ໜ່ວຍງານຮ່ວມມືຊັບສິນທາງປັນຍາອາຊຽນ ໄຂກອງປະຊຸມ ຄັ້ງທີ 52 ຂອງຕົນທີ່ນະຄອນຫຼວງວຽງຈັນ

ໜ່ວຍງານຮ່ວມມືຊັບສິນທາງປັນຍາອາຊຽນ ໄຂກອງປະຊຸມ ຄັ້ງທີ 52 ຂອງຕົນທີ່ນະຄອນຫຼວງວຽງຈັນ

Posted by

 

     ອີກຄັ້ງນຶ່ງທີ່ ສປປ.ລາວ ໄດ້ຮັບກຽດຈາກບັນດາປະເທດເພື່ອນມິດອາຊຽນ ໃຫ້ເປັນສະຖານທີ່ຈັດເວທີປະຊຸມສຳຄັນນັ້ນກໍຄື ກອງປະຊຸມ ຄັ້ງທີ 52 ຂອງໜ່ວຍງານຮ່ວມມືທາງດ້ານຊັບສິນທາງປັນຍາອາຊຽນ (AWGIPC) ພ້ອມທັງກອງປະຊຸມທີ່ກ່ຽວຂ້ອງ ເຊິ່ງເລີ່ມໄຂຂຶ້ນໃນຕອນເຊົ້າຂອງວັນທີ 14 ແລະ ມີວາລະການປະຊຸມເຖິງວັນທີ 17 ກຸມພາ 2017 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ.

     ນີ້ແມ່ນອີກນຶ່ງເວທີສຳຄັນຂອງຄະນະຜູ້ແທນຈາກ 10 ປະເທດສະມາຊິກອາຊຽນ ແລະ ປະເທດຍີ່ປຸ່ນ ທີ່ໄດ້ເຂົ້າຮ່ວມຫາລື ແລະ ຕັດສີນໃຈກ່ຽວກັບເປົ້າໝາຍຫຼັກເພື່ອບັນລຸວິໄສທັດການເຊື່ອມໂຍງເສດຖະກິດພາກພື້ນ ເຊິ່ງໂຮມເຖິງການສົ່ງເສີມ ແລະ ພັດທະນາຂົງເຂດວຽກງານຊັບສິນທາງປັນຍາ ທັງນີ້ ໃນວາລະໄຂກອງປະຊຸມ AWGIPC ຄັ້ງທີ 52 ໂດຍການເປັນປະທານຮ່ວມຂອງ ທ່ານ ຫຸມພັນ ອິນທະຣາດ ຮອງລັດຖະມົນຕີກະຊວງວິທະຍາສາດ ແລະເຕັກໂນໂລຊີ ທ່ານນາງ ຊາຣີນາ ຢູຊ໋ອບ ຄານ ປະທານ ໜ່ວຍງານຮ່ວມມືທາງດ້ານຊັບສິນທາງປັນຍາອາຊຽນ ແລະ ທ່ານ ດຣ.ນາງ ຂັນລາສີ ແກ້ວບຸນພັນ ຫົວໜ້າກົມຊັບສິນທາງປັນຍາ ມີບັນດາຫົວໜ້າສຳນັກງານຊັບສິນທາງປັນຍາປະເທດສະມາຊິກອາຊຽນ ແລະ ຄະນະຜູ່ແທນ ພ້ອມດ້ວຍນັກວິຊາການທີ່ກ່ຽວຂ້ອງຂອງປະເທດຍີ່ປຸ່ນເຂົ້າຮ່ວມ.

     ໃນໂອກາດດັ່ງກ່າວ ທ່ານຮອງລັດຖະມົນຕີກະຊວງວິທະຍາສາດ ແລະເຕັກໂນໂລຊີ ໄດ້ໃຫ້ກຽດກ່າວໄຂກອງປະຊຸມຢ່າງເປັນທາງການ ໂດຍທ່ານໄດ້ຍົກໃຫ້ເຫັນປະເດັນສຳຄັນຂອງການສ້າງປະຊາຄົມເສດຖະກິດອາຊຽນ (AEC) ເມື່ອປີ 2015 ເຊິ່ງແມ່ນເປົ້າໝາຍຫຼັກເພື່ອໃຫ້ບັນລຸການເຊື່ອມໂຍງເສດຖະກິດກັບພາກພື້ນ ໂຮມໄປເຖິງການສົ່ງເສີມການພັດທະນາໃນຂົງເຂດວຽກງານຊັບສິນທາງປັນຍາ ແຜນແມ່ບົດຂອງປະຄົມເສດຖະກິດອາຊຽນເຖິງປີ 2025 ເພື່ອສືບຕໍ່ເສີມຂະຫຽາຍໝາກຜົນໃນໄລຍະຜ່ານມາ ແລະ ສາມາດຍາດເອົາຜົນສຳເລັດໃນການເຊື່ອມໂຍງເສດຖະກິດໃນລະດັບສູງ ແລະ ເຂັ້ມແຂງຂຶ້ນກວ່າເກົ່າ.

     ອີກນຶ່ງວາລະສຳຄັນກໍແມ່ນພິທີໄຂສູນຂໍ້ມູນຂ່າວສານທາງດ້ານຊັບສິນທາງປັນຍາຂອງອາຊຽນ ແລະ ດຳເນີນກອງປະຊຸມປຶກສາຫາລືກັບສຳນັກງານສິດທິບັດຍີ່ປຸ່ນ ເຊິ່ງພາຍຫຼັງສຳເລັດກອງປະຊຸມໃນວັນທຳອິດກໍໄດ້ມີການຈັດງານລ້ຽງຕ້ອນຮັບຄະນະຜູ່ແທນກອງປະຊຸມ ຄັ້ງທີ 52 ຂອງໜ່ວຍງານທາງດ້ານຊັບສິນທາງປັນຍາອາຊຽນ.

ຂ່າວ/ພາບ: ໄຊມຸງຄຸນ

 

Leave a Reply

Your email address will not be published. Required fields are marked *

*