5 ວັນອັນຕະລາຍ ໃນໄລຍະສົງການ ມີຄົນເສຍຊີວິດຍ້ອນອຸບັດຕິເຫດຕາມທ້ອງຖະໜົນເຖິງ 39 ຄົນ

5 ວັນອັນຕະລາຍ ໃນໄລຍະສົງການ ມີຄົນເສຍຊີວິດຍ້ອນອຸບັດຕິເຫດຕາມທ້ອງຖະໜົນເຖິງ 39 ຄົນ

Posted by

      ຂໍ້ມູນໃນເບື້ອງຕົ້ນຈາກກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ (ປກສ) ລະບຸວ່າ ໃນໄລຍະສະຫຼອງສົ່ງທ້າຍປີເກົ່າ ພສ 2559 ແລະ ຕ້ອນຮັບປີໃໝ່ ພສ 2560 ຫຼື 5 ວັນອັນຕະລາຍ (ວັນທີ 12-16 ເມສາ 2017) ທົ່ວປະເທດມີອຸບັດຕິເຫດທາງຖະໜົນ ເກີດຂຶ້ນທັງໝົດ 271 ກໍລະນີ ເຊິ່ງຖ້າທຽບໃສ່ໄລຍະດຽວກັນຂອງປີ 2016 ເຫັນວ່າເພີ່ມຂຶ້ນເຖິງ 26 ກໍລະນີ ຫຼື ເພີ່ມຂຶ້ນ 9,59% ສົ່ງຜົນໃຫ້ຄົນເສຍຊີວິດເຖິງ 39 ລາຍ ໃນນັ້ນ ເປັນເພດຍິງ 6 ລາຍ ທຽບໃສ່ໄລຍະດຽວກັນຂອງປີຜ່ານມາ ເຫັນວ່າໂຕເລກຜູ້ເສຍຊີວິດເພີ່ມຂຶ້ນເຖິງ 12 ລາຍ ຫຼື ເພີ່ມຂຶ້ນ 30,76%.

      ອີງຕາມລາຍງານການສົມທຽບສະຖິຕິອຸບັດຕິເຫດທາງຖະໜົນນັບແຕ່ວັນທີ 12-16 ເມສາ 2017 ກັບສະຕິຕິໃນໄລຍະດຽວກັນຂອງປີ 2016 ເຊິ່ງໃນປີນີ້ຢູ່ທົ່ວປະເທດມີອຸບັດຕິເຫດເກີດຂຶ້ນດັ່ງໂຕເລກທີ່ລະບຸຢູ່ຂ້າງເທິງ ສົ່ງຜົນໃຫ້ພາຫະນະເປ່ເພ 478 ຄັນ ເພີ່ມຂຶ້ນ 45 ຄັນ ຫຼື ເພີ່ມຂຶ້ນ 9,41% ຄົນໄດ້ຮັບບາດເຈັບ 429 ຄົນ ໃນນັ້ນ ເພດຍິງ 26 ຄົນ ເພີ່ມຂຶ້ນເຖິງ 108 ຄົນ ຫຼື ເພີ່ມຂຶ້ນ 25,17% ໂດຍທຽບໃສ່ໄລຍະສະຫຼອງເທສະການເມື່ອປີທີ່ຜ່ານມາ.

      ລາຍງານຂ່າວດຽວກັນລະບຸໂຕເລກອຸບັດຕິເຫດທາງຖະໜົນຢູ່ນະຄອນຫຼວງວຽງຈັນ ໃນໄລຍະ 5 ວັນອັນຕະລາຍມີເຖິງ 53 ກໍລະນີ ເຊິ່ງຖ້າທຽບໃສ່ໄລຍະດຽວກັນເມື່ອປີ 2016 ເຫັນວ່າເພີ່ມຂຶ້ນ 4 ກໍລະນີ ຫຼື ເພີ່ມຂຶ້ນ 7,54% ພາຫະນະເປ່ເພ 115 ຄັນ ເພີ່ມຂຶ້ນ 26 ຄັນ ຫຼື ເພີ່ມຂຶ້ນ 22,60% ສົ່ງຜົນໃຫ້ຄົນໄດ້ຮັບບາດເຈັບ 62 ຄົນ ເຫັນວ່າຫຼຸດລົງຈາກຈຳນວນ ຜູ້ບາດເຈັບເມື່ອປີຜ່ານມາ 34 ຄົນ ຫຼື ຫຼຸດລົງ 35,41% ແຕ່ວ່າຈຳນວນຜູ້ເສຍຊີວິດພັດມີເຖິງ 10 ລາຍ ທຽບໃສ່ໄລຍະດຽວກັນເມື່ອປີຜ່ານມາເຫັນວ່າເພີ່ມຂຶ້ນ 2 ລາຍ ຫຼື ເພີ່ມຂຶ້ນ 20%.

      ສຳລັບສາເຫດຫຼັກທີ່ກໍ່ໃຫ້ເກີດອຸບັດຕິເຫດຕາມທ້ອງຖະໜົນຈົນສົ່ງຜົນໃຫ້ຜູ້ຮ່ວມສັນຈອນຕ້ອງບາດເຈັບ ລົ້ມຕາຍໄປຈຳນວນບໍ່ໜ້ອຍນັ້ນ ກໍເນື່ອງມາຈາກບັນຫາດື່ມສິ່ງມຶນເມົາແລ້ວຂັບຂີ່ພາຫະນະ ແລະ ຂັບຂີ່ດ້ວຍຄວາມຄຶກຄະນອງ-ຂັບໄວເກີນກຳນົດ ຮວມເຖິງລະບົບເຕັກນິກລົດທີ່ຜູ້ຂັບຂີ່ອາດຖືເບົາ.

ຂ່າວ: ດອກບານເດິກ

Leave a Reply

Your email address will not be published. Required fields are marked *

*