Hitachi Zosen ຈັດປະກວດເຕັກໂນໂລຊີສີຂຽວ ປຸກຈິດສຳນຶກໄວໜຸ່ມລາວຕໍ່ການອະນຸຮັກສິ່ງແວດລ້ອມ

Hitachi Zosen ຈັດປະກວດເຕັກໂນໂລຊີສີຂຽວ ປຸກຈິດສຳນຶກໄວໜຸ່ມລາວຕໍ່ການອະນຸຮັກສິ່ງແວດລ້ອມ

Posted by

      ຮິຕະຊິ ໂຊເຊັນ ເຊິ່ງເປັນບໍລິສັດອຸດສາຫະກຳ ແລະວິສະວະກຳ ຂອງປະເທດຍີ່ປຸ່ນ ໄດ້ຮ່ວມກັບ ກະຊວງພະລັງງານ ແລະບໍ່ແຮ່ ພ້ອມດ້ວຍ ກະຊວງສຶກສາທິການ ແລະກິລາ ຈັດງານປະກວດດ້ານເຕັກໂນໂລຊີສີຂຽວ “ລາວກຣິນເທັກ” ທີ່ສູນບູໂດ ລາວ-ຍີ່ປຸ່ນ ນະຄອນຫຼວງວຽງຈັນ ກິດຈະກຳດັ່ງກ່າວມີຂຶ້ນ ເມື່ອວັນທີ 20 ມັງກອນ 2018 ເພື່ອຄົ້ນຫາບັນດາໂຕແບບຜ່ານການປະດິດ ແລະນຳໃຊ້ເຕັກໂນໂລຊີເຂົ້າໃນການດຳລົງຊີວິດທີ່ຕິດພັນກັບການອະນຸຮັກສິ່ງແວດລ້ອມໂດຍມີນ້ອງໆນັກສຶກສາເຂົ້າຮ່ວມຢ່າງຫຼວງຫຼາຍ.

      ເຂົ້າຮ່ວມເປັນປະທານໃນກິດຈະກຳຄັ້ງສຳຄັນນີ້ມີ ທ່ານ ສີນາວາ ສຸພານຸວົົງ ຮອງລັດຖະມົນຕີ ກະຊວງພະລັງງານ ແລະບໍ່ແຮ່ ທ່ານ ໂຕຊິຢຸກິ ຊິລາກີ ຜູ້ອຳນວຍການໃຫຍ່ ບໍລິສັດ ຮິຕະຊິ ໂຊເຊັນ ທ່ານ ກາຊຸຮີໂລ ກຸໂນ ຮອງເອກອັກຄະລາຊະທູດຍີ່ປຸ່ນ ປະຈຳ ສປປ ລາວ ມີບັນດາຄູ-ອາຈານ ພະນັກງານວິຊາການ ແລະບັນດາໄວໜຸ່ມ.

      ທ່ານຜູ້ອຳນວຍການໃຫຍ່ ບໍລິສັດ ຮິຕະຊິ ໂຊເຊັນ ໃຫ້ຮູ້ວ່າ Hitachi Zosen ໄດ້ເຊັນ ຂໍ້ຕົກລົງວ່າດ້ວຍການຮ່ວມມືຮອບດ້ານ ກັບກະຊວງພະລັງງານ ແລະ ບໍ່ແຮ່ ເພື່ອພັດທະນາໂຄງການໃນຂົງເຂດພະລັງງານສະອາດ ແລະ ເປັນມິດກັບສິ່ງແລດລ້ອມ ບົນພື້ນຖານຂໍ້ຕົກລົງດັ່ງກ່າວ ບໍລິສັດ ຮິຕະຊິ ໂຊເຊັນ ກໍພວມພັດທະນາພະລັງງານທົດແທນທີ່ສະອາດຢູ່ ສປປ ລາວ ເພື່ອໃຫ້ບັນລຸແຜນ ແລະ ວິໄສທັດ ຂອງ ສປປ ລາວ ເຊິ່ງມັນມີຄວາມຈຳເປັນທີ່ຈະຕ້ອງໃຫ້ພາກລັດ ແລະເອກະຊົນ ມີສ່ວນໃນການເຮັດວຽກຮ່ວມກັນ ດ້ວຍເຫດນີ້ ບໍລິສັດ ຮິຕະຊິ ໂຊເຊັນ ຈຶ່ງມີແຜນຈັດງານປະກວດຄັ້ງນີ້ ເພື່ອເປັນເວທີໃຫ້ທຸກພາກສ່ວນໄດ້ຮ່ວມສະແດງອອກເຖິງແນວຄວາມຄິດ ແລະການປະດິດສ້າງເພື່ອໂລກສີຂຽວ.

      ໃນໂອກາດດຽວກັນ ຮອງລັດຖະມົນຕີ ກະຊວງພະລັງງານ ແລະບໍ່ແຮ່ ກໍໄດ້ກ່າວວ່າ ຈຸດປະສົງຫຼັກຂອງງານປະກວດຄັ້ງນີ້  ແມ່ນເພື່ອປຸກຈິດສຳນຶກໃຫ້ກັບນັກຮຽນ-ນັກສຶກສາ ຮຽນຮູ້ກ່ຽວກັບບັນຫາສິ່ງແວດລ້ອມ ແລະຄວາມສຳຄັນຂອງການຄ້ຳປະກັນຄວາມໝັ້ນຄົງທາງດ້ານພະລັງງານຢູ່ ສປປ ລາວ ເຊິ່ງຖືເປັນອີກໜຶ່ງຊ່ອງທາງໃນການສະໜອງດ້ານຂໍ້ມູນແກ່ລັດຖະບານ ແລະພາກບໍລິສັດເອກະຊົນ ຮວມເຖິງມວນຊົນທົ່ວໄປ ເພາະໃນງານປະກວດຄັ້ງນີ້ ນອກຈາກຈະເປັນເວທີສະແດງທັກສະໃຫ້ກັບນັກຮຽນ-ນັກສຶກສາ ໄດ້ນຳສະເໜີແນວຄວາມຄິດຂອງຕົນໃນການປະດິດຄິດຄົ້ນຕ່າງໆແລ້ວ ຍັງເປັນການສ້າງກາລະໂອກາດໃຫ້ນັກຮຽນ-ນັກສຶກສາ ຈາກບັນດາມະຫາວິທະຍາໄລຕ່າງໆໃນ ສປປ ລາວ ໄດ້ຄຳນຶງເຖິງບັນຫາສິ່ງແວດລ້ອມ ແລະພະລັງງານສະອາດທີ່ເປັນມິດກັບສິ່ງແວດລ້ອມອີກດ້ວຍ.

      ສຳລັບງານປະກວດດ້ານເຕັກໂນໂລຊີສີຂຽວ “ລາວກຣິນເທັກ” ໃນຄັ້ງນີ້ ກໍນັບວ່າ ເປັນຄັ້ງທຳອິດ ທີ່ຈັດຂຶ້ນໃນ ສປປ ລາວ  ເຊິ່ງມີນັກສຶກສາທີ່ມາຈາກ 10 ທີມ ເຂົ້າຮ່ວມປະກວດ ແລະ ມີ 6 ຫ້ອງວາງສະແດງຈາກພາກລັດ ແລະເອກະຊົົນ ໂດຍຜະລິດຕະພັນທີ່ນຳສະເໜີ ກໍລ້ວນແຕ່ແມ່ນສິນຄ້າເຕັກໂນໂລຊີ ສຳລັບການພັດທະນາພະລັງງານສີຂຽວ.

ຂ່າວ: ໄຊມຸງຄຸນ

Leave a Reply

Your email address will not be published. Required fields are marked *

*