫ້ແກ່ໂຮງຮຽນເຕັກນິກກະສິກຳດົງຄຳຊ້າງ ເມືອງຫາດຊາຍຟອງ ນະຄອນຫຼວງວຽງຈັນ ເພື່ອເປັນສະຖານທີ່ຈັດຕັ້ງປະຕິບັດກິດຈະກຳດ້ານກະສິກຳແບບປະສົມປະສານ ໂດຍນຳເອົາປັດຊະຍາທີ່ດີເລີດມາໝູນໃຊ້ເຂົ້າໃນການສອນ-ການຮຽນ ທັງພາກທິດສະດີ ແລະ ພາກສະໜາມ ຕາມທ່າແຮງ ແລະ ສະພາບຄວາມເປັນຈິງຂອງຊັບພະຍາກອນພາຍໃນໂຮງຮຽນ.

      ພາຍຫຼັງສຳເລັດໂຄງການເຊິ່ງເລີ່ມມາແຕ່ເດືອນຕຸລາ ປີ 2016 ເຖິງເດືອນມີນາ 2017 ກໍນັບເປັນເວລາປະມານ 6 ເດືອນຂອງການກໍ່ສ້າງ ກໍໄດ້ມີພິທີໄຂສູນຮຽນຮູ້ເພື່ອການພັດທະນາກະສິກຳຍືນຍົງ ພິທີດັ່ງກ່າວຈັດຂຶ້ນເມື່ອຕົ້ນເດືອນເມສາ 2017 ຜ່ານມາ ທີ່ບ້ານຊຽງດາ ເມືອງໄຊເຊດຖາ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ຮສຈ.ດຣ. ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະກີລາ ທ່ານ ນົບພະດົນ ເທບພິທັກ ເອກອັກຄະຣາຊະທູດໄທ ປະຈຳ ສປປ.ລາວ ທ່ານ ນາງ ສຸພັດຕາ ສີໄມຕີພິທັກ ຫົວໜ້າກົມຮ່ວມມືລະຫວ່າງປະເທດ (TICA)  ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ພ້ອມດ້ວຍພະນັກງານ ວິຊາການ ແລະ ພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.

      ໃນພິທີ ທ່ານ ຈິດຕະກອນ ສີຊານົນ ຮອງຜູ້ອຳນວຍການໂຮງຮຽນເຕັກນິກກະສິກຳດົງຄຳຊ້າງ ໃນນາມຜູ້ປະສານງານໂຄງການຮ່ວມມືທາງດ້ານວິຊາການລາວ-ໄທ ຂອງໂຮງຮຽນ ໃຫ້ຮູ້ວ່າ ພາຍໃຕ້ການຊີ້ນຳຂອງກົມອາຊີວະສຶກສາ ກະຊວງສຶກສາທິການ ແລະກີລາ ເຊິ່ງເຫັນໄດ້ຄວາມສຳຄັນຂອງການພັດທະນາຊັບພະຍາກອນມະນຸດ ໂດຍສະເພາະແມ່ນນັກວິຊາການທາງດ້ານກະສິກຳ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ທາງກົມອາຊີວະສຶກສາຈິ່ງໄດ້ຈັດໃຫ້ໂຮງຮຽນເຕັກນິກກະສິກຳດົງຄຳຊ້າງ ເປັນນຶ່ງໃນ 4 ໂຮງຮຽນອາຊີວະສຶກສາທີ່ຢູ່ພາຍໃຕ້ການຊີ້ນຳຂອງກົມ ແລະ ໄດ້ຮັບການຊ່ອຍເຫຼືອສະໜັບສະໜູນຈາກໂຄງການຮ່ວມມືທາງດ້ານວິຊາການລາວ-ໄທ (TICA)  ເລີ່ມປີ 2011 ເປັນຕົ້ນມາ ໂຮງຮຽນໄດ້ຮັບການຊ່ອຍເຫຼືອຈາກໂຄງການດັ່ງກ່າວໃນການປັບປຸງ ແລະ ປຸກສ້າງພື້ນຖານໂຄງລ່າງທີ່ຮັບໃຊ້ໃຫ້ແກ່ການຮຽນ-ການສອນ ທາງດ້ານທິດສະດີ ແລະ ພາກປະຕິບັດ ນອກນັ້ນຍັງໄດ້ໃຫ້ທຶນແກ່ຄູ-ອາຈານ ໄປຍົກລະດັບວິຊາສະເພາະທັງໃນໄລຍະສັ້ນ ແລະ ໄລຍະຍາວ ພ້ອມນີ້ກໍໄດ້ສະໜອງອຸປະກອນ ສື່ການຮຽນ-ການສອນ ພ້ອມທັງການນຳເອົາພະນັກງານ ຄູ ອາຈານ ຂອງໂຮງຮຽນ ແລະ ຜູ້ບໍລິຫານໄປທັດສະນະສຶກສາ ມາຮອດປັດຈຸບັນ ຄູ ອາຈານຂອງໂຮງຮຽນໄດ້ຮັບທຶນການສຶກສາໃນລະດັບປະລິນຍາໂທຈາກໂຄງການທັງໝົດ 12 ທ່ານ ມີພື້ນຖານໂຄງລ່າງ ຮວມທັງວັດຖຸປະກອນເພື່ອຮັບໃຊ້ໃຫ້ແກ່ການຮຽນ-ການສອນທັງພາກປະຕິບັດ ແລະ ທິດສະດີ ໄດ້ຈຳນວນນຶ່ງ ພາຍຫຼັງສະຫຼຸບການຮ່ວມມື ແລະ ຊ່ອຍເຫຼືອໄລຍະທີ 1 ແລະ ຈາກຜົນຂອງການຮ່ວມມື ແລະ ຊ່ອຍເຫຼືອທີ່ຜ່ານມາ  ເຊິ່ງໃນວັນທີ 25 ມັງກອນ ປີ 2015 ທ່ານ ນາງ ສຸຊາດາ ໄທບັນເທົາ ຜູ້ອຳນວຍການສຳນັກຄວາມຮ່ວມມືເພື່ອການພັດທະນາລະຫວ່າງປະເທດ (ສພຣ) ໄດ້ມາຢ້ຽມຢາມໂຮງຮຽນເຕັກນິກກະສິກຳດົງຄຳຊ້າງ ໃນໂອກາດນັ້ນ ຄະນະຜູ້ບໍລິຫານຂອງໂຮງຮຽນໄດ້ສະເໜີຄວາມສົນໃຈ ແລະ ສະແດງເຈຕະນາລົມທີ່ຈະໃຫ້ທາງ ສພຣ ສະໜັບສະໜູນການສ້າງສູນການຮຽນຮູ້ ເພື່ອການພັດທະນາກະສິກຳຍືນຍົງ ໃນພື້ນທີ່ຂອງໂຮງຮຽນ ໂດຍອາໄສທ່າແຮງທາງດ້ານຊັບພະຍາກອນໃນພື້ນທີ່ຂອງໂຮງຮຽນ ຈາກນັ້ນມາເມື່ອວັນທີ 29 ມັງກອນ 2016 ທາງກົມຮ່ວມມືລະຫວ່າງປະເທດ (TICA) ໄດ້ສົ່ງຄະນະຜູ້ແທນຈຳນວນ 5 ທ່ານ ເດີນທາງມາຈາກປະເທດໄທ ເພື່ອເຂົ້າຮ່ວມປະຊຸມທີ່ໂຮງຮຽນເຕັກນິກກະສິກຳດົງຄຳຊ້າງ ເພື່ອສຶກສາສະພາບພື້ນທີ່ ແລະ ແນວທາງໃນການໃຫ້ການຊ່ອຍເຫຼືອດ້ານການດຳເນີນໂຄງການພັດທະນາໂຮງຮຽນເຕັກນິກກະສິກຳດົງຄຳຊ້າງຕາມແຜນງານທີ່ສະເໜີຂໍການຊ່ອຍເຫຼືອ ຈິ່ງນຳມາສູ່ການກໍ່ສ້າງສູນດັ່ງກ່າວ.

ຂ່າວ/ຮູບ: ໄຊມຸງຄຸນ

Leave a Reply

Your email address will not be published. Required fields are marked *

*