​ເປັນ​ຫຍັງ​ນ້ຳ​ປູ ນາ​ມົນ​ໃໝ່ ຈິ່ງ​ໄດ້​ຊື່ວ່າ​ເປັນ​ຂອງ​ດີ​ເມືອງ​ກາສີ?

​ເປັນ​ຫຍັງ​ນ້ຳ​ປູ ນາ​ມົນ​ໃໝ່ ຈິ່ງ​ໄດ້​ຊື່ວ່າ​ເປັນ​ຂອງ​ດີ​ເມືອງ​ກາສີ?

Posted by

      ນຶ່ງ​ໃນ​ວັດ​ທະ​ນະ​ທຳ​ການ​ແປ​ຮູບ​ອາຫານຕາມ​ພູມ​ປັນຍາ​ທ້ອງ​ຖິ່ນ​ກໍ​ຄື ກິ່ນ​ອາຍ​ຂອງ​ນ້ຳ​ປູ​ທີ່​ມີ​ຢູ່ຄູ່​ເຮ​ືອນຄົວ​ລາວ​ມາ​ຫຼາຍ​ຮ້ອຍ​ປີ ດັ່ງນັ້ນ ນ້ຳ​ປູກາ​ປູ​ຄຳ​ ຂອງ​ກຸ່ມ​ປຸງ​ແຕ່ງອາຫານ​ບ້ານ​ນາ​ມົນ​ໃໝ່ ​ເມືອງ​ກາສີ ​ແຂວງ​ວຽງ​ຈັນ ຈິ່ງ​ຖື​ເປັນ​ຂອງ​ດີ​ທີ່​ໄດ້​ຮັບ​ການ​ສືບ​ທອດ​ສີມື​ຜ່ານ​ຮຸ່ນສູ່ຮຸ່ນ (​ເພິ່​່ນວ່າ​ກິ່ນ​ຕຸໆຂອງ​ແຈ່ວນ້ຳ​ປູ​ຖ້າ​ໄດ້​ເຂົ້າໜຽວ​ຈ້ຳ​ກັບໜໍ່​ໄລ່​ນາງ​ດິນ​ຕົ້ມ​ໃໝ່​ຮັບຮອງວ່າ​ໄດ້​ທັງ​ຄຸນຄ່າ​ທາງ​ໂພຊະ​ນາ​ການ​ຜ່ານລົດ​ຊາດ​ນົວ​ຫອມ​ຕາມ​ທຳ​ມະ​ຊາດ​ຂອງ​ອາຫານ​ພື້ນ​ບ້າ​ນລາວ ອ່ານ​ແລ້ວ​ນ້ຳລາຍ​ເຫີ​ຍ!).

      ທ່ານ ນາງ ມະນີ​ວອນ ຈັນທະ​ວົງ ຫຼື ທີ່​ຫຼາຍໆ​ຄົນ​ເອີ້ນ​ວ່າ ​ແມ່​ໂມ ບ້ານ​ນາ​ມົນ​ໃໝ່ ​ໄດ້​ເປີດ​ເຜີຍຕໍ່​ທີ​ມຂ່າວ​ວິທະຍຸຍະຄອນຫຼວງວຽງຈັນ ​ໃນ​ໂອກາດ​ເຂົ້າ​ຮ່ວມ​ງານ​ວາງສະ​ແດງ​ສິນຄ້າ ນຶ່ງ​ເມືອງ ນຶ່ງຜະລິດ​ຕະພັນ​ແຫ່ງ​ຊາດ​ທົ່ວ​ປະ​ເທດ​ທີ່​ສູນ​ການ​ຄ້າ​ລາວ-​ໄອ​ເຕັກ (ຫຼັງຕໍ່າ) ນະຄອນຫຼວງ​ວຽງ​ຈັນ ​ເມື່ອ​ລະຫວ່າງ​ວັນ​ທີ 22-26 ກຸມພາ 2017 ຜ່ານ​ມາ​ວ່າ “ປູ​ນາ​ເຊິ່ງ​ອອກ​ຕາມ​ຂີ້​ຄາດ ​ໃນ​ລະດູ​ກຽມ​ສູ່ການ​ປັກ​ດຳນາ​ນປີ​ຖື​​ເປັນ​ວັດຖຸ​ດິບ​ສຳຄັນ​ໃນ​ການ​ປຸງ​ແຕ່ງ​ນ້ຳ​ປູ​ນາ​ມົນ​ໃໝ່ ເຊິ່ງ​ຫາ​ເກັບ​ໄດ້​ໃນ​ໄລຍະ​ປະມານ 3 ​ເດືອນ (ກໍລະກົດ ສິງຫາ ກັນຍາ) ​ ​ເພື່ອ​ນຳ​ມາສູ່​ຂັ້ນຕອນ​ການ​ຜະລິດ​ຕາມ​ສູດ​ດັ້ງ​ເດີມ​ທີ່​ເພີ່ມຕື່ມ​ພຽງ​ໃບ​ສີໄຄ ​ແລະ ​ເກືອ​ປະລິມານ​ໜ້ອຍ ​ແຕ່​ວ່າການ​ໝັກ​ບົ່ມ ​ແລະ ​ຕົ້ມຂ້ຽວ​ຄື​ຫົວ​ໃຈ​ສຳຄັນ​ສຳລັບ​ການ​ແປ​ຮູບນ້ຳ​ປູ​ຄຸ​ນະພາບ.

ທ່ານ ນາງ ມະນີ​ວອນ ຈັນທະ​ວົງ ຫຼື ​ແມ່​ໂມ ເຈົ້າຂອງຜະລິດຕະພັນນໍ້າປູແຊບ ບ້່ານນາມົນໃໝ່

      ​ເນື່ອງ​ຈາກ​ປະສົບ​ການ​ທີ່​ສະ​ສົມ​ຜ່ານ​ການ​ປຸງ​ແຕ່ງ​ນ້ຳ​ປູ​ມາ​ແຕ່​ໄວ​ເດັກ ​ເຮັດ​ໃຫ້​ແມ່​ໂມ ​ເຂົ້າ​ໃຈ​ໃນ​ຂະ​ບວນການ​ຜະລິດ​ ບໍ່​ວ່າ​ຈະ​ເປັນ​ວິທີ​ການ​ລ້າງ​ປູ ການ​ບົດ ຫຼື ຕຳ​ກ່ອນ​ນຳ​ມາ​ໝັກ​ບົ່ມ ສ່ວນ​ປະສົມ​ລະຫວ່າງ​ໃບ​ສີ​ໄຄ ​ແລະ ​ເກືອ​ໃນ​ປະລິມານ​ທີ່​ພໍດີ ​ພ້ອມທັງ​ວິທີ​ການ​ຕົ້ມຂ້ຽວ​ຕະຫຼອດ​ວັນ​ຕະຫຼອດ​ຄືນ ຈິ່ງ​ຈະເກັບ​ຮັກສາ​ໄດ້​ຄຸນະພາ​ບຂອງ​ນ້ຳ​ປູ​ທີ່​ຈະ​ຢູ່​ຄູ່​ຄົວ​ເຮືອນ​ໄດ້​ຍາວ​ນານ (ສາ​ມາດ​ເກັບ​ໄດ້​ດົນ​ເຖິງ 3 ປີ) ທັງ​ໝົດ​ມີ​ເຄັດ​ລັບ ຫຼື ກຳມະ​ວິທີ​ທີ່​ເປັນ​ສູດ​ສະ​ເພາະ​ຂອງ​ແຕ່ລະຄົນ.

      ນ້ຳ​ປູ ເຊິ່ງ​ເປັນ​ຂອງ​ດີ​ປະຈຳ​ບ້ານ​ນາ​ມົນ​ໃໝ່ ມີ 3 ຂະໜາດ​ບັນຈຸ ກະປຸກ​ນ້ອຍ 30.000 ກີບ ກາງ 70.000 ກີບ ​ແລະ ​ໃຫຍ່ 140.000 ກີບ ນີ້​ແມ່ນ​ອາຫານ​ແປ​ຮູບ​ທີ່​ໄດ້​ຜ່ານ​ການ​ກວດກາ​ຄ​ຸນະພາບ​ຈາກ​ອົງການ​ອາຫານ ​ແລະ​ຢາ ກະຊວງ​ສາທາລະນະ​ສຸກ​ຮຽບຮ້ອຍ​ແລ້ວ ທີ່​ສຳຄັນ​ຜະລິດ​ຕະພັນດັ່ງກ່າວ​ນີ້​ຍັງ​ໄດ້​ຮັບ​ກາ​ສັນຍະລັກ​ສິນຄ້າ ນຶ່ງ​ເມືອງ ນຶ່ງ​ຜະລິດຕະພັນ​ແຫ່ງ​ຊາດ ຫຼື ສິນຄ້າ​ໂອດ໋ອບ ຂອງ​ແຂວງ​ວຽງ​ຈັນ ນີ້ແມ່ນນຶ່ງ​ໃນ​ອາຫານ​ປະ​ເພດ​ຈ້ຳ​ທີ່​ຂຶ້ນຊື່​ໃນ​ພາ​ເຂົ້າລາວ​ທີ່​ຈັດ​ໃນ​ໝວດ​ດຽວ​ກັບ​ແຈ່ວ ຍິ່ງ​ຖ້າ​ເປັນ​ແຈ່ວ​ນ້ຳ​ປູ​ສົດ ຫຼື ​ແຈ່ວ​ນ້ຳ​ປູນ​່ວນປາ​ປີ້ງ ​ແລະ ​ນຳ​ໃຊ້​ເປັນ​ເຄື່ອງປຸງ​ຕຳໝາກຫຸ່ງ​​ໃສ່​ນ້ຳ​ປູ​ກໍ​ຈະ​ຮູ້​ເຖິງ​ລົດ​ຊາດ​ນົວ​ຢ່າງ​ເປັນ​ທຳ​ມະຊາດ​ຈາກ​ວັດຖຸ​ດິບ​ໃນທົ່ງ​ນາ​ຊົນນະບົດນຳ​ໃຊ້​ເປ​ັນ​ເຄື່ອງປຸງ ທັງ​ນີ້ ຈິ່ງ​ຂໍ​ເຊີນຊວນ​ບັນດາ​ທ່ານ​ໄປ​ແວ່​ຢາມ​ຖາມ​ຊື້​ໄດ້​ທີ່​ກຸ່ມ​ປຸງ​ແຕ່ງ​ນ້ຳ​ປູ​ບ້ານນາ​ມົນ​ໃໝ່ ​ເມືອງ​ກາສີ ​ແຂວງ​ວຽງ​ຈັນ ​ທີ່​ສຳຄັນ​ແມ່ນ​ການ​ຊຸກຍູ້​ສ່ົງ​ເສີມ​ລູກ​ຫຼານ​ຊາວນາ​ລາວ​ທີ່​ຈະ​ໄດ້​ຮັບ​ໂອກາດຈາກ​ການ​ເກັບ​ກະປູ​ມາ​ຂາຍ ເຊິ່ງ​ໝາຍ​ເຖິງ​ການ​ມີ​ລາຍ​ໄດ້​ເສີມ​ນັ້ນ​ເອງ.

ໂດຍ: ດອກບານເດິກ

 

Leave a Reply

Your email address will not be published. Required fields are marked *

*